Isikeli 20 - AI VOLA TABU

Sa bese ni tarogi na Kalou rei ira na qase ni Isireli, 1-4. Sa tukuna na nodra talaidredre mai Ijipita, 5-9, kei na veikau, 10-26, kei na vanua, 27-32. Sa yalayala ko koya me vakasoqoni ira tale e na gauna ni Mesaia, 33-44. Sa vakatokai ko Jerusalemi me veikau, a sa tukuni ni na vakamai, 45-49.

¹ A SA yaco e nai kavitu ni yabaki, e nai kalima ni vula, e nai katini ni siga ni vula, era sa lako mai e so na qase ni Isireli me tarogi Jiova, a ra sa tiko e mataqu.

² Sa qai yaco vei au na vosa i Jiova, ka vaka,

³ Na luve ni tamata, mo vosa vei ira na qase ni Isireli, ka kaya vei ira, Sa vosa vakaoqo na Turaga ko Jiova; Dou sa lako mai me tarogi au, ne? Me vaka na dina ni noqu bula, sa kaya na Turaga ko Jiova, au na sega ni tarogi vei kemudou.

⁴ O na sega li ni lewai ira, o na sega li ni lewai ira, ko iko na luve ni tamata? nai valavala vakasisila ni nodra qase mo vakatakila vei ira:

⁵ ka kaya vei ira, Sa vosa vakaoqo na Turaga ko Jiova; E na siga kaʼu a digitaki ira kina na Isireli, ka laveta cake na ligaqu e na vukudra na kawa ni mataqali i Jekope, ka vakatakilai au vei ira e na vanua ko Ijipita, niʼu a laveta cake na ligaqu vei ira, ka kaya, Oi au ko Jiova na nomudou Kalou;

⁶ e na siga kaʼu a laveta cake kina na ligaqu vei ira, me kauti ira tani mai na vanua ko Ijipita ki na vanua kaʼu a vakaraica me nodra, sa dave kina na wai-ni-sucu kei na oni, o qori nai ukuuku ni vanua kecega:

⁷ au a qai kaya vei ira, Na ka vakasisila ni matamudou, dou dui biuta tani, ia e na matakau ni Ijipita dou kakua ni vakadukadukalitaki kemudou kina: oi au ko Jiova na nomudou Kalou.

⁸ Ia ka ra talaidredre vei au, ka bese ni vakarorogo vei au: na ka vakasisila ni matadra era sa sega ni dui biuta tani, kei na matakau ni Ijipita era sa sega ni vakalaiva: au a qai kaya, Au na sovaraka na noqu cudru vei ira, me vakayacora na noqu lesa vei ira e na loma ni vanua ko Ijipita.

⁹ Ia kaʼu a cakacaka ga e na vuku ni yacaqu, me kakua ni vakacacani e matadra na veimatanitu, era sa tiko kina kei ira, kaʼu a vakatakilai au vei ira e matadra, niʼu a kauti ira mai na vanua ko Ijipita.

¹⁰ Ia kaʼu a kauti ira tani mai na vanua ko Ijipita, ka kauti ira ki na veikau.

¹¹ Au a solia talega vei ira na noqu vunau, kei na noqu lewa kaʼu a vakatakila vei ira, a ya ke cakava e dua na tamata, ke na bula kina.

¹² Ia na noqu siga tabu talega, kaʼu a solia vei ira, me noqui vakatakilakila vei ira, me ra kila ni sai au ko Jiova sa vakatabui ira.

¹³ Ia ka sa talaidredre vei au na mataqali nei Isireli mai na veikau; na noqu vunau era sa tawa muria, kei na noqu lewa era sa beca, a ya ke cakava e dua na tamata, ke na bula kina; ia na noqu siga tabu era sa vakacacana vakalevu: au a qai kaya, Au na sovaraka na noqu cudru vei ira e na veikau, me vakarusai ira.

¹⁴ Ia kaʼu a cakacaka ga e na vuku ni yacaqu, me kakua ni vakacacani e matadra na veimatanitu, kaʼu a kauti ira tani mai e matadra.

¹⁵ Ia koi au, kaʼu a laveta cake talega na ligaqu vei ira mai na veikau, meʼu kakua ni kauti ira ki na vanua kaʼu a solia, sa dave kina na wai-ni-sucu kei na oni, o qori nai ukuuku ni vanua kecega:

¹⁶ e na vuku ni noqu lewa ni ra sa beca, kei na noqu vunau ni ra tawa muria, kei na noqu siga tabu ni ra vakacacana: ni sa nodra matakau sa muri ga kina na lomadra.

