Iperiu 5 - AI VOLA TABU

Sa tukuna ko koya na noda Bete Levu ni sa uasivi cake vei ira na bete eliu, 1-10. A sa qai vunauci ira sa tamata lotu, ni ra sa lotu dede ka sega ni vuku sara, 11-14.

¹ IA na bete levu yadua sa digitaki maivei ira na tamata, sa lesi vua na Kalou e na vukudra na tamata, me vakacabora e so nai madrali kei nai soro e na vuku ni valavala ca:

² sa rawarawa vua me lomani ira era sa sesewa, ka cala; ni sa vakavolivoliti koya talega na malumalumu.

³ Ia e na vuku ni ka o qo, me vaka e na vukudra na tamata sa vaka kina talega e na vukuna, sa dodonu me vakacaboi soro ko koya e na vuku ni valavala ca.

⁴ A sa sega e dua sa laʼki taura vakai koya na cakacaka vakarokoroko, o koya ga sa lesi koya ko na Kalou, me vakai Eroni.

⁵ Sa vaka talega kina ko Karisito sa sega ni dokai koya me bete levu vakai koya; e na vuku i koya ga sa kaya vua, O iko na Luvequ: au sa vakasikavi iko e na siga o qo.

⁶ Me vaka talega na nona vosa e na Sere kadua, A bete tawa mudu ko iko me vakataki Melikiseteki.

⁷ O koya o qo e na veisiga ni nona tiko vakatamata, ni sa cabora oti na kerekere, kei na masumasu, kei na tagi kaukauwa, ni sa vakawai na matana, vua sa kaukauwa me vakabulai koya mai na mate, a sa rogoci ga e na ka sa rerevaka ko koya;

⁸ ia sa dina ya ni sa Luvena ko koya, a sa vakatavulici ga e nai valavala ni talairawarawa, ni sa vosota tiko na ka rarawa;

⁹ ia ni sa vakarautaki oti, sa yaco me vu ni bula tawa mudu vei ira kecega sa talairawarawa vua;

¹⁰ sa kaciva ko na Kalou me bete levu me vaka nai valavala i Melikiseteki.

¹¹ E vuqa na ka sa vo me keitou tukuni koya kina, ia ka sa dredre ga na kenai balebale, ni sa guca na daligamudou.

¹² Ni sa dodonu mo dou yaco mada e na gauna eliu mo doui vakavuvuli, ia ka sa yaga mo dou vakatavulici tale se sa cava na vu ni vakavuvuli ni Kalou; sa yaga talega vei kemudou na wai-ni-sucu, e segai na kakana kaukauwa.

¹³ Ni sa tawa kila vinaka nai vakavuvuli ni veivakadonui, ko koya sa gunuva walega na wai-ni-sucu; ni sa gone lailai ga.

¹⁴ A sa yaga vei ira sa matua na kakana kaukauwa, o ira era sa vakarautaka na yalodra e nai valavala, me ra lewa rawa na ka se vinaka se ca.