Isikeli 16 - AI VOLA TABU

Sa tukuni e na vosa vakatautauvata na nodrai tubutubu ca na kai Jerusalemi, 1-5, kei na loloma ni Kalou tei ira, 6-14, kei na nodra saumaki ki na kalou lasu kei nai valavala ca, 15-34, kei na nodra cudruvi vakalevu, 35-43, e na vuku ni sa uasivi cake na nodrai valavala ca, 44-59. Era na lomani tale emuri, 60-63.

¹ A SA yaco tale vei au na vosa i Jiova, ka vaka,

² Na luve ni tamata, mo vakatakila ki Jerusalemi na nonai valavala vakasisila,

³ ka kaya, Sa vosa vakaoqo na Turaga ko Jiova ki Jerusalemi; A nomui tubutubu kei na nomu sucu sa vu mai na vanua ko Kenani; sa tamamu na luve i Amori, ia na tinamu na luve i Eci.

⁴ Ia na nomu sucu, e na siga ko a sucu kina sa sega ni druti na nomu vicovico, e na wai talega ko a sega ni vui kina mo savasava, o sa sega sara talega ni cakavi e na wai tui, sa sega sara talega ni viviraki vei iko nai sulu ni gone.

⁵ Sa sega na mata e lomani iko, me cakava vei iko e dua na ka vakaoqo, me sa yalovinaka vei iko; ia ko a biuti tani ga ki nai bili ni koro, ni ko sa vakasisilataki, e na siga ko a sucu kina.

⁶ Ia niʼu a lako voli yani vei iko, ka raici iko ni ko sa buturaki tu e na nomu dra, kaʼu a kaya vei iko ni ko koto e na nomu dra, Mo bula; io kaʼu a kaya vei iko ni ko koto e na nomu dra, Mo bula.

⁷ Au a cakavi iko me lewe oba wale me vaka na buroro ni vanua, ia ko sa tubu cake mai me levu, ka sa vakaiukuukutaki vakaidina; a sucumu sa levu vinaka mai, kei na drau ni ulumu sa tubu sara, ia ko a luvawale ga ka tawa vakaisulu.

⁸ Ia niʼu a lako voli yani vei iko, ka raici iko, raica, sa qai nomu gauna na gauna loloma; ia kaʼu a tevuka yani na noqui tutuvi vei iko, ka vakaisulutaki iko: io, kaʼu a vosavavakini vei iko, ka ia na veiyalayalati kei iko, sa kaya na Turaga ko Jiova, ia ko a yaco me noqu.

⁹ Au a qai vui iko e na wai; ia kaʼu a savataka tani vei iko na nomu dra, ka lumuti iko e nai lumu;

¹⁰ ka vakaisulutaki iko e nai sulu e veivolavolai, ka vakaivavataki iko e na kuli ni koti, ka vauca vei iko na malo matailalai, ka puloutaki iko e na pulou dredre sara;

¹¹ au a vakaiukuukutaki iko talega, ka daramaka na qato ki na ligamu, ka vakaitaubetaka na domomu;

¹² ka vakaiukuukutaki iko e na mama ni ucu, kei na mama ni daliga, ka vakaisalataka vakaiukuuku na ulumu.

¹³ Ia ko a vakaiukuukutaki e na koula kei na siliva; ia ka nomui sulu na malo matailalai, kei nai sulu dredre sara, kei na ka e veivolavolai; sa madrai witi, kei na oni, kei na lolo, ko sa kania: ia ko sa matavinaka vakalevu sara mai, ka sa yaco me matanitu.

¹⁴ A sa rogo yani na yacamu ki na veimatanitu e na vuku ni nomu matavinaka: ni sa lagilagi sara e na vuku ni noqui ukuuku, kaʼu a solia vei iko, sa kaya na Turaga ko Jiova.