¹⁷ Ta ka sa vosoti ira na mataqu meʼu kakua ni vakarusai ira, kaʼu a sega kina ni vakaoti ira mai na veikau.

¹⁸ Ia kaʼu a kaya vei ira na luvedra e na veikau, Na nodra vunau na nomudou qase dou kakua ni muria, kei na nodra lewa kakua ni vakabauta, kei na nodra matakau kakua ni vakadukadukalitaki kemudou kina:

¹⁹ oi au ko Jiova na nomudou Kalou; a noqu vunau mo dou muria, kei na noqu lewa dou vakabauta, ka cakava;

²⁰ kei na noqu siga tabu dou vakatabuya; ia ena noqui vakatakilakila o qori vei kemudou, mo dou kila ni sai au ko Jiova na nomudou Kalou.

²¹ Ia ka sa talaidredre vei au ko ira na luvedra: a noqu vunau ka ra tawa muria, kei na noqu lewa ka ra tawa vakabauta, me cakava, a ya ke cakava e dua na tamata, ke na bula kina; a noqu siga tabu ka ra vakacacana; au a qai kaya, Au na sovaraka na noqu cudru vei ira, me vakayacora na noqu cudru vei ira e na veikau.

²² Ia kaʼu a vakasuka ga na ligaqu, ka cakacaka e na vuku ni yacaqu, me kakua ni vakacacani e matadra na veimatanitu, kaʼu a kauti ira tani mai e matadra.

²³ Au a laveta cake talega na ligaqu vei ira e na veikau, meʼu dui vakasevi ira ki na veimatanitu, ka duibiubiuti ira ki na veivanua;

²⁴ e na vuku ni noqu lewa ni ra tawa cakava, kei na noqu vunau ni ra beca, kei na noqu siga tabu ni ra vakacacana, kei na matakau ni nodra qase ni sa gole ga kina na matadra.

²⁵ O koya o qo kaʼu a solia kina vei ira na vunau sa sega ni vinaka, kei na lewa era na sega ni bula kina;

²⁶ ia kaʼu a vakacacani ira e na nodrai solisoli, ni ra sa vakalakova kecega na ulumatua ki loma ni buka, meʼu vakacacataki ira, me ra kila kina ni sai au ko Jiova.

²⁷ O koya o qo mo vosa kina, na luve ni tamata, ki na mataqali nei Isireli, ka kaya vei ira, Sa vosa vakaoqo na Turaga ko Jiova; A ka talega o qo era sa vosavakacacataki au kina ko ira na nomudou qase, ni ra sa talaidredre vakalevu vei au.

²⁸ Ia niʼu a kauti ira ki na vanua, a ya kaʼu a laveta cake na ligaqu meʼu solia vei ira, era sa qai raica na veiulu-ni-koro cecere kecega, kei na kau rugurugua kecega, a ra vakacabora maikea na nodrai soro, ka cabora maikea na nodrai madrali e veivakacudrui: a ra sa tauca maikea na nodra ka boi vinaka, ka sova maikea na nodrai sevu.

²⁹ Au a qai kaya vei ira, A cava na yasana cecere o qo dou sa lakova? A sa vakatokai na yacana Ko Pama [na yasana cecere] ka yacova na siga o qo.

³⁰ O koya o qo mo kaya kina ki na mataqali nei Isireli, Sa vosa vakaoqo na Turaga ko Jiova; E na nodrai valavala na nomudou qase dou sa vakadukadukalitaki talega kina, ne? a nodra ka vakasisila talega ni dou muria dou sa ia kaya tale na veibutakoci, ne?

³¹ Ka ni dou sa cabora na nomudoui solisoli, ni dou vakalakovi ira na luvemudou ki loma ni buka, dou sa vakadukadukalitaki e na nomudou matakau kecega, ka yacova sara na siga o qo: ia meʼu tarogi li koi au vei kemudou, na mataqali nei Isireli? Me vaka na dina ni noqu bula, sa kaya na Turaga ko Jiova, au na sega ni tarogi vei kemudou.

³² Ia na ka sa tubu e na lomamudou ena sega sara ni yaco, ni dou sa kaya, Keimami na vakataki ira na lewe ni veimatanitu, kei na veimataqali ni veivanua me qarava na kau kei na vatu.

