Iperiu 2 - AI VOLA TABU

Sa vakatakila ko koya ni sa vinaka me da vakabauta sara na ka sa vakatakila ko Jisu, ni sa turaga ni lotu, a sa mate me bula na tamata kecega, 1-18.

¹ E NA vuku ni ka o qo, e dodonu me da vakananuma vakalevu sara kina na ka eda a rogoca, de dua na siga e yali kina vei keda.

² Ia kevaka ka vakadinadinataki na vosa era a tukuna ko ira na agilose, ka saumi vakadodonu nai valavala ca kei na talaidredre kecega;

³ eda na bula vakaevei koi keda, kevaka eda sa vakaweleweletaka na bula levu o qo; o koya sa vakatekivuna ko na Turaga me tukuna, ka vakadinadinataka mai kivei keda ko ira era a rogoca;

⁴ ni sa vakadinadina tiko vei ira ko na Kalou, e nai vakatakilakila e so kei na ka e veivakidacalataki e so kei na caka-mana e vuqa, kei nai votavota ni Yalo Tabu, me vaka na nona veitalia?

⁵ Ni sa sega ni solia ko koya vei ira na agilose me ra lewa na vuravura ena muri mai, o koya keitou sa vosataka.

⁶ A sa vakatakila e dua e na tikina e dua, ka kaya, A cava na tamata, mo nanumi koya kina? se na luve ni tamata, mo dautalevi koya kina?

⁷ O sa buli koya me uasivi sobu vakalailai ga vei ira na agilose: o sa vakaisalataka e nai ukuuku kei na vakarokoroko, ka lesia me veitaliataka na cakacaka ni ligamu:

⁸ o sa vakamalumalumutaka na ka kecega me tu e ruku ni yavana. Ia ni sa vakamalumalumutaka vua na ka kece me veitalia kina, sa sega ni vo e dua na ka me tawa vakamalumalumutaki vua. Ia eda sa sega ni raica edaidai ni sa vakamalumalumutaki vua na ka kecega me veitalia kina.

⁹ Eda sa qai raici Jisu ga, sa caka me uasivi sobu vakalailai ga vei ira na agi-lose, sa qai vakaisalataki e nai ukuuku kei na vakarokoroko, e na vuku ni sa vosota oti na mate; me tovolea kina na mate ko koya e na vuku ni tamata kecega, me vaka na loloma ni Kalou.

¹⁰ Ni sa kilikili kei koya, sai taukei ni ka kecega, ka sa vuna na ka kecega, ni sa vakauta na luvena e lewe vuqa ki na vanua vakaiukuuku, me vakarautaki koya na vu ni nodra bula, e na vosota.

¹¹ Ni ra sa Tama vata, ko koya sa vakasavasavataka kei ira era sa vakasavasavataki: ia e na vuku ni ka o qo sa sega kina ni madua ko koya me vakatokai ira me ra tacina;

¹² ni sa kaya, Au na tukuna na yacamu vei ira na taciqu; e na kedra maliwa nai vavakoso lewe ni soro kaʼu na vakarokorokotaki iko e na sere.

¹³ Sa kuri talega, Au na vakararavi vei koya. Sa kuri talega, Raici au, kei ira na gone sa solia mai vei au ko na Kalou.

¹⁴ Ia ni sa vakalewe ka wakadra ko ira na gone, sa yaco, talega ko koya me vakakina; me vakamalumalumutaki koya kina sa lewa na mate, o koya na tevoro, e na vuku ni mate;

¹⁵ me vakalalagataki ira talega era vaka na bobula e na nodra bula taucoko ni ra sa rerevaka na mate.

¹⁶ Ni sa sega sara ni mai vukei ira na agilose ko koya; sa mai vukei ira ga na kawa i Eparaama.

¹⁷ O koya o qo sa kilikili kina kei koya, me yaco me vakataki ira na wekana e na ka kecega, me bete levu yalovinaka ka lomadina e na veika ni Kalou, me sorovaka na nodrai valavala ca na tamata.

¹⁸ Ni sa vosota na ka ca ko koya, ni sa dauveretaki, a sa qai rawata kina me vukei ira era sa dauveretaki.