Iperiu 4 - AI VOLA TABU

Sa yalataki vei keda nai vakavakacegu ka yalataki vei ira na Isireli eliu; ia ko ira sa tawa vakabauta era na tawa yaco kina, 1-13. Sa qai tukuna ko Paula nai valavala ni noda Bete Levu, 14-16.

¹ O KOYA o qo me da qai rere, ni sa maroroi tu na vosa ni yalayala me da curu ki na nonai vakavakacegu, de sega beka ni yaco dina kina koi kemudou e so.

² Ni sa tukuni mai vei keda e dua na ka vinaka, me vaka vei ira: ia ka sega ni yaga vei ira na vosa era sa rogoca, ni sa sega ni veiwaki vata kei na vakabauta vei ira sa vakarogoca.

³ Ni da sa qai curu ki nai vakavakacegu, koi keda sa vakabauta, me vaka sa vosa kina ko koya, Me vaka kaʼu a bubului kina e na noqu cudru, Era na sega sara ni curu ki na noqui vakavakacegu: io, ni sa dina ya ni ka oti na cakacaka ni sa tauyavutaki oti ko vuravura.

⁴ Ni sa dua na tikina sa vosataka vakaoqo ko koya nai kavitu ni siga, A sa vakacegu na Kalou e na kenai kavitu ni siga mai na nona cakacaka kecega.

⁵ Ia eke talega, Era na sega sara ni curu ki na noqui vakavakacegu.

⁶ O koya o qo ni sa vo me curu kina e so, a ra sa sega ni curu kina ko ira ka tukuni taumada vei ira na ka vinaka, e na vuku ni tawa vakabauta: (

⁷ a sa qai lokuca tale e dua na siga ko koya, ka sa gusu i Tavita sa kaya kina, E na siga o qo, ni sa oti na gauna balavu; me vaka sa kainaki, E na siga o qo, kevaka dou sa via rogoca na domona, kakua ni vakaukauwataka na yalomudou.

⁸ Io, kevaka sa solia vei ira nai vakavakacegu ko Josua, ena sega ni vosataka tale ko koya e dua tani na siga.

⁹ O koya o qo sa vo kina nai vakavakacegu me nodra na tamata ni Kalou.

¹⁰ Ia ko koya sa curu ki na nonai vakavakacegu, sa vakacegu mai na nona cakacaka, me vaka na Kalou mai na nona.)

¹¹ O koya o qo me da qai gumatua sara me da curu ki nai vakavakacegu o qori, de bale e dua na tamata e nai valavala sa tautauvata ni sa tawa vakabauta.

¹² Ni sa bula na vosa ni Kalou, ka kaukauwa, ka gata vakalevu ka mucu ga nai seleiwau taki-veiyamena, ka suaka me wasea rua kina na lomada kei na yaloda, kei na nodai sema kei na uto ni sui, a sa lewa rawa na nanuma kei na nakita ni yaloda.

¹³ A sa sega talega e dua na ka e tawa rairai e matana: ia sa luvawale ga na ka kecega, ka vakaraitaki sara, e na mata i koya eda na vakatusai keda vua.

¹⁴ IA ni sa dua na noda bete levu, o koya ka curu ki lomalagi, o Jisu na Gone ni Kalou, tou taura matua na vakatusa.

¹⁵ Ni sa sega ni noda bete levu ko koya sa tawa lomani keda rawa ni da sa malumalumu; ia ka sa dauveretaki tautauvata e na ka kecega ko koya, ia ka sega na nonai valavala ca.

¹⁶ E na vuku ni ka o qori tou toro doudou kina ki nai tikotiko-vakaturaga loloma, me da vinakati kina, me da lomani talega ka vukei kina e na gauna e yaga kina.