Iperiu 8 - AI VOLA TABU

Sa tukuna ko koya ni sa yaco ko Jisu me noda Bete Levu, a sa oti na kenai vakatakarakara sa kitaka eliu ko ira na Jiu, asa uasivi cake sara na cakacaka i Karisito, 1-13.

¹ IA sa kena levu ni veika sa vosataki oti: Sa vakaoqo na noda bete levu, sa tiko e na liga i matau ni tikotiko i Koya sa levu mai lomalagi;

² ai talatala e na tikina tabu, kei na vale tabu dina, sa sega ni tara na tamata, o koya ga na Turaga.

³ Ni ra sa lesi kecega na bete levu me vakacabora nai madrali kei nai soro: o koya o qo sa dodonu talega kina vei koya o qo me dua na ka me vakacabora.

⁴ Ia kevaka sa tiko ga e vuravura ko koya, ena fcega ni bete, ni sa so na bete sa vakacabora nai madrali me vaka na vunau:

⁵ o ira sa kitaka nai vakatakarakara kei na yaloyalo ni veika vakalomalagi, me vaka sa vakatakila vei Mosese ko na Kalou ni sa voleka ni tara na vale tabu: ka kaya, Raica, mo cakava na ka kecega me tautauvata kei na kenai vakatakarakara ka vakatakilai vei iko e na ulu-ni-vanua.

⁶ Sa qai nona na cakacaka vakabete e uasivi cake, me vaka ni sa dautataro talega ko koya e na dua na veiyalayalati e uasivi cake, o koya sa vakataudeitaki e na vosa ni yalayala e uasivi cake.

⁷ Kevaka sa tawa ca o qori sa taumada, e sega tale ni vakasaqarai e dua tani.

⁸ Ia ni sa sega ni vinakata, sa kaya ko koya, Sa vosa ko Jiova, ena yaco na siga, kaʼu na cakava kina na veiyalayalati vou vei ira na mataqali nei Isireli kei na mataqali nei Juta:

⁹ ena sega ni vaka na veiyalayalati kaʼu a cakava vei ira na nodra qase e na siga kaʼu a taura kina na ligadra me tuberi ira mai na vanua ko Ijipita; ni ra sa sega ni tu dei e na noqu veiyalayalati, a sa kaya kina ko Jiova, au sa sega ni maroroi ira.

¹⁰ A sa kaya ko Jiova, Sa vakaoqo na veiyalayalati kaʼu na cakava vei ira na mataqali nei Isireli ni sa oti na gauna ko ya; au na tugana na noqu vunau ki na lomadra, ka vola e na yalodra: ia kaʼu na yaco me nodra Kalou, ia era na yaco me noqu tamata:

¹¹ ia era na sega ni vakavulici ira yadua na nona lewe-ni-koro kei na wekana, ka kaya, Mo kila na Turaga: ni ra na kilai au kecega, ko ira sa kaisi kei ira talega sa turaga.

¹² Niʼu na yalovinaka vei ira sa tawa dodonu, ia kaʼu na sega ni nanuma tale na nodrai valavala ca kei na nodra talaidredre.

¹³ Ni sa cavuta ko koya e dua sa vou, sa vakamadra o qori ka taumada. Ia na ka sa qai madra mai ka makawa sa voleka ni takali sara.