Iperiu 6 - AI VOLA TABU

Sa vakarota vei ira ko koya me ra vuku sara e na lotu, de ra ca tale, 1-8. Sa vakavulici ira me ra tu dei, ka gumatua sara, me ra kakua ni yalowai, ni sa vosa dina sara na Kalou ni sa yalataka na ka vinaka, 9-20.

¹ E NA vuku ni ka o qo me da qai laiva nai vakatekivu ni vakavuvuli kei Karisito me da lako kiliu ki na ka vaqase; me da kakua ni tauyavutaka tale e na veivutuni e na vuku ni valavala eda mate kina, e na vakabauta talega na Kalou,

² ai vakavuvuli ni veipapitaisotaki, kei na veitabaki liga, e na nodra tu cake talega ko ira na mate, kei na lewa ka tawa mudu.

³ Ia na ka o qo eda na cakava, kevaka e vinaka vua na Kalou.

⁴ Ni sa dredre sara me vakavoui tale me ra veivutuni ko ira ka vakararamataki eliu, era a tovolea nai solisoli vakalomalagi, ka rawata na Yalo Tabu,

⁵ ka tovolea na vosa vinaka ni Kalou, kei na kaukauwa ni bula ena muri mai,

⁶ a ra sa qai vuki tale; ni ra sa vakota tiko vakai ira na Gone ni Kalou ki na kauveilatai, ka vakalialiai koya e na matanavotu.

⁷ Ni sa vakalougatataka ko na Kalou na qele sa gunuva na uca sa lako wasoma kina, a ya sa vakatubura na kau sa yaga vei ira era sa kelia:

⁸ ia sa tawa vakabau ka vo e lailai me biu sara o qori sa vakatubura na kau votovotoa kei na soni; ia na kenai otioti me visa.

⁹ Ia koi kemudou ga, sa lomani, e dina ya ni keitou sa vosa vakaoqo, ia sa ka vinaka cake, kei na ka dou na bula kina, keitou sa vakasami kemudou kina.

¹⁰ Ni sa sega ni tawa dodonu ko na Kalou me guilecava kina na nomudou cakacaka, kei nai valavala loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.

¹¹ Ia keitou sa vinakata mo dou vakatakila yadua na mamakutu vakaoqori, mo dou vakanuinui matua sara kina me yaco nai vakataotioti:

¹² mo dou kakua ni vucesa, mo dou muri ira ga era sa qai taukei ni veika ka yalataki e na vuku ni ra a vakabauta ka vosota vakadede.

¹³ Ia ni sa vosataka na yalayala vei Eparaama na Kalou, e na vuku ni sa sega ni cavuta rawa e dua sa uasivi cake, sa qai cavuti koya ga e na nona bubului,

¹⁴ ka kaya, E dina kaʼu na vakalougatataki iko vakalevu, ka vakalewevuqataki iko vakalevu sara.

¹⁵ Sa vaka ga kina, ni sa vosota vakadede mada ko koya, sa qai yaco mei taukei ni ka ka yalataki.

¹⁶ Ia ni sa bubului ko ira na tamata, era sa daucavuta na ka sa levu cake: a sa oti vei ira na veileti e na bubului mei vakadinadina.

¹⁷ Sa vakakina ko na Kalou, ni sa vinakata ko koya me vakatakila dina sara kivei ira era na taukena na ka ka yalataki ni sa tu dei na nona lewa, sa vakadinadinataka e na bubului:

¹⁸ me rua kina na ka sa tu dei sara, sa sega ni rawa kina me vosa lasu ko na Kalou, me da vakacegui sara kina, koi keda eda sa laʼki vakaruru ni da sa taura nai nuinui sa viritu e matada:

¹⁹ ko ya sa tu vei keda mei kelekele ni yaloda, ni sa dina ka kaukauwa, ia ka sa curu sara ki loma ni lati:

²⁰ a tikina sa curu kina e na vukuda ko Jisu, me liu, ni sa caka me bete levu ka tawa mudu me vaka nai valavala i Melikiseteki.