Isikeli 10 - AI VOLA TABU

A raivotu ni qilaiso ni buka waqa, me duibiubiuti ki dela ni koro, 1-7. A raivotu ni jerupi, 8-22.

¹ AU a qai vakasarava, ka, raica mai na maliwa o qori e dela ni uludratou na jerupi sa dua na ka e votu mai ka vaka na vatu safairi, ka rairai me vaka nai vakatakarakara ni tikotiko vakaturaga.

² A sa vosa ko koya ki na tamata sa vakaisulu e na malo, ka kaya, Mo curu yani ki na maliwa ni yava e ruku ni jerupi, ka vakasinaita na ligamu e na qilaiso ni buka waqa mai na kedratou maliwa na jerupi, ka duibiubiuta ki na dela ni koro. A sa curu yani e mataqu.

³ Ia na jerupi eratou sa tu e na yasa ni vale ki matau, ni sa curu yani na tamata; ia na o sa curuoso e na lomanibai eloma.

⁴ A sa lako cake mai nai ukuuku i Jiova mai na jerupi, ki dela ni lago ni vale; a sa curuoso na vale e na o, ia na lomanibai sa curuoso e nai serau ni ukuuku i Jiova.

⁵ Ia na domo ni tabadratou na jerupi sa rogo yani ki na lomanibai kisau, me vaka na domo ni Kalou Kaukauwa ni sa vosa ko koya.

⁶ A sa yaco, ni sa vakarota ko koya na tamata sa vakaisulu e na malo, ka kaya, Mo kauta na buka waqa mai na maliwa ni yava, mai na maliwa ni jerupi; sa qai curu yani ko koya, ka tu volekata na yava.

⁷ A sa dodoka na ligana e dua na jerupi mai na kedratou maliwa na jerupi ki na buka waqa e na maliwa ni jerupi, ka lavita, ka tauca ki na liga i koya sa vakaisulu e na malo: a sa taura ko koya, ka curu kitautuba.

⁸ A sa votu maivei iratou na jerupi, na ka sa vaka na liga ni tamata e ruku ni tabadratou.

⁹ Ia kaʼu sa vakasarava, ka raica e va na yava sa tu vata kei iratou na jerupi, e dua na yava sa tu vata kei na dua na jerupi, ka dua tale na yava sa tu kei na dua tale na jerupi: ia na kedratoui rairai na yava sa vaka na mata ni vatu perili.

¹⁰ Ia na kedratoui rairai, sa tautauvata vava, ka sa vaka e dua na yava e na veimama ni dua na yava.

¹¹ Ni ratou sa lako, eratou sa lako e na batidratou vava; eratou sa tawa veigoleyaki ni ratou sa lako, ia na yasana sa goleva na ulu i ratou eratou sa muri koya kina; eratou sa tawa veigoleyaki ni ratou sa lako.

¹² Ia na yagodratou taucoko, kei na dakudratou, kei na ligadratou, kei na tabadratou, kei na yava, sa vakamatana sara, ka volita talega na nodratou yava vava.

¹³ Ia vei iratou na yava sa kacivaki e daligaqu, Dou qiqi ga;

¹⁴ A sa tauyava na matadratou: sai matai ni mata na mata ni jerupi, sai karua ni mata na mata ni tamata, sa kenai katolu na mata ni laioni, ka kenai kava na mata ni ikeli.

¹⁵ A ratou sa laveti cake na jerupi. O qo na ka bula kaʼu a raica mai na uciwai ko Kipari.

¹⁶ Ia ni ratou sa lako na jerupi, sa lako kei na yava eratou tu vata: ni sa vakate tabadratou na jerupi me vuka cake tani mai vuravura, sa sega ni vuki tani na yava talega ko ya vei iratou.

¹⁷ Ni sa tu o qori, sa tu o qo; ni sa laveti cake o qori, sa laveti cake talega o qo: ni sa yalo ni ka bula sa tiko kina.

¹⁸ Sa qai lako tani nai ukuuku i Jiova mai nai lago ni vale, ka tu ki dela ni jerupi.

¹⁹ A ratou sa laveta cake na tabadratou na jerupi, a sa mani cecere ki vuravura e mataqu: ni ratou sa lako yani, na yava talega sa lako kei iratou, a ratou sa laʼki tu ki na matamata-ni-koro ni vale i Jiova kivakaki cake; ia nai ukuuku ni Kalou nei Isireli sa donui iratou maicake.

²⁰ O qo na ka bula kaʼu a raica e ruku i koya na Kalou nei Isireli mai na uciwai ko Kipari; ia kaʼu a kila ni sai iratou o qo na jerupi.

²¹ Sa tauyava na matadratou, ka tauyava na tabadratou; a sa dua na ka e vaka na liga ni tamata e ruku ni tabadratou.

²² Ia nai tovo ni matadratou sa matadratou ga ko ya kaʼu a raica mai na uciwai ko Kipari, na kedratoui rairai talega kei iratou dina: eratou sa dui lako vakadodonu ga kiliu.