Iperiu 12 - AI VOLA TABU

E vinaka me da nanumi Jisu me da gumatua kina, 1-3. Me da kakua ni yalolailai ni da sa vakararawataki, 4-13. Me da yalosavasava sara, 14-17. Sa vosa vakaukauwa na vunau eliu, sa vosa vinaka sara nai tukutuku kei Jisu; e vinaka me da vakarogoca, de da ca, 18-29.

¹ E NA vuku ni ka o qo, ni sa vakavolivoliti keda talega e lewe vuqa e vaka na o era sa vakaraici keda, me da biuta laivi tu na ka bibi kece kei nai valavala ca eda sa tao rawarawa kina, ka me da ciciva tikoga na cere sa tu e matada,

² ka me da vakaraici Jisu, o koya sa vakatekivuna ena sauma talega na vakabauta; o koya, e na vuku ni marau sa viritu e matana, sa vosota na kauveilatai, ka sa sega ni madua ni sa vakalialiai kina, a sa qai tiko sobu ko koya e na liga i matau ni tikotiko-vakaturaga ni Kalou.

³ Dou qai vakananumi koya sa vosota ni sa vosavakacacataki koya vakalevu ko ira na tamata ca, de oca ka waicala na lomamudou.

⁴ Dou sa sega tu ni vorata mo dou vakamatei, e na nomudou veivala kei nai valavala ca:

⁵ ia dou sa guilecava nai vakavuvuli sa vosa kivei kemudou me vaka kivei ira na gone, Na luvequ, mo kakua ni beca ni sa yaviti iko ko Jiova, se yalowai ni sa vunauci iko ko koya:

⁶ ni sai koya sa lomana ko Jiova, sa vunauca ko koya, ka sa yaviti ira kecega na luvena sa vinakata ko koya.

⁷ Kevaka dou sa yaviti, sa qai kitaka vei kemudou ko na Kalou me vaka vei ira na luvena; io, ko cei na gone sa tawa yaviti koya ko tamana?

⁸ Ia kevaka sa sega ni ia vei kemudou na yaviti, sa dauia vei ira kecega, dou sa qai vaka na gone e sega ni vakatamani, ka sega ni vaka na luvena dina.

⁹ Ia ka dauyaviti keda na tamada vakayago, ia eda a daudoka: ena sega li ni levu cake sara na noda talairawarawa vei koya na Tama ni veiyalo, ka da na bula kina?

¹⁰ Ia ko ira o qori era a dauveiyaviti e na veisiga e so me vaka na nodra veitalia; ia ko koya me bau yaga, me da vakataki koya kina e na yalosavasava.

¹¹ Ia ka sega ni ka ni marau na yaviti ni sa ia tiko, a ka rarawa ga: sa bera ga sa qai vuataka na vua ni yalododonu era sa vakacegui kina ko ira sa kitaki kina.

¹² O koya o qo mo dou qai laveta cake na liga sa wadamele, kei na duru sa malumalumu;

¹³ ka vakadodonutaka na sala ki na yavamudou, me kakua ni vakasesei ko koya sa gera, ka me vakabulai ga.

¹⁴ Dou vakamuria na veivinakati kei ira na tamata kecega, kei na yalosavasava, ni sa sega e dua ena raica na Turaga kevaka e sega vua na ka o qori:

¹⁵ ka dou raica vinaka de bale e dua mai na loloma ni Kalou; de dua na waka gaga e tubu cake ka ia kina na rarawa, ka vakaqeleqelewataki kina na lewe vuqa;

¹⁶ de dua na daudara, sei koya sa beca na ka tabu, me vakataki Iso, o koya ka volitaka na nona ulumatua e na kakana e dua bau:

¹⁷ ni dou sa kila, ni sa oti, sa domona ko koya me vosavakalougatataki; ia ka sa bureitaki vua: ni sa sega ni kunea na ka e ia kina na vuki me duatani, ia ka sa vakasaqara matua, ka vakawai na matana.

¹⁸ Ni dou sa sega ni lako mai ki na ulu-ni-vanua sa tarai rawa, a sa caudre e na buka, kei na o loaloa, kei na butobuto, kei na cava,

¹⁹ kei na rorogo ni davui, kei na domo ni vosa; ko ya sa masu kina ko ira era