Isikeli 11 - AI VOLA TABU

A nodra vosa ca na turaga, kei na kena cudruvi, 1-12. Ni sa tagi kina ko Isikieli, sa tukuna vua ko Jiova ni na lomani ira era vakavoci, 13-20, ka cudruvi ira na tamata ca, 21. Ai ukuuku i Jiova, sa vakalaiva na koro, a sa kauti tale ki Kalitea ko Isikieli, 22-25.

¹ A SA laveti au cake na Yalo, ka kauti au ki na matamata-ni-koro ni vale i Jiova ki cake, o koya sa donuya na tu i cake: ka raica mai na matamata-ni-koro era lewe ruasagavulu ka lima na tamata; ia e na kedra maliwa kaʼu a raici Yeesaniya na luve i Asuri, kei Pilatiya na luve i Pinaya, erau sa turaga ni mataqali.

² A sa kaya vei au ko koya, Na luve ni tamata, sai rau na tamata o qo erau bosea na caka cala, ka vakavuvulitaka nai vakavuvuli ca e na koro o qo:

³ erau sa kaya, Sa sega ni voleka mai; me da tara vale ga: sa koro o qo na kuro, ia koi keda na lewena.

⁴ O koya o qo mo parofisaitaka kina na kedra, parofisaitaka ga, ko iko na luve ni tamata.

⁵ A sa tauci au mai na Yalo i Jiova, a sa kaya vei au, Mo kaya; Sa vosa vakaoqo ko Jiova; Dou a vosa vakaoqo, na mataqali nei Isireli: io na ka sa tubu e na lomamudou, kaʼu sa kila koi au na ka ko ya.

⁶ Dou sa vakavuqataka na nomudou vuetaki e na koro o qo, ka vakasinaita na kena sala e na moku.

⁷ O koya sa vosa vakaoqo kina na Turaga ko Jiova; A nomudou vuetaki e kemudou sa virikotora e lomana, sai ira na lewena, ia na kuro na koro o qo: ia koi kemudou, kaʼu na kauta tani mai lomana.

⁸ Sai seleiwau dou a rerevaka, ia nai seleiwau kaʼu na vakayacora vei kemudou, sa kaya na Turaga ko Jiova.

⁹ Ia kaʼu na kauti kemudou tani mai lomana, ka soli kemudou ki na ligadra na kai tani, ka cudruvi kemudou.

¹⁰ E nai seleiwau dou na bale kina; e nai yalayala ni Isireli kaʼu na lewai kemudou; ia dou na kila ni sai au ko Jiova.

¹¹ Na koro o qo, ena sega ni kemudou kuro, ia koi kemudou, dou na sega ni lewena e lomana; e nai yalayala ga ni Isireli kaʼu na lewai kemudou:

¹² ia dou na kila ni sai au ko Jiova: ni sa noqu vunau dou sa sega ni muria, kei na noqu lewa dou sa sega ni cakava, na nodra lewa ga na veimatanitu sa tiko voliti kemudou dou sa cakava.

¹³ A sa yaco, niʼu sa ia na parofisai, sa qai ciba ko Pilatiya na luve i Pinaya. Au sa qai bale vakatoboicu, ka tagi vakadomoilevu, ka kaya, Ule, Turaga Jiova! na kedra vakaoti sara na vo ni Isireli ko na qai cakava li?

¹⁴ A sa yaco tale vei au na vosa i Jiova, ka vaka,

¹⁵ Na luve ni tamata, sai ira na wekamu, io na wekamu, na kai nomu dina, kei ira kece sara na mataqali nei Isireli, sa ra kaya kina na lewe i Jerusalemi, Dou lako vakayawa tani vei Jiova: ia vei keimami ga sa soli kina na vanua o qo me taukena.

¹⁶ O koya o qo mo kaya kina, Sa vosa vakaoqo na Turaga ko Jiova; Keʼu sa biuti ira vakayawa tani ki na veimatanitu, ka dui vakasevi ira ki na veivanua, keʼu na yaco ga me nodra vale tabu lailai e na veivanua era na tadu kina.

¹⁷ 0 koya o qo mo kaya kina, Sa vosa vakaoqo na Turaga ko Jiova; Io kaʼu na kumuni kemudou maivei ira na veimataqali, ka vakasoqoni kemudou mai na veivanua dou sa dui vakasevi kina, ia kaʼu na solia vei kemudou na vanua ko Isireli.

¹⁸ A ra na yaco yani ki ke, ka kauta tani maikina na kena ka velavela kecega, kei na kena ka vakasisila kecega.

¹⁹ Ia kaʼu na solia vei ira na loma e dua bau, kei na yalo vou kaʼu na tugana ki na lomamudou; ia kaʼu na kauta tani na yalo vatu mai na lomadra, ka solia vei ira na yalo vakalewe:

²⁰ me na noqu vunau era muria, kei na noqu lewa era vakabauta, ka cakava: a ra na yaco me noqu tamata, ia koi au kaʼu na yaco me nodra Kalou.

²¹ Ia ko ira sa yalodra velavela kei na nodra ka vakasisila sa na lomadra ga me muria, sa nodrai valavala kaʼu na sauma ga ki na uludra, sa kaya na Turaga ko Jiova.

²² Ia na jerupi eratou sa qai laveta cake na tabadratou, kei na yava sa tu kei iratou; ia nai ukuuku ni Kalou nei Isireli sa donui iratou maicake:

²³ a sa lako cake tani nai ukuuku i Jiova mai na loma ni koro, ka tu ki na ulu-ni-koro mai na yasa ni koro ki cake.

²⁴ Ia na Yalo, sa qai laveti au cake, ka kauti au ki Kalitea, vei ira na bobula, e na raivotu e na Yalo ni Kalou. A sa lako cake tani vei au na raivotu kaʼu a raica.

²⁵ Au a qai tukuna vei ira na bobula na vosa kece i Jiova sa vakaraitaka vei au ko koya.