Iperiu 7 - AI VOLA TABU

Sa tukuna ko koya ni sa uasivi cake ko Jisu vei ira na bete eliu, 1-28.

¹ IA ko Melikiseteki o qo, sa tui mai Salemi, a bete ni Kalou Cecere sara, sa tavaki Eparaama ni sa tale mai na mokuti ira na tui, a sa vosavakalougatataki koya;

² sa solia talega vei koya ko Eparaama nai katini ni ka kecega: nai balebale ni yacana na Tui ni caka dodonu, a yacana talega emuri na Tui Salemi, a kenai balebale na Tui ni veivakacegui;

³ e sega ni tukuni na tamana, se na tinana, se na nona mataqali, sa sega ni vakatekivu na nona gauna, se oti na nona bula; a sa caka me vaka na Gone ni Kalou; a sa tikoga me bete ka tawa mudu.

⁴ Dou vakasama na kena levu ni tamata o qo, ni sa solia vei koya ko Eparaama na turaga qase nai katini ni kamunaga sa tokitaka.

⁵ A sa dina vei ira na luve i Levi, era sa bete, ni sa vakaroti vei ira e na vunau, me ra vakaisigana maivei ira na tamata, io, maivei ira na wekadra, ia sa dina ya ni ra sa lako mai na tolo i Eparaama:

⁶ ia ko koya o qo sa vakaisigana maivei Eparaama, a sa tawa wiliki vata kei ira na nona mataqali, a sa vosavakalougatataki koya ka vosataki kina na yalayala.

⁷ Ia sa sega e dua me vakatitiqataka rawa na vosa o qo, ni sa vosavakalougatataki koya sa uasivi sobu ko koya sa uasivi cake vei rau.

⁸ Ia eke era sa taura nai sigana ko ira na tamata era sa daumate; ia kikea ko koya sa tukuni ga ni sa bula tiko.

⁹ Io, kevaka e tara meʼu vosa vakakina, o Levi talega, o koya sa dautaura nai sigana, erau sa solia kei Eparaama nai sigana;

¹⁰ ni ka tu ga e na tolo i tamana, ni rau a veisotaraki kei Melikiseteki.

¹¹ Ia kevaka e yaco rawa na tawa cala e na vuku ni cakacaka ni bete vaka-Levi, (ni sa tukuni vata kaya na vunau vei ira na tamata,) ena yaga vakacava me tubu e dua tale na bete me vaka nai valavala i Melikiseteki, me kakua ni vakatokai me vaka nai valavala i Eroni?

¹² Ia ni sa qai vakaiso-somitaki na bete, sa dodonu sara me vakai-sosomitaki talega na vunau.

¹³ Ia ko koya sa tukuni vakaoqo, sa dua tani na nona yavusa, a ya sa sega maikina e dua na tamata sa qarava nai cabocabo-ni-soro.

¹⁴ Ni sa macala sara ni sa tubu maivei ira na Juta na noda Turaga; ia na yavusa ko ya e sega ni vosa kina ko Mosese me ra bete.

¹⁵ Ia ka sa macala vakalevu sara; ni sa tubu e dua tani tale na bete me vakataki Melikiseteki,

¹⁶ o koya ka lesi, ka sega ni vaka na vunau vakavuravura, ko ya ga me vaka na kaukauwa ni bula tawa mudu.

¹⁷ Ni sa tukuna ko koya, O iko na bete tawa mudu me vaka nai valavala i Melikiseteki.

¹⁸ Sa dina ni sa mudu mai na vunau sa liu ni sa malumalumu ka tawa yaga:

¹⁹ ni sa sega ni vunau sa yaco kina na tawa cala: ia ka sa vakabuca mai nai nuinui sa vinaka cake, o koya eda sa toro voleka kina vua na Kalou.

²⁰ Ia sa vaka ni sa tu na vosa bubului: (

²¹ ni sa buli walega me ra bete ko ira o qori, ia ka sega ni sa tu na vosabubului; ia ko koya o qo e na vosa bubului; e na vuku i koya sa kaya vua, Sa vosa bubului ko Jiova, ka na sega ni veivutuni, O iko na bete tawa mudu me vaka nai valavala i Melikiseteki:)

²² sa uasivi cake vakakina na veiyalayalati, o koya sa yaco me kena vakadinadinataki ko Jisu.

²³ Ia ko ira o qori e lewe vuqa, era sa caka me ra bete, e na vuku ni sa tarova na nodra tiko na mate:

²⁴ ia ko koya o qo, e na vuku ni sa tiko ga ka tawa mudu, sa sega ni vakaisosomitaki na nona cakacaka vakabete.

²⁵ O koya o qo sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.

²⁶ Ni sa dodonu me noda e dua na bete sa vakaoqo, sa yalosavasava, sa yalovinaka, sa tawa ca, sa tawase tani maivei ira na tamatai valavala ca, a sa caka me uasivi cake kei lomalagi e na nona cecere:

²⁷ o koya e sega kina ni yaga e na veisiga, me vakacabora taumada nai soro ni nonai valavala ca, ka emuri na nodra na tamata, me vakataki ira na bete levu: ni sa cakava o qo vakaduaga ko koya, ni sa vakacabori koya.

²⁸ Ni sa tamata, era sa malumalumu, sa bulia ko na vunau me ra bete levu; ia sai koya ga na Gone, o koya sa caka me tawa ca ka tawa mudu e na vosa bubului sa muria na vunau.