¹⁵ Ia ko a vakararavi ga e na nomu matavinaka, ka sa ia na dauyatagane e na vuku ni kemui rogo, ka dui sovaraka na nomu dauyatagane vei ira kecega sa lako voli yani, me dui nodra kina.

¹⁶ Ia ko a kauta e so na nomui sulu, ka cakava na nomu veiyasana cecere e na ka e veivolavolai, ka sa ia kina na dauyatagane: e sa sega na ka me vakakina, ena segasega talega.

¹⁷ Ia ko a kauta na nomui yaya vakaiukuuku, na noqu koula kei na noqu siliva, kaʼu a solia vei iko, ka sa cakava kina na nomui vakatakarakara ni tagane, ka ia kaya na dauyatagane,

¹⁸ ka sa kauta na nomui sulu e veivolavolai, ka vakaisulutaki ira: ia na noqu waiwai kei na noqu ka boi vinaka ko sa tauca e matadra:

¹⁹ a noqu kakana talega kaʼu a solia vei iko, na madrai witi, kei na lolo, kei na oni, kaʼu a vakani iko kina, ko sa tauca tale e matadra me ka boi vinaka: io sa vaka ga kina, sa kaya na Turaga ko Jiova.

²⁰ Ia ko a kauta talega na luvemu tagane kei na luvemu alewa, o ira ko a vakasucuma vei au, ka sa vakacabori ira vei ira me kania. Sa ka lailai beka o qo e na nomu dauyatagane,

²¹ ni ko sa vakamatei ira na luvequ, ka soli ira me vakalakovi ki na loma ni buka me kedra?

²² Ia e na nomui valavala vakasisila kecega kei na nomu dauyatagane ko sa sega ni nanuma na gauna ko a gone kina, ka luvawale ka tawa vakaisulu, ka buturaki tu e na nomu dra.

²³ A sa yaco ni sa caka oti na nomui valavala ca kecega, (ena ca, ena ca ko iko! sa kaya na Turaga ko Jiova;)

²⁴ ko sa qai tara na nomu bure cecere, ka cakava na nomu yasana cecere e nai saqata ni koro kecega.

²⁵ E na mua ni sala kecega ko sa tara na nomu yasana cecere, ka cakava na nomu matavinaka me cati, ka dalaga sara na yavamu vei ira yadua sa lako voli yani, ka vakalevutaka na nomu dauyatagane.

²⁶ Ia ko a ia na dauyatagane kei ira na gone ni Ijipita na wekamu yagolevu; ka sa vakalevutaka na nomu dauyatagane, me vakacudrui au.

²⁷ Ia raica, au a dodoka yani kina na ligaqu vei iko, ka vakalailaitaka na kemu kakana, ka soli iko ki na nodra veitalia na gonealewa ni Filisitia era cati iko, ka maduataka sara na nomui valavala ca.

²⁸ O sa ia talega na dauyatagane kei ira na gone ni Asiria, ka sega ga ni ko mamau kina; io, ko sa ia na dauyatagane kei ira, ka sega ga ni ko mamau kina.

²⁹ Ia ko sa vakalevutaka na nomu dauyatagane e na vanua ko Kenani ka yacovi Kalitea; ka sega talega ni ko mamau kina.

³⁰ Na nomu yalowai vakaidina, sa kaya na Turaga ko Jiova, ka ni ko sa cakava na ka kece o qo, sai valavala ni alewa dauyatagane e yalolevu;

³¹ ni ko sa tara na nomu bure cecere e na mua ni sala kecega, ia na nomu yasana cecere ko sa cakava e nai saqata ni koro kecega; ia ko a sega ni vakataki koya na alewa dauyatagane, ka ni ko beca ga nai soli;

³² me vakai koya ga na alewa dauveibutakoci sa vakabauta na kai tani mei sosomi kei watina!

³³ Vei ira kecega na dauyatagane era sa dausolia nai soli: ia ko iko, ko sa solia na nomui soli vei ira kecega na nomui tau, ka voli ira, me ra lako mai vei iko mai na veiyasana kecega mo ra ia na veibutakoci kei iko.

