Iperiu 3 - AI VOLA TABU

Sa tukuna ko koya ni sa uasivi cake vei Mosese ko Jisu, e na lotu, 1-6. Ia kevaka eda sa sega ni vakabauti Jisu, eda na sega ni curuma na nonai vakavakacegu, 7-19.

¹ E NA vuku ni ka o qori, oi kemudou na veiwekani yalosavasava, sa kacivi mei taukei ni ka vakalomalagi, dou vakananuma nai Apositolo kei na Bete Levu eda sa vakatusa tiko, ko Karisito Jisu:

² o koya ka lomadina vua sa lesi koya, me vakataki Mosese talega e na nona mataqali taucoko.

³ A sa dodonu me vakarokorokotaki vakalevu ko koya ka vakalailai ko Mosese, e na vuku ni sa dauvakarokorokotaki vakalevu ko koya sa tara, ia ka vakalailai ga na vale.

⁴ Ni sa dua e tara na vale yadua: ia ko koya sa tara na ka kecega sa Kalou.

⁵ Ia e dina ya ni sa lomadina ko Mosese e na mataqali taucoko sa nona, me vaka sai talatala, me vakatakilai kina na ka ena tukuni maimuri;

⁶ ia ko Karisito me vaka sa Gone e na nona mataqali; ia sa nona mataqali koi keda, kevaka eda sa taura matua na doudou kei na reki ni nuinui me tu dei, me yacova nai vakataotioti.

⁷ O koya o qo (me vaka sa kaya ko na Yalo Tabu), E na siga o qo kevaka dou sa via rogoca na domona,

⁸ kakua ni vakaukauwataka na yalomudou, me vaka e na veivakacudrui, e na siga ni dauvere e na lekutu:

⁹ era sa dauveretaki au kina ko ira na nomudou qase, era sa vakatovolei au vakaca, ni ra sa raica tiko na noqu cakacaka ka yabaki vasagavulu.

¹⁰ O koya o qo kaʼu a cudru kina vei ira nai tabatamata ko ya, ka kaya, Era sa cala tikoga e lomadra; a ra a sega ni kila na noqui valavala.

¹¹ Au a bubului kina e na noqu cudru, era na sega sara ni curu ki na noqui vakavakacegu.

¹² Dou raici kemudou vinaka, na veiwekani, de tiko e na lomadra e so vei kemudou na yalo sa ca e na tawa vakabauta, dou sa biuta laivi kina na Kalou bula.

¹³ Ia dou veivakatavulici vakai kemudou e na veisiga kecega, ni sa vakatokai ga, Na siga edaidai; de vakayalokaukau-wataki e dua vei kemudou e na vuku ni sa dauveivakaisini nai valavala ca.

¹⁴ Ni sa nodai votavota mai ko Karisito, kevaka eda sa taura matua nai vakatekivu ni noda dinata me tu dei, me yacova nai vakataotioti.

¹⁵ Ni sa tukuni tiko vakaoqo, E na siga o qo, kevaka dou sa via rogoca na domona, dou qai kakua ni vakaukauwataka na yalomudou, me vaka e na veivakacudrui.

¹⁶ Ni sa ko cei ko ira era a vakacudruya ni ra sa rogoca oti? sa sega li ni ko ira kecega era sa lako vata kei Mosese mai Ijipita?

¹⁷ Ia sa cudru vei cei ko koya ka yabaki vasagavulu? sa sega li ni ko ira sa valavala ca, ka bale na yagodra e na lekutu?

¹⁸ A sa bubului vei cei ko koya me ra kakua ni curu ki na nonai vakavakacegu, vei ira ga sa sega ni vakabauta?

¹⁹ Ia eda sa raica, ni ra sa sega ni curu rawa kina, e na vuku ni tawa vakabauta.