Isikeli 1 - AI VOLA TABU

A WASE I. —A gauna ni parofisai i Isikieli mai na uciwai ko Kipari, 1-3. A raivotu ni Jerupi e va, 4-14, kei na yava vakavale-vodoki e va, 15-25, kei nai ukuuku ni Kalou, 26-28.

¹ A SA yaco e nai katolusagavulu ni yabaki, e nai kava ni vula, e nai kalima ni siga ni vula, niʼu sa tiko kei ira na bobula mai na uciwai ko Kipari, sa qai wase rua mai na lomalagi, ia kaʼu sa raica na raivotu ni Kalou.

² E nai kalima ni siga ni vula, sai koya nai kalima ni nona yabaki ni vakabobulataki ko Jioiakini na tui,

³ sa qai yaco sara mai na vosa i Jiova vei Isikieli na bete, na luve i Pusi, e na nodra vanua na kai Kalitea mai na uciwai ko Kipari; a sa tiko vua maikea na liga i Jiova.

⁴ Ia kaʼu sa vakasarava, ka, raica, e dua na covulaca sa lako mai na tokalau, ka dua na o levu, ka dua na buka waqa sa vei-katikati tu vakai koya, ka sa caudre volita, a sa vaka na parasa matavinaka ka tu mai lomana, mai na loma ni buka.

⁵ Ia mai lomana, sa vaka na ka bula e va e raici mai. A sa vakaoqo na kedratoui rairai; eratou sa dui raici vakatamata.

⁶ A sa tauyava na matadratou, ka tauyava na tabadratou.

⁷ Ia na yavadratou, sa yava dodonu; kei na qeteqete ni yavadratou, sa tautauvata kei na qeteqete ni luve ni karavau: a sa cila tu me vaka na parasa sa solo ti.

⁸ A sa vaka na liga ni tamata ka raici tu e ruku ni dui tabadratou e na dui sarisaridratou e va; a sa dui vakamatana ka dui vakatabana ko iratou na lewe va o qo.

⁹ A sa dui veiuturi na tabadratou; eratou sa tawa veigoleyaki ni ratou sa lako; eratou sa dui lako vakadodonu yani ga.

¹⁰ Io nai tovo ni matadratou, eratou sa dui mata vakatamata, ka dui mata vakalaioni, ki matau, ko iratou vava: a ratou sa dui mata vakakaravau, ki mawi, ko iratou vava; a ratou sa dui mata vakaikeli ko iratou vava.

¹¹ Sa vakaoqo na matadratou: ia na tabadratou, sa tawase kicake; e dui yarua na tabadratou sa dui veiuturi, ka dui yarua sa dui ubia na yagodratou.

¹² A ratou sa dui lako vakadodonu yani ga: a vanua sa lako yani kina na yalo, eratou sa dui lako yani ga kina; eratou sa tawa veigoleyaki ni ratou sa lako,

¹³ Ia na kedratoui rairai na ka bula, eratou sa raici me vaka na qilaiso ni buka sa waqa tu, ka vaka na cina sa caudre: sa veilakoyaki tu e na kedratou maliwa na ka bula; a sa caudre tu na buka, ia mai na loma ni buka sa tibi mai na livaliva.

¹⁴ Ia ko iratou na ka bula, eratou sa veiciciyaki tu ka raici me vaka na liva ni sa tibi mai.

¹⁵ Ia niʼu sa vakaraica na ka bula, raica, sa veidui na nodratou yava vakavale-vodoki ka tu e dela ni vanua ka tu vata kei iratou na ka bula, eratou dui yava na matadratou.

¹⁶ A kedratoui rairai na yava kei na kedratoui valavala sa vaka na mata ni vatu perili: a sai tovo vata vava: ia na kedratoui rairai kei na kedratoui valavala sa vaka e dua na yava e na veimama ni dua na yava.

¹⁷ Ni ratou sa lako, sa lako e batidratou vava; a ratou sa tawa veivukiyaki ni sa lako.

¹⁸ Ia na batidratou, ni sa cecere sa ka rerevaki sara; ia na batidratou vava sa dui vuqa sara kina na matadratou e na veitikina.

¹⁹ Ia ni sa lako na ka bula, sa dui lako kei na yava sa dui tu vata kei iratou: ni sa; laveti cake mai vanua na ka bula, sa laveti cake kei na yava talega.

²⁰ A vanua sa lomana na yalo me lako kina, eratou sa lako kina, io kikea sa lako ga kina na yalodratou; ia na yava sa dui laveti cake kei iratou: ni sa yalo ga ni ka bula sa tiko e na yava.

²¹ Ni sa lako o qori, sa qai lako o qo; ni sa tu o qori, sa qai tu o qo; ni sa laveti cake mai vanua o qori, sa qai laveti cake kei na yava sa dui tu kei iratou: ni sa yalo ga ni ka bula sa tiko e na yava.

²² Ia na maliwa e dela ni uludratou na ka bula, sa rairai me vaka na mata ni wai-cevata e rerevaki, sa tevuki yani e dela ni uludratou kicake.

²³ Ia na tabadratou e ruku ni maliwa, sa te dodonu, ka dui veiqaravi: sa tauyarua eratou dui ubia kina na yagodratou vaka, ka tauyarua eratou dui ubia kina vaka.

²⁴ Ia kaʼu sa rogoca na domo ni tabadratou, ka sa vaka na domo ni wai levu, ka vaka na domo i Koya sa Kaukauwa: ni ratou sa lako, sa dua na domo ni vosa, me vaka na domo ni valu: ni ratou sa tu, eratou sa uruca na tabadratou.

²⁵ A sa dua na domo mai na maliwa e dela ni uludratou, ni ratou sa tu, ka uruca na tabadratou.

²⁶ Ia e dela ni maliwa mai dela ni uludratou ka rairai me vaka na vatu safairi sa dua nai vakatakarakara ni tikotiko vakaturaga: ia e dela ni vakatakarakara ni tikotiko vakaturaga sa vaka e dua na tamata e rairai tu e cake e delana.

²⁷ Ia kaʼu a raica ka sa vaka na mata ni parasa matavinaka, ka rairai me vaka sa kena vale e na veiyasana na buka waqa, mai na ka sa rairai me vaka sa tolona ka laʼko kicake, ka mai na ka sa rairai me vaka sa tolona ka laʼko sobu, kaʼu a raica ka sa rairai me vaka sa buka waqa, a sa serau tu e na veiyasana.

²⁸ Me vaka na kenai rairai na drodrolagi e na o e na siga ni uca, sa vakakina na; kenai serau e na veiyasana. Sa vakaoqo na raivotu ni vakatakarakara ni ukuuku i Jiova. Ia niʼu sa raica, kaʼu sa bale vakatoboicu, ka rogoca na domona e dua sa vosa mai.