³⁴ A sa cakacaka vakatani ko iko e na nomu dauyatagane vei ira na alewa tani, ni sa sega e dua sa muri iko me ia na veibutakoci: ni ko sa solia talega nai soli, ia nai soli sa tawa soli vei iko, ia ko sa cakacaka vakatani kina.

³⁵ O koya o qo, ko iko na dauyatagane, mo rogoca kina na vosa i Jiova:

³⁶ Sa vosa vakaoqo na Turaga ko Jiova; E na vuku ni sa sovaraki na nomu ka velavela, ka vakaraitaki na nomu luvawale e na nomu dauyatagane kei ira na nomui tau, kei na nomu matakau kecega ko sa vakasisila kina, kei na vuku ni kedra dra na luvemu, a ya ko a sorovi ira kina;

³⁷ raica, au na vakasoqoni ira kece kina na nomui tau, dou a veiriti kei ira, kei ira kece ko sa lomana, kei ira kece vata talega ko sa cata; io, kaʼu na vakasoqoni ira vakaca vei iko mai na veiyasana, ka vakaraitaka vei ira na nomu luvawale, me ra kunea kecega na nomu luvawale.

³⁸ Ia kaʼu na lewai iko e na kedra veilewai era dauyatagane ka vakadavea na dra; kaʼu na solia; vei iko na dra e na cudru kei na vuvu:

³⁹ kaʼu na soli iko talega ki na ligadra, a ra na talaraka sobu na nomu bure cecere, ka basuka sobu na nomu veiyasana cecere: a ra na luvata tani vei iko na nomui sulu, ka kauta tani na nomui yaya vakaiukuuku, ka laivi iko yani mo luvawale ka tawa vakaisulu:

⁴⁰ a ra na kauta cake mai na kemui valu, a ra na viriki iko e na vatu, ka laubasikataki iko e na nodrai seleiwau:

⁴¹ a ra na vakama na nomu veivale e na buka, ka ia na veicudruvi vei iko e matadra na alewa e lewe vuqa: ia kaʼu na vakaotia tani na nomu dauia na dauyatagane, ia nai voli talega ko na sega ni solia tale.

⁴² Ia kaʼu na vakaceguya na noqu cudru vei iko, ena lako tani talega vei iko na noqu vuvu, ia kaʼu na cegu, ka sega ni cudru tale.

⁴³ E na vuku ni ko sa sega ni vakananuma na gauna ko a gone kina, ka sa vakararawataki au tikoga e na ka kece o qo; io koi au, raica, kaʼu na sauma kina na nomui valavala ki na ulumu, sa kaya na Turaga ko Jiova: ia ko na tawa cakava tiko na ca o qo mei kuri ni nomui valavala vakasisila kecega.

⁴⁴ Raica, o ira kece era taurivaka nai bole era na taurivaka na kemui bole o qo, ka kaya, Sa tautauvata ga koi rau na veitinani alewa.

⁴⁵ Sai iko na luve ni tinamu, ka biuta na watina kei na luvena; sai iko talega dou veitacini kei tacimu, era biuta na watidra kei na luvedra: sa tinamu na luve i Eci, sa tamamu talega na luve i Amori.

⁴⁶ Sa tuakamu talega ko Samaria, ko koya kei na luvena alewa era tiko ki na kemui mawi: a sa tacimu, e tiko ki na kemui matau, ko Sotoma kei ira na luvena alewa.

⁴⁷ Ia sa sega ni nodrai valavala ko sa muria, se me vaka na nodrai valavala vakasisila ko sa cakava: ia ka vaka sa ka lailai ga ko ya, ko sa vakacacataki iko vakalevu e na nomui valavala kecega ka vakalailai ko ira.

⁴⁸ Me vaka na dina ni noqu bula, sa kaya na Turaga ko Jiova, sa sega ni cakava ko Sotoma na tacimu, se ko koya se ko ira na luvena alewa, me vaka na ka dou sa cakava, ko iko kei ira na luvemu alewa.

