Isikeli 12 - AI VOLA TABU

Ni sa ia na toki ko Isikieli sa vakatakarakarataki kina na veivakabobulataki kei Sitikiya, 1-16. Ni sa sautaninini talega sa vakatakarakarataki kina na kedra ca na kai Jutia, 17-20. Era sa vunauci e na ruku ni nodra vosa vakaibalebale ca, 21-25. Ena vakayacori vakusakusa na raivotu, 26-28.

¹ A SA yaco vei au na vosa i Jiova, ka vaka,

² Na luve ni tamata, e na kedra maliwa na mataqali dautalaidredre ko sa tiko, era sa vakamatana me raica, ka sega ni raica; era sa vakadaligana me rogoca, ka sega ni rogoca: ni ra sa mataqali dautalaidredre.

³ Ia ko iko, na luve ni tamata, mo cakava na nomui yaya ni toki vakabobula, ka toki tani kei na siga e matadra: ia mo toki tani mai na nomu tikina ki na tikina tani e matadra: era mataqali dautalaidredre, ka ra na vakanananu beka ga.

⁴ Ia mo kauta kituba na nomui yaya kei na siga e matadra, me vaka nai yaya ni toki vakabobula: ia ko iko, mo lako tani e matadra kei na yakavi, me vaka na nodra lako tani na bobula.

⁵ Ni ra raica tiko, mo kelibasika na bai, ka kauta yani kina kituba.

⁶ Ni ra raica tiko, mo ia na colacola e domomu, ia ni sa yakavi mai, mo qai kauta tani: mo puloutaka na matamu, mo kakua ni raica na qele: niʼu sa cakavi iko mo kedrai vakatakilakila na mataqali nei Isireli.

⁷ Ia kaʼu a cakacaka vakaoqo me vaka niʼu sa vakaroti: a noqui yaya kaʼu a kauta kituba kei na siga, me vaka nai yaya ni toki vakabobula, ia e na yakavi, kaʼu a kelibasika na bai e na ligaqu; ni sa yakavi mai kaʼu a qai kauta yani, kaʼu a colata e domoqu e matadra.

⁸ Asa yaco vei au na vosa i Jiova e na sabogibogi, ka vaka,

⁹ Na luve ni tamata, era sa kaya vei iko, se sega, na mataqali nei Isireli, na mataqali dautalaidredre ko ya, A cava li ko sa cakava?

¹⁰ Mo kaya vei ira, Sa vosa vakaoqo na Turaga ko Jiova; Sa bale vua na tui mai Jerusalemi nai colacola o qo, vei ira kece talega na mataqali nei Isireli era tiko kaya.

¹¹ Mo kaya, Sai au na kemudoui vakatakilakila: me vaka na ka kaʼu sa cakava, ena caka vakakina vei ira: era na toki tani, era na lako vakabobula tani.

¹² Ia na tui sa tiko kei ira ena ia na colacola e domona e na yakavi, ka curu yani: na bai era na kelibasika, me kauta yani kina ko koya kituba: a matana ena puloutaka ko koya, me kakua ni raica na qele e na matana.

¹³ Ia kaʼu na tevuka na noqu lawa vua, ena coriti talega e na noqui cori: ia kaʼu na kauti koya ki Papiloni ki na nodra vanua na kai Kalitea; ena mate maikea ko koya, ia ena sega ga ni raica.

¹⁴ Ia ko ira kece era tiko kaya me vukei koya, kei ira kece na nonai valu, kaʼu na dui vakasevi ira ki na mata ni cagi kecega; ia nai seleiwau kaʼu na ucuna me muri ira.

¹⁵ A ra na kila ni sai au ko Jiova, niʼu sa dui vakasevi ira ki na veimatanitu, ka duibiubiuti ira ki na veivanua.

¹⁶ Ia kaʼu na vakavoca vei ira na tamata e lewe vica mai nai seleiwau, kei na dausiga, kei na mate dauveitauvi; me ra tukuna na nodrai valavala vakasisila kecega ki na veimatanitu era na dui yaco kina; a ra na kila ni sai au ko Jiova.

¹⁷ A sa yaco tale vei au na vosa i Jiova, ka vaka,

¹⁸ Na luve ni tamata, na kemu madrai mo kania e na sautaninini, kei na memu wai mo gunuva e na kidroa kei na nuiqawaqawa;

¹⁹ ka kaya vei ira na lewe ni vanua, Sa vosa vakaoqo na Turaga ko Jiova e na vukudra na lewe i Jerusalemi, kei na vanua ko Isireli; Na kedra madrai era na kania e na nuiqawaqawa, kei na medra wai era na gunuva e na domobula, me yali laivi mai na nodra vanua na ka kece sa sinai kina, e na vuku ni nodrai valavala kaukauwa kecega era tiko kina.

²⁰ Ia na veikoro tawa ena lala mai, ka rusa na vanua; ia dou na kila ni sai au ko Jiova.

²¹ A sa yaco vei au na vosa i Jiova, ka vaka,

²² Na luve ni tamata, a cava na vosa vakaibalebale ko ya vei kemudou e na vanua nei Isireli, ka vaka, Sa vakadedetaki na gauna, a sa sega na raivotu me yaco?

²³ O koya o qo mo tukuna kina vei ira, Sa vosa vakaoqo na Turaga ko Jiova; Au na muduka na vosa vakaibalebale ko ya, a ra na sega ni taurivaka tale me vosa vakaibalebale e Isireli; ia mo kaya ga vei ira, Sa voleka mai na gauna, kei nai vakadinadina ni raivotu kecega.

²⁴ Ni na sega tale na raivotu lasu se na vosa-mana veicavilaki vei ira na mataqali nei Isireli.

²⁵ Ni sai au ko Jiova kaʼu na vosa, ia na vosa kaʼu na vosataka ena yaco; ena sega ni vakadedetaki tale: e na nomudou gauna ga, na mataqali dautalaidredre, kaʼu na cavuta na vosa, ka vakayacora, sa kaya na Turaga ko Jiova.

²⁶ A sa yaco tale vei au na vosa i Jiova, ka vaka,

²⁷ Na luve ni tamata, raica, sa ra kaya na mataqali nei Isireli, A raivotu sa raica ko koya sa ka ga ni bogi vuqa, sa gauna vakayawa yani sa parofisaitaka ko koya.

²⁸ O koya o qo mo kaya kina vei ira, Sa vosa vakaoqo na Turaga ko Jiova; Ena sega ni vakadedetaki tale e dua na noqu vosa, ia na vosa kaʼu sa cavuta ena vakayacori mai, sa kaya na Turaga ko Jiova.