Isikeli 23 - AI VOLA TABU

Era dauqarava na kalou lasu e na matanitu ko Juta kei Isireli, a sa vakatokai me nodrau dauyatagane ko Aola kei Aolipa, 1-21. Ena cudruvi Aolipa ko ira na nonai tau, 22-35. Sa vunauca ko koya na parofita na nodrau dauveibutakoci ruarua, 36-44, a sa vakatakila na nodrau cudruvi, 45-49.

¹ SA yaco tale vei au na vosa i Jiova, ka vaka,

² Na luve ni tamata, sa lewe rua na alewa, erau tina vata:

³ a rau sa ia na dauyatagane mai Ijipita; ni rau sa gonealewa tiko erau sa ia na dauyatagane: sa bikai maikea na sucudrau, io maikea sa rau tabaka na mata-ni-sucudrau vakagone-alewa.

⁴ Ia na yacadrau ko Aola sa qase vei rau, kei Aolipa na tacina: a rau a noqu ga, ka rau vakasucuma na luvedrau tagane kei na luvedrau alewa. Ia na yacadrau; sai Samaria ko Aola, ia ko Jerusalemi ko Aolipa.

⁵ A sa ia na dauyatagane ko Aola ni sa noqu tiko; ka sa domoni ira na nonai tau, na kai Asiria era tiko voleka,

⁶ ka ra vakaisulu e nai sulu karakarawa, na turaga ni valu kei na turaga daulewa, era cauravou domoni kecega, ka dauvodo lako e na ose.

⁷ Ia sa soli koya me ia na veibutakoci kei ira, era gone digitaki ni Asiria kecega, kei ira kece talega sa domona ko koya: e na nodra matakau kecega sa vakadukadukalitaki koya kina ko koya.

⁸ Ia na nona dauyatagane mai Ijipita sa sega ga ni biuta: ni ra a koto kaya ni sa gonealewa ko koya, ka ra tabaka na sucuna vakagonealewa, ka sova vua na nodra dauyalewa.

⁹ O koya o qo kaʼu sa soli koya kina ki na ligadra na nonai tau, ki na ligadra na kai Asiria, sa domoni ira ko koya.

¹⁰ Sai ira o qo sa ra vakaraitaka na nona luvawale: kei na luvena tagane kei na luvena alewa sa ra kauta, kei koya dina sa ra vakamatea e nai seleiwau: a sa rogo kina na yacana vei ira na alewa; e na vuku ni veicudruvi sa ra ia vua.

¹¹ Ia ni sa raica ko tacina ko Aolipa, sa qai ca vakalevu mai vei rau ko koya e na nona dauveidomoni, ia na nona dauyatagane sa qai levu mai ka lailai na nona dauyatagane na tuakana.

¹² Sai ira na gone ni Asiria sa domona ko koya, na turaga ni valu kei na turaga daulewa, era tiko voleka, ka ra vakaisulu vakaiukuuku sara, ka dauvodo lako e na ose, ka ra cauravou domoni kecega.

¹³ Au a qai raica ni sa vakadukadukalitaki ko koya, ni rau sai valavala vata ga,

¹⁴ ni sa vakaikuritaka ko koya na nona dauyatagane: ka ni sa qai raica ko koya na tagane era volai e na lalaga ni vale, na kedrai vakatakarakara na kai Kalitea era volai e nai qumu,

¹⁵ sa vauci e nai vau na tolodra, ka vakaisalataki e nai sala veivolavolai na uludra, era raici vakaturaga kecega, me vakataki ira na gone ni Papiloni mai Kalitea, na vanua era sucu kina:

¹⁶ a sa domoni ira ko koya ni sa qai raici ira e na matana, a sa vakatadu mata vei ira ki Kalitea.

¹⁷ A ra sa lako mai vua ko ira na gone ni Papiloni ki nai mocemoce ni loloma, ka vakadukadukalitaki koya e na nodra dauyalewa, a sa vakadukadukalitaki kina ko koya, a sa tawase tani na lomana maivei ira.

