Isikeli 19 - AI VOLA TABU

Sa lelevaki ira na luve ni tui, e na vosa vakatautauvata ni laioni cauravou sa rawai e nai keli, 1-9; sa lelevaki talega ko Jerusalemi, e na vosa vakatautauvata ni vaini sa malai, 10-14.

¹ IA ko iko, mo taurivaka na lele e na vukudra na turaga ni Isireli,

² ka kaya, A cava na tinamu? A laioni alewa: e na kedra maliwa na laioni sa koto ko koya, e na kedra maliwa na luve ni laioni sa susuga na luvena.

³ A sa susuga e dua na luvena: sa tubu me laioni cauravou, a sa vakavulici me cova na kena; a tamata sa kania ko koya.

⁴ A sa rogoca kina na veivanua; ia e na nodrai keli sa rawai kina, a ra sa kauti koya ni sa vesuki ki na vanua ko Ijipita.

⁵ Ia ni sa raica na laioni alewa ni sa wawa tiko ko koya, ka sa yali na ka e namaka, sa qai kauta e dua tale na luvena, ka cakavi koya me laioni cauravou.

⁶ A sa veilakoyaki tu e na kedra maliwa na laioni, ka yaco me dua na laioni cauravou, ka sa vakavulici me cova na kena, na tamata sa kania ko koya.

⁷ A sa kunea ko koya na nodra vale vakaturaga e lala, a sa vakalalataka na nodra veikoro; a sa rusa na vanua, kei na ka sa sinai kina, e na vuku ni domo ni nona tagi.

⁸ Sa qai mai vala kaya na veimatanitu e na veiyasana mai na veiqali, ka tevuka vua na nodra lawa: ia e na nodrai keli sa rawai kina.

⁹ A ra sa sogolati koya ni sa vesuki, ka kauti koya vei tui Papiloni: era kauti koya ki na dua na koro kaukauwa, me kakua ni rogo tale na domona e na veiulu-ni-vanua nei Isireli.

¹⁰ A tinamu, e vaka na vaini e na nomu dra, sa tei e na bati ni wai: sa vuavua ka vakadrauna sara e na vuku ni wai e levu.

¹¹ A sa vakatabana kaukauwa me nodra matanakilagi era ia na lewa, a sa cecere vakaidina ko koya e loma ni taba ni kau rugurugua, a sa raici vakacecere ko koya ni sa vuqa na tabana.

¹² Ia ka sa cavuivuvu ko koya e na cudru, sa biuti sobu ki na qele, ia na cagi mai cake sa vakamalaitaka na vuana: sa ramusu ka malai na tabana kaukauwa; sa katia na buka.

¹³ Ia sa qai tei ko koya e na veikau, e na vanua mamaca ka viagunu.

¹⁴ Asa lako tani na buka mai na dua na taba lailai ni tabana, a sa katia na vuana, a sa qai sega kina na tabana kaukauwa me matanakilagi me ia na lewa. Sa vakaoqo na lele, ia ena yaco me ka e lelevaki.