Isikeli 13 - AI VOLA TABU

Sa vunauci ko ira na parofita lasu e na vuku ni nodra vosa lasu, kei na nodra tawa yaga, kei na nodrai boro ca, 1-16. O ira talega na parofita alewa e na vuku ni nodra daurere, 17-23.

¹ A SA yaco vei au na vosa i Jiova, ka vaka,

² Na luve ni tamata, mo parofisaitaka na kedra na parofita vaka-Isireli era ia na parofisai, ia mo kaya vei ira era ia na parofisai sa vu ga mai lomadra, Dou rogoca na vosa i Jiova;

³ Sa vosa vakaoqo na Turaga ko Jiova; Ena ca ko ira na parofita lialia, era muria na yalodra ka sega na ka era raica!

⁴ Era sa vaka na fokise ni veikau ko ira na nomu parofita, Isireli.

⁵ Dou a sega ni cabe cake ki na tiki ni bai e basuki, se cakava na nodra bai ni were na mataqali nei Isireli mo dou tu mai ni sa ia nai valu e na si ga i Jiova.

⁶ Era sa raica na ka wale kei na vosa-mana lasu, ka kaya, Sa kaya ko Jiova: ia ko Jiova sa sega ni talai ira: a ra dau-cakavi ira na tamata me namaka me na vakadinadinataki na vosa.

⁷ Sa sega beka ni raivotu wale dou sa raica, kei na vosa-mana lasu dou sa cavuta, ka kaya, Sa kaya ko Jiova; ia koi au, kaʼu a sega ni vosa?

⁸ O koya o qo sa vosa vakaoqo kina na Turaga ko Jiova; E na vuku ni dou sa cavuta na ka wale, ka raica na ka lasu, ia, raica, sai au kina sa nomudou meca, sa kaya na Turaga ko Jiova.

⁹ Ia na ligaqu ena tauci ira na parofita era sa raica na ka wale, ka vosataka na vosa-mana lasu: e na nodrai soqosoqo na noqu tamata era na tawa tiko kina, e nai vola talega ni mataqali nei Isireli era na tawa volai kina, ki na vanua talega nei Isireli era na tawa curu kina; ia dou na kila ni sai au na Turaga ko Jiova.

¹⁰ E na vuku ni ka o qo, io, e na vuku ni ra sa vakacalai ira na noqu tamata, ka kaya, Na vakacegu; ka sa sega na vakacegu; ia e dua sa viria na bai vatu, ka, raica, e so tani tale era sa boroya e nai boro ca.

¹¹ Mo kaya vei ira era sa boroya e nai boro ca, Ena bale ga: ena tau bi mai na uca; ia koi kemudou, na uca-cevata lelevu, dou na lutu mai, ka dua na cava levu ena basuraka mai.

¹² Raica, ni sa bale mai na bai vatu, ena sega beka ni kainaki vei kemudou, Sa evei li nai boro dou a boroya kina?

¹³ O koya sa vosa vakaoqo kina na Turaga ko Jiova; Io kaʼu na basuraka e na cava levu e na noqu cudru: ia na uca tau bi ena yaco mai e na noqu lesa, kei na uca-cevata lelevu e na noqu cudru me kenai vakaoti:

¹⁴ ia kaʼu na basuka sobu na bai vatu dou sa boroya e nai boro ca, ka biuta sobu ki na qele, na kena yavu talega ena vakamiraka-ki, ena bale sara ga, dou na vakaoti vata kaya talega: ia dou na kila ni sai au ko Jiova.

¹⁵ Au na vakayacora vakaoqo na noqu cudru ki na bai vatu, vei ira talega era boroya e nai boro ca, kaʼu na kaya vei kemudou, A bai vatu sa sega, a ra sa sega talega era boroya;

¹⁶ io, ko ira na parofita vaka Isireli ka ra parofisaitaki Jerusalemi, ka raica na kena raivotu ni vakacegu, ka sa sega na vakacegu, sa kaya na Turaga ko Jiova.

¹⁷ Ia ko iko, na luve ni tamata, mo vaqara na matamu me ca ko ira na gonealewa ni kai nomu, era ia na parofisai mai na lomadra; ia mo parofisaitaki ira,

¹⁸ ka kaya, Sa vosa vakaoqo na Turaga ko Jiova, Ena ca ko ira na alewa era sa dauvauca nai lokoloko ki na duruduru-ni-liga kecega, ka cakava nai sala ni ulu vei ira nai tabayalewa kecega me vakasa yalo kaya! Mo dou vakasava li na yalodra na noqu tamata, ia na yalodra dou na Vakabula beka me nomudou?

¹⁹ Mo dou vosavakacacataki au beka talega vei ira na noqu tamata, me nomudou kina na parile e so e na qeteqete ni ligamudou ka so na kemudou tiki ni madrai, me kemudou sa vakamatea e so na yalo sa tawa dodonu me mate, ka Vakabula e so na yalo sa tawa dodonu me bula, ni dou lasutaki ira na noqu tamata era vakarorogo ki na ka lasu?

²⁰ O koya o qo sa vosa vakaoqo kina na Turaga ko Jiova; Raica, au sa cata na nomudoui lokoloko, dou sa vakasa yalo kaya maikea me tudaitaka, ia kaʼu na dresulaka tani mai na ligamudou, ka vakabula na yalo dou sa vakasava, na yalodra sa tudaitaki.

²¹ Au na dresuka talega na nomudoui sala, ka kaliraki ira na noqu tamata mai na ligamudou, a ra na sega ni tiko tale e na ligamudou me vakasavi; ia dou na kila ni sai au ko Jiova.

²² Ka ni dou a vakararawataka wale na lomana na yalododonu, ia koi au, kaʼu a sega ni vakararawataka; ka dou sa vakaukauwataka na ligana na tamata ca, me kakua ni lesu mai ko koya mai na nona sala ca, ni dou sa yalataka vua na bula:

²³ ia na ka wale, dou na sega kina ni raica tale; kei na ka mana lasu, dou na sega talega ni cakava: niʼu na kaliraki ira na noqu tamata mai na ligamudou: ia dou na kila ni sai au ko Jiova.