¹⁸ Ia sa vakaraitaka vakaoqo ko koya na nona dauyatagane, ka vakatakila na nona luvawale: a sa qai tawase tani na lomaqu mai vua, me vaka ni sa tawase tani na lomaqu mai vua na tuakana.

¹⁹ Ia ka sa vakalevutaka ga na nona dauyatagane, ni sa vakananuma ko koya na gauna sa gonealewa kina, ka ia na dauyatagane mai na vanua ko Ijipita.

²⁰ Ni sa domoni ira ko koya era nodrai tau, na lewedra sa vaka na lewe ni asa, ka sa vaka na kedrai vurevure na ose na kedrai vurevure.

²¹ Ia ko a vakananuma vakakina na nomui valavala velavela ni ko a gone, ni ra tabaka na sucumu mai Ijipita e navuku ni sa mata-ni-sucumu vakagonealewa.

²² O koya o qo, Aolipa, sa vosa vakaoqo kina na Turaga ko Jiova, Raica, au na vakauqeti ira na nomui tau me vala kei iko, o ira sa tawase tani na lomamu vei ira, ia kaʼu na kauti ira mai vei iko mai na veiyasana;

²³ o ira na kai Papiloni, kei ira kece na kai Kalitea, ko Pikoti, kei Soa, kei Koa, kei ira vata na kai Asiria kecega: era cauravou domoni kecega, na turaga ni valu kei na turaga daulewa, na turaga levu ka rogo, era vodo lako kecega e na ose.

²⁴ Ia ena lako mai na kemui valu e vakaiyaragi, kei na vale-vodoki, kei na yava vakavale-vodoki, kei nai vavakoso lewe vuqa; nai sasabai kei nai vakaruru kei nai sala ni valu era na tuva vakaivalu, me viribaiti iko: ia kaʼu na tauca na lewa e matadra, a ra na lewai iko me vaka na nodra lewa:

²⁵ ia kaʼu na tuva na noqu vuvu mo kemui valu, a ra na kitaki iko vakatakata sara: na ucumu kei na daligamu era na cebeta laivi; kei na nomu kawa e vo era na bale e nai seleiwau: o ira na luvemu tagane kei na luvemu alewa era na kauta; kei na nomu kawa e vo era na vakamai e na buka.

²⁶ A ra na luvata tani vei iko na nomui sulu, ka kauta tani na kemui yaya vakaiukuuku.

²⁷ Ia kaʼu na muduka tani vei iko na nomui valavala velavela, kei na nomu dauyatagane e kau mai na vanua ko Ijipita: o na sega kina ni ta cake e na matamu vei ira, io ko Ijipita, ko na tawa nanuma tale kina.

²⁸ Ni sa vosa vakaoqo na Turaga ko Jiova; Raica, au na soli iko ki na ligadra ko sa cati ira, ki na ligadra sa tawase tani vei ira na lomamu:

²⁹ a ra na kitaki iko e na yaloca, ka kauta kece tani na ka ko sa ocataka, ka laivi iko mo luvawale ka luveniyali: ena vakaraitaki talega na nomu luvawale ni dauyatagane, ia na nomui valavala velavela kei na nomu dauyatagane.

³⁰ Au na cakava na ka o qo vei iko, e na vuku ni ko sa muri ira na veimatanitu, me ia na dauyatagane, ka sa vakadukadukalitaki e na nodra matakau.

³¹ Na sala ni tuakamu ko sa muria; o koya o qo kaʼu na solia kina na mena bilo ki na ligamu.

³² Sa vosa vakaoqo na Turaga ko Jiova; A mena bilo na tuakamu ko na gunuva, sa titobu ka levu: o na dredrevaki ka vakalialiai; sa bilo tawa sara.

³³ O na vakamamautaki e na mateni kei na rarawa, e na bilo ni veivakidacalataki kei na veivakarusai, e na mena bilo na tuakamu ko Samaria.

³⁴ Ia ko na gunuva ka vakadiva, na kenai caca talega ko na vorolaka, ia na sucumu ko na cavuka: niʼu sa cavuta, sa kaya na Turaga ko Jiova.

³⁵ O koya o qo sa vosa vakaoqo kina na Turaga ko Jiova; E na vuku ni ko sa guilecavi au, ka vakanadakui au, mo colata ga kina na nomui valavala velavela kei na nomu dauyatagane.

³⁶ A sa kaya tale vei au ko Jiova, Na luve ni tamata, o na sega beka ni lewai Aola kei Aolipa? io, mo tukuna vei rau na nodraui valavala vakasisila;

³⁷ ni rau sa ia na dauyatagane, a dra talega sa tu e na ligadrau, e na nodrau matakau talega, erau sa ia na dauyatagane, a luvedrau talega, erau vakasucuma vei au, erau sa vakalakova ki loma ni buka, me katia.

³⁸ A ka talega o qo erau sa cakava vei au: erau sa vakacacana na noqu vale tabu e na siga ko ya, ka vakacacataka na noqu siga tabu.

³⁹ Ka ni rau a cabori ira oti na luvedrau ki na nodrau matakau, erau sa qai lako mai e na siga dina ko ya ki na noqu vale tabu me vakacacana; ia, raica, sa vakaoqo na ka erau sa cakava e na loma ni noqu vale.

⁴⁰ Ia o qo talega, ni dou a talakitaki ira na tamata vakayawa, ka vakatadu kedra mata; ka, raica, era sa lako mai: ko sa qai vui iko e na vukudra, ka qumuta na matamu, ka vakaiukuukutaki iko e nai ukuuku,

⁴¹ ka mani tiko e nai mocemoce vakaturaga, ia nai kanakana sa vakarau tu e matana, na noqu ka boi vinaka kei na noqu waiwai talega ko sa viritu e delana:

⁴² a domodra talega na lewe vuqa era tiko wale era sa tiko kaya: ia ka kedrai kuri na tagane o qo, e so na tamata wale era sa kauti mai, na kai Sipa mai na veikau, era daramaka na qato ki na ligadra, ka vakaisalataka vakaiukuuku na uludra.

⁴³ Au a qai cavuti koya sa madra e na dauyatagane, ka kaya, Era na qai ia li na veibutakoci kei koya talega o qo?

⁴⁴ A ra sa curu ga vua, me vaka era curu vua na alewa sa ia na dauyatagane: sa vakaoqo na nodra curu yani vei Aola kei Aolipa, koi rau na alewa velavela.

⁴⁵ Ia ko ira na tamata yalododonu, era na lewai rau me vaka na kedrai valavala na alewa dauyatagane, kei na kedrai valavala na alewa sa vakadavea na dra; e na vuku ni rau sa alewa dauyatagane, a dra talega sa tu e na ligadrau.

⁴⁶ Ni sa vosa vakaoqo na Turaga ko Jiova; Au na kauta cake mai kivei rau e dua nai vavakoso, ka soli rau me kauti tani ka vakacacani.

⁴⁷ Ena viriki rau talega e na vatu nai vavakoso, ka suaki rau e na nodrai seleiwau; a luvedrau tagane kei na luvedrau alewa era na vakamatea, kei na nodrau vale era na vakama e na buka.

⁴⁸ Ia kaʼu na muduka tani vakaoqo nai valavala velavela mai na vanua, me ra vakavulici kece kina na alewa me kakua ni muria na nomudraui valavala velavela.

⁴⁹ Ia era na sauma na nomudraui valavala velavela vei kemudrau, kei nai valavala ca ni nomudrau matakau drau na colata: ia drau na kila ni sai au na Turaga ko Jiova.