Isikeli 22 - AI VOLA TABU

Sa vakamacalataki na nodrai valavala ca na kai Jerusalemi, 1-12. Sa na vakamai ira na Kalou e na nona lovo me vaka na de ni kaukamea, 13-22. Era sa tamata ca vata na parofita, kei na bete, kei na turaga, kei na lewe ni koro, 23-31.

¹ A SA yaco vei au na vosa i Jiova, ka vaka,

² Ia ko iko, na luve ni tamata, ko na sega li ni lewa, ko na sega li ni lewa na koro dautauvi dra o qo, ka vakatakila vua na nonai valavala vakasisila kecega?

³ Mo qai kaya, Sa vosa vakaoqo na Turaga ko Jiova, Na koro o qo sa vakadavea na dra e lomana, me yaco kina na kena gauna, a sa cakava e so na matakau me ca ko koya ni sa vakadukadukalitaki kina.

⁴ E na kemudou dra ko sa vakadavea ko sa cala kina; e na nomu matakau talega ko sa cakava ko sa vakadukadukalitaki iko kina; ia ko sa vakavolekataka na kemu gauna, ka yacova na kemu yabaki: o koya o qo kaʼu sa soli iko kina me vakalialiai e na veimatanitu, ka dredrevaki e na veivanua kecega.

⁵ O ira sa voleka, kei ira sa yawa vei iko, era na dredrevaki iko, sa daurogorogo ca ka dauvakararawataki.

⁶ Raica, o ira na turaga ni Isireli kecega, me vaka na ka era rawata, era sa dui tikori iko me ra vakadavea na dra.

⁷ A tamadra kei na tinadra era sa beca e tikimu: vua na vulagi era sai valavala vakausausa kina e na kemu maliwa: a luveniyali kei na alewa dawai era sa vakararawataka e tikimu.

⁸ A noqu ka tabu ko sa beca, kei na noqu siga tabu ko sa vakacacana.

⁹ A tamata daukakase era sa tikori iko me vakadavea na dra: ia e na veiulu-ni-vanua era sa kana kina e tikimu: a ka velavela era sa ia e na kemu maliwa.

¹⁰ A nodra luvawale na tamadra era sa vakaraitaka era tikori iko: na alewa e tawase ni sa tawa savasava era sa vakaukauwataka e tikimu.

¹¹ Ia e dua sa kitaka na ka vakasisila kaya na watina na kai nona; ka dua tale sa vakadukadukalitaka vakara ua vugona alewa; ka dua tani tale e tikimu sa vakaukauwataka na ganena, na luve ni tamadrau;

¹² nai yau sa tara e tikimu me vakadavea na dra; nai voli ni ka e saravi kei nai yau e tubu kina, ko sa taura; ko sa kovea vakocokoco na nodrai yau na kai nomu e nai valavala kaukauwa, ia koi au ko sa guilecava, sa kaya na Turaga ko Jiova.

¹³ Ka, raica, kaʼu sa sauca na ligaqu ki na nomui yau ni veikocovi ko sa rawata, kei na vuku ni kedra dra na kai nomu sa tu vei iko.

¹⁴ Ena dei beka na lomamu, se kaukauwa na ligamu, e na gauna kaʼu na ia kina kei iko? Oi au ko Jiova kaʼu sa cavuta, kaʼu na cakava talega.

¹⁵ Ia kaʼu na dui vakasevi kemudou ki na veimatanitu, ka duibiubiuti kemudou ki na veivanua, ka vakaotia tani na nomu dukadukali maivei iko;

¹⁶ o na qai vota ga na kemu e matadra na veimatanitu, ia ko na kila ni sai au ko Jiova.

¹⁷ A sa yaco vei au na vosa i Jiova, ka vaka,

¹⁸ Na luve ni tamata, sa yaco na mataqali nei Isireli me de ni kaukamea vei au: o ira kece era sa parasa ga, ka tini, ka aironi, ka uma, e na loma ni lovo; io era sa de ni siliva.

¹⁹ O koya o qo sa vosa vakaoqo kina na Turaga ko Jiova; E na vuku ni dou sa yaco kecega me de ni kaukamea, raica, au na kumuni kemudou kina ki na loma i Jerusalemi.

²⁰ Me vaka era sa kumuna vata na siliva, kei na parasa, kei na aironi, kei na uma, kei na tini, ki na loma ni lovo, me uvuca kina na kena buka, me vakawaicalataki; au na kumuni kemudou vakakina e na noqu cudru kei na noqu lesa, kaʼu na qai vakacegu yani, ka vakawaicalataki kemudou.

²¹ Io, kaʼu na vakasoqoni kemudou, ka uvuci kemudou e na buka ni noqu cudru, mo dou vakawaicalataki e lomana.

²² Me vaka sa vakawaicalataki na siliva e na loma ni lovo, dou na vakawaicalataki vakakina e lomana; ia dou na kila ni sai au ko Jiova kaʼu sa sovaraka na noqu cudru vei kemudou.

²³ A sa yaco vei au na vosa i Jiova, ka vaka,

²⁴ Na luve ni tamata, mo kaya vei koya, Sai iko na vanua sa sega ni vakasavasavataki, se tauci uca e na siga ni cudru.

²⁵ Sa dua na nodra vere na parofita e loma ni koro, me vaka na laioni e tagi ni sa dresulaka na kena; na yalo ni tamata era sa kania; nai yau kei na ka talei era sa taura; na kena alewa dawai era sa va-kalevuqataka e lomana.

²⁶ O ira na nona bete era sa vakacacataka na noqu vunau, ka vakacacana na noqu ka tabu: na ka e tabu era sa tawa tawasea tani mai na ka e tawa tabu, kei na ka tawa savasava era sa tawa vakatakila ni sa dua tani ka dua tani na ka savasava, ki na noqu siga tabu talega era sa tabonaka kina na matadra, ia kaʼu sa vosavakacacataki vei ira.

²⁷ O ira na kena turaga mai lomana era sa vaka na wolifa e dresulaka na kedra, me ra vakadavea na dra, me vakarusa na yalo, me ia na veikoveraki.

²⁸ Ia ko ira na kena parofita era sa boroi ira e nai boro ca, ni ra sa raica na ka wale, ka ia na caka-mana vakailasu vei ira, ka kaya, Sa vosa vakaoqo na Turaga ko Jiova, ia ko Jiova sa sega ni cavuta.

²⁹ O ira na lewe ni vanua era sai valavala vakaukauwa, ka ia na veikoveraki, a dravudravua talega kei na luveniyali era sa vakararawataka: io, na vulagi era sa vakasaurarataka vakatawadodonu.

³⁰ Ia kaʼu a vakasaqara e dua na tamata vei ira, me cakava na bai ni were, ka tu e na tiki ni bai e basuki me sorovi au e na vuku ni vanua, meʼu kakua ni vakarusa: ka sega kaʼu kunea.

³¹ O koya o qo kaʼu sa sovaraka kina na noqu cudru vei ira; e na buka ni noqu cudru kaʼu sa vakarusai ira: na nodrai valavala kaʼu sa sauma ki na uludra, sa kaya na Turaga ko Jiova.