Isikeli 21 - AI VOLA TABU

Sa ia na parofisai kei Jerusalemi ko Isikieli, a sa ia na vutugu me kenai vakatakilakila, 1-7. Ai seleiwau gata ka makamakalivata, 8-17, na kei Jerusalemi, 18-24, kei na kena na matanitu, 25-27, kei na kedra na luve i Amoni, 28-32.

¹ A SA yaco vei au na vosa i Jiova, ka vaka,

² Na luve ni tamata, mo vaqara na matamu ki Jerusalemi, ka vakatauca na nomu vosa ki na veiyasana tabu, ka parofisaitaka na kena na vanua ko Isireli,

³ ka kaya ki na vanua ko Isireli, Sa vosa vakaoqo ko Jiova; Raica, sai au na nomu meca, kaʼu na ucuna na noqui seleiwau mai na kena taga, ka muduki ira tani vei iko na yalododonu kei na tamata ca.

⁴ Ia niʼu na muduka tani vei iko na yalododonu kei na tamata ca, ena lako tani yani kina na noqui seleiwau mai na kena taga vei ira na tamata kecega mai na mata ni ceva ka yacova na mata ni tokalau:

⁵ me ra kila na tamata kecega ni sai au ko Jiova kaʼu sa ucuna na noqui seleiwau mai na kena taga: ena sega ni lesu tale mai.

⁶ Ia ko iko, na luve ni tamata, mo vutugu kina, me vaka sa ramusu na tolomu; ia ni ko sa rarawa, mo vutugu e matadra.

⁷ Ia ena yaco, ni ra sa kaya vei iko, A cava ko sa vutugu kina? mo qai kaya, E na vuku ni rogorogo; ni sa lako mai: ia ena waicala na loma ni tamata kecega, ka wadamele na liga kecega, ka ceguoca na yalo kecega, ia na durudra kecega ena vaka na wai: raica, sa lako mai, ena vakayacori, sa kaya na Turaga ko Jiova.

⁸ SA yaco tale vei au na vosa i Jiova, ka vaka,

⁹ Na luve ni tamata, mo ia na parofisai, ka kaya, Sa vosa vakaoqo ko Jiova; Mo kaya, Ai seleiwau, ai seleiwau sa vagatari, a sa soloti talega:

¹⁰ sa vagatari me ia na veivakamatei vakaidina; me sa makamakalivata sa soloti mai kina: me marautaki li na kena kuita na luvequ, o qori sa beca na kau kecega?

¹¹ A sa solia ko koya me soloti, me sa tauri: a ka o qo sa vagatari kina nai seleiwau, ia na ka o qo sa soloti kina, me soli ki na ligana na dauveivakamatei.

¹² Mo tagi ka qoqolou, na luve ni tamata: ni sai koya ena tauci ira na noqu tamata, sai koya o qo ena tauci ira kecega na turaga ni Isireli: na rerevaka nai seleiwau ena tauci ira na noqu tamata: o koya o qo mo lali dibi kina.

¹³ Ni sa qai yaco mai na veivakatovolei, ena vakaevei kevaka ena beca talega na kuita? ena sega ga, sa kaya na Turaga ko Jiova.

¹⁴ Ia ko iko, na luve ni tamata, mo ia kina na parofisai, ka cobo e na ligamu, ia me ia vakarua nai seleiwau ka vakatolu, na kedrai seleiwau na moku: sai koya o qo na kedrai seleiwau na turaga e moku, ena curu yani vei ira ki na nodra loqi.

¹⁵ Me waicala na lomadra, ka vakalevutaki na kedra veivakarusai, kaʼu sa vaqara kina nai seleiwau rerevaki ki na nodra matamata-ni-koro kecega; io, sa makamakalivata mai, ka soloti tu me ia na veivakamatei:

¹⁶ mo lako vaka se vaka, ki nai matau se nai mawi, ki na yasana ga sa dodonu ki matamu.

¹⁷ Ia koi au talega, kaʼu na cobo e na ligaqu, ka vakaceguya mai na noqu cudru: oi au ko Jiova kaʼu sa cavuta.

¹⁸ A SA yaco tale vei au na vosa i Jiova, ka vaka,

¹⁹ O iko talega, na luve ni tamata, mo lesia e rua na sala, me lako yani kina nai seleiwau i tui Papiloni: me vanua ga e dua bau me na kau kina ruarua: ia mo digitaka e dua na tikina, me sa vu ga ni sala e kau ki na koro mo digitaka:

²⁰ ia mo lesia e dua na vala, me yaco kina nai seleiwau ki Rapa na nodra koro na luve i Amoni, ki Juta talega, ki Jerusalemi na koro kaukauwa.

²¹ Ni sa tu ko tui Papiloni mai na gau ni salatu, e na vu ni sala e rua, me ia na veidigiyaka: sa yavalataka na gasau, sa taroga na matakau, sa dikeva na yate ni manumanu.

²² Mai na ligana i matau sa tu na madigi kei Jerusalemi, me lesi ira na turaga ni valu, me dalaga na gusu ni sa ia na vei vakamatei, me tabalaka na domo ni kaila, me viritura nai tukituki-ni-bai ki na matamata-ni-koro, me viria na suva, me tara na vale-kau ni valu.

²³ Ia ena raici me vaka sa dua na madigi vakailasu vei ira sa ra ia na vosavavakini: ia ka sa nona vakananuma ga o qo ki na nodra caka cala, me ra tauri.

²⁴ O koya o qo sa vosa vakaoqo kina na Turaga ko Jiova; E na vuku ni dou sa cakava na nomudou caka cala me nanumi, ni sa vakarai taki mai na nomudou talaidredre, ni sa kune na nomudoui valavala ca e na nomudou cakacaka kecega; io e na vuku ni dou sa nanumi, dou na tauri liga kina.

²⁵ Ia ko iko, na turaga ni Isireli e be ka ca, ka sa yaco na kemu siga, me tini na caka cala,

²⁶ sa vosa vakaoqo na Turaga ko Jiova; Mo tara tani na nonai sala dina, ka kauta tani na nonai sala vakatui: ena sega ni koyakoya tiko: o koya sa vakasivoi, mo vueta, kei koya sa levu, mo vakasivoya.

²⁷ Au na vukica, vukica, vukica, ia ena segasega tale, ka me lako mada mai ko koya sa dodonu me nona; ia kaʼu na solia ma.

²⁸ IA ko iko, na luve ni tamata, mo ia na parofisai ka kaya, Sa vosataka vakaoqo na Turaga ko Jiova na kedra na luve i Amoni, kei na kedra ka ni veivakalialiai; ia mo kaya, Ai seleiwau, ai seleiwau sa ucuni tu me ia na veivakamatei, sa soloti tu me ia na kanakana, e na vuku ni sa makamakalivata:

²⁹ ni ra raica tiko na ka wale me nomu, ni ra ia tiko na caka-mana vakailasu me nomu, me ra soli iko me bale ki domodra na moku, era tamata ca, ka sa yaco na kedra siga, me tini na caka cala.

³⁰ Meʼu vakasuka li ki na kena taga? E na yasana ko a buli kina, e na vanua ko a sucu kina, sai koya ga kaʼu na lewai iko kina.

³¹ Ia kaʼu na sovaraka vei iko na noqu cudru, e na buka ni noqu cudru kaʼu na uvuci iko, ka soli iko ki na ligadra na dauvakacaca, era daukila veivakarusai.

³² O na yaco me kena buka na buka waqa; a kemu dra ena tu ga o na loma ni vanua; o na sega ni nanumi tale: ni sai au ko Jiova kaʼu sa cavuta.