³³ Me vaka na dina ni noqu bula, sa kaya na Turaga ko Jiova, e dina ni sa liga kaukauwa, kei na liga e dodo yani, kei na cudru e sovaraki, kaʼu na lewai kemudou kina:

³⁴ ia kaʼu na kauti kemudou tani mai na veimataqali, ka vakasoqoni kemudou mai na veivanua dou sa dui vakasevi kina, e na liga kaukauwa, kei na liga e dodo yani, kei na cudru e sovaraki.

³⁵ Ia kaʼu na kauti kemudou ki na veikau ni veimataqali, ka ia na veilewai kei kemudou maikea e na matanavotu.

³⁶ Me vaka niʼu a ia na veilewai kei ira na nomudou qase e na veikau mai na vanua ko Ijipita, kaʼu na ia vakakina na veilewai kei kemudou, sa kaya na Turaga ko Jiova.

³⁷ Ia kaʼu na vakalakovi kemudou e ruku ni titoko, ka kauti kemudou mai me vauci e na veiyalayalati:

³⁸ ia kaʼu na tawasei ira tani vei kemudou na dauvuki, kei ira sa talaidredre vei au: a vanua era sa dui tiko vulagi kina kaʼu na kauti ira tani maikina, ia na vanua nei Isireli era na tawa curuma: ia dou na kila ni sai au ko Jiova.

³⁹ Ia koi kemudou, na mataqali nei Isireli, sa kaya vakaoqo na Turaga ko Jiova; Dou dui laʼki muria yadua ga na nona matakau, maimuri talega, kevaka dou na tawa vakarorogo vei au: ia na yacaqu tabu dou kakua so ni vakacacana tale e na nomudoui solisoli, kei na nomudou matakau.

⁴⁰ Ia mai na noqu ulu-ni-vanua tabu, mai na ulu-ni-vanua cecere nei Isireli, sa kaya na Turaga ko Jiova, maikea era na qaravi au kece na mataqali nei Isireli, ko ira kecega na lewe ni vanua: maikea kaʼu na vinakati ira, maikea talega kaʼu na taroga na nomudoui madrali, kei nai sevu ni nomudoui cabocabo, kei na nomudou ka tabu kecega.

⁴¹ E na nomudoui madrali boi vinaka kaʼu na vinakati kemudou, niʼu na kauti kemudou maivei ira na veimataqali, ka vakasoqoni kemudou mai na veivanua dou a dui vakasevi kina; ia kaʼu na vakarokorokotaki vei kemudou e matadra na veimatanitu.

⁴² Ia dou na kila ni sai au ko Jiova, niʼu na kauti kemudou ki na vanua nei Isireli, ki na vanua kaʼu a laveta cake na ligaqu me solia vei ira na nomudou qase.

⁴³ Ia dou na nanuma maikea na nomudoui valavala, kei na nomudou cakacaka kecega, dou sa vakadukadukalitaki kina; ia dou na vakasisilataki kemudou e na matamudou e na vuku ni nomudou ca kecega dou sa kitaka.

⁴⁴ Ia dou na kila ni sai au ko Jiova, niʼu sa qai cakacaka; vei kemudou e na vuku ni yacaqu, ka sega ni vaka na nomudou sala ca, kei na nomudoui valavala velavela, oi kemudou na mataqali nei Isireli, sa kaya na Turaga ko Jiova.

⁴⁵ A SA yaco vei au na vosa i Jiova, ka vaka,

⁴⁶ Na luve ni tamata, mo vaqara na matamu ki na mata ni ceva, ka vakatauca na nomu vosa ki na ceva, ka parofisaitaka na kena na veikau mai na vanua vakaceva;

⁴⁷ ka kaya ki na veikau mai na ceva, Mo rogoca na vosa i Jiova; Sa vosa vakaoqo na Turaga ko Jiova; Raica, au na tutuvaka na buka vei iko, ia ena katia na kau bulabula kecega vei iko, kei na kau malai kecega vei iko, ena sega ni bokoci na yameyame ni buka caucaudre, ia ena katia na mata kece mai na ceva ka yacova na tokalau.

⁴⁸ A ra na raica na tamata kecega ni sai au ko Jiova sa tutuvaka: ena sega talega ni bokoci.

⁴⁹ Au a qai kaya, Ule, Turaga Jiova! era sa vosataki au, ka kaya, Sa vosa e na vosa vakatautauvata ko koya o qo se segai?