Iperiu 13 - AI VOLA TABU

Sa vakavulici ira ko koya e na ka e so, a sa tinia na nonai vola, 1-25.

¹ ME tiko ga na veilomani vakaveitacini.

² Kakua ni guilecava na vakani ira na vulagi: ni sa so era a vakania na agilose e so ka lecava ga.

³ Me vaka dou sa vesu vata, mo dou nanumi ira era sa vesu tu; kei ira talega na dravudravua, me vaka dou sa vakayago talega.

⁴ Sa kilikili kei ira na tamata kece na vakawati, kei nai mocemoce e sega ni veibutakoci: ia ko ira na daudara kei na dauyalewa ena lewai ira ko na Kalou.

⁵ Me takali na daukocokoco e na ka e caka: ia dou lomavinaka e na ka sa tu ga; ni sa kaya ko koya, Au na sega sara ni biuti iko, se vakalaivi iko.

⁶ E na vuku ni ka o qo eda sa doudou kina me kaya, A noqui vukevuke ko Jiova, ia kaʼu na sega ni rerevaka na ka sa kitaka vei au na tamata.

⁷ Dou nanumi ira sa liutaki kemudou, era a tukuna vei kemudou na vosa ni Kalou; vakadamurimuria na nodra vakabauta, ka nanuma nai otioti ni nodrai valavala.

⁸ Sai koyakoya tikoga ko Jisu Karisito, e na siga sa oti, kei na siga edaidai, kei na veisiga maimuri.

⁹ Dou kakua ni veikauyaki e nai vakavuvuli e vuqa sa lako vakatani. Ni sa yaga me vakataudeitaki na yalo e na loloma sa soli, ia me kakua ga e na kakana, sa sega ni yaga vei ira era sa oga kina.

¹⁰ Sa dua na nodai cabocabo-ni-soro, sa tawa dodonu me kana kina ko ira sa qarava na vale tabu.

¹¹ Ni sa vakamai e nai bili ni koro na yago ni manumanu o qori, sa kauta na nodra, dra ki na loqi tabu ko koya na bete levu mei soro ni valavala ca.

¹² O koya ga o qo sa mate kina ko Jisu e taudaku ni matamata-ni-koro, me vakasavasavataki ira na tamata e na nona dra.

¹³ E na vuku ni ka o qo me da lako kina kivei koya ki nai bili, ka vosota vata kaya na veivakalialiai.

¹⁴ Ni sa sega na noda koro eke me da tiko vakadua kina, ia eda sa vakasaqara ga e dua ena muri mai.

¹⁵ Ia ko koya o qo me da qai vakacabora tikoga nai madrali ni vakavinavinaka vua na Kalou e na vukuna, o qori na vua ni tebenigusuda, ni da tusanaka na yacana.

¹⁶ Kakua talega ni guilecava na caka vinaka kei na dauia nai solisoli: ni sa vinakata sara ko na Kalou nai madrali vakaoqo.

¹⁷ Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakai ira era na tukuni ira kina, me ra kitaka kina e na marau, ka sega e na vutugu: ni sa tawa yaga vei kemudou me vakaoqori.

¹⁸ Dou masulaki keitou: ni keitou sa dinata ni sa vinaka na neitou lewa-eloma, ka keitou sa vinakata me valavala dodonu e na ka kecega.

¹⁹ Ia kaʼu sa vakamamasu me caka ga na ka o qo, meʼu talaki yani kusarawa kina vei kemudou.

²⁰ Ia na Kalou ni veivakacegui, o koya ka kauta tale mai na mate na noda Turaga ko Jisu, na nodrai Vakatawa levu na sipi, e na vuku ni dra sa ia kina na veiyalayalati tawa mudu,

²¹ me vakavinakataki kemudou mada ko koya e nai valavala vinaka kecega mo dou cakava na nona veitalia, ka me cakava ko koya e na lomamudou na ka sa vinaka e matana, e na vuku i Jisu Karisito; me ia vei koya na vakarokoroko ka tawa mudu. Emeni.

²² Ia kaʼu sa masuti kemudou, na veiwekani, mo dou vosota na vosa ni veivakadreti: niʼu sa vola vei kemudou nai vola, e na vosa e vica walega.

²³ Dou kila, sa sereki tale na wekada ko Timoci; kevaka sa tadu kusarawa mai ko koya, keirau na raici kemudou vata kaya.

²⁴ Me cavu mada yani na loloma vei ira kece sa liutaki kemudou, kei ira kecega era sa lotu. Sa loloma yani vei kemudou ko ira mai Itali.

²⁵ Me tiko vei kemudou kecega na loloma. Emeni.