⁴⁹ Raica, o qo na caka cala i Sotoma na tacimu, na viavialevu, kei na daumamau e na kakana, kei na dautiko vakacegu wale ka tu vua kei ira na luvena alewa, ia na ligadra na malumalumu kei na dravudravua sa sega ni vakaukauwataka ko koya.

⁵⁰ A ra viaviamarama talega, ka ra cakava na ka vakasisila e mataqu: o koya o qo kaʼu a kauti ira tani kina me vaka na ka kaʼu a raica.

⁵¹ Ia ko Samaria sai valavala ca ka sega ni tautauvata kei na dua na wase ni nomui valavala ca; ia ko sa vakalevutaka na nomui valavala vakasisila ka vakalailai ko ira, ka sa vakadonui ira na tacimu e na nomui valavala vakasisila kecega ko sa cakava.

⁵² Io ko iko talega, ko a daulewai ira na tuakamu, mo colata ko iko na nomu madua e na vuku ni nomui valavala ca e ko sa cakava me vakasisila vakalevu cake ki na nodra: era sa dodonu cake vei kemudou: io mo taqaya talega ko iko, ka colata na nomu madua, o na vuku ni ko sa vakadonui ira na tacimu.

⁵³ Niʼu na sa kauti ira tale mai era vakabobulataki, io ko Sotoma kei ira na luvena alewa era vakabobulataki, kei Samaria kei ira na luvena alewa era vakabobulataki, kaʼu na qai kauti ira tale mai na nomu bobula era sa vakabobulataki e na kedra maliwa:

⁵⁴ mo sa colata kina na nomu madua, ka vakataqayataki e na ka kecega ko sa cakava, e na vuku ni ko sa vakacegui ira.

⁵⁵ Ia na tacimu, ko Sotoma kei ira na luvena alewa, ni ra na lesu me mai tiko me vaka eliu, kei Samaria kei na luvena alewa, ni ra na lesu me mai tiko me vaka eliu, sai kemudou talega kei ira na luvemu alewa dou na qai lesu me mai tiko me vaka eliu.

⁵⁶ Ia na tacimu ko Sotoma sa sega ni rogo taki e na gusumu e na siga ni nomu viavialevu,

⁵⁷ ni sa bera ni vakaraitaki mai na nomu ca: me vaka e na gauna era vakarogocataki iko kina ko ira na gonealewa ni Siria, kei ira kece era tiko voliti koya, kei ira na gonealewa ni Filisitia, era beci iko mai na veiyasana:

⁵⁸ a nomui valavala ca kei na nomui valavala vakasisila, ko sa colata ga, sa kaya ko Jiova.

⁵⁹ Ni sa vosa vakaoqo na Turaga ko Jiova; Io kaʼu na cakacaka vei iko me vaka na ka ko sa cakava, ni ko sa beca na vosavavakini ka sa vakacacana na veiyalayalati.

⁶⁰ Ia kaʼu na nanuma koi au na noqu veiyalayalati kei iko e na gauna ko a gone kina, ka vakataudeitaka vei iko na veiyalayalati tawa mudu.

⁶¹ O na qai nanuma na nomui valavala, ka maduataka sara, ni ko na rawai ira na tacimu, ko ira e qase vei iko kei ira e gone vei iko: ia kaʼu na soli ira vei iko me luvemu alewa; ka sega e na nomu veiyalayalati.

⁶² Ia kaʼu na vakataudeitaka koi au na noqu veiyalayalati kei iko; io ko na kila ni sai au ko Jiova:

⁶³ mo sa nanuma kina, ka taqaya, ka sega ni rawa tale ni dalaga na gusumu e na vuku ni nomu madua, niʼu na sa ia na veivakadonui kei iko e na vuku ni ka kecega ko sa cakava, sa kaya na Turaga ko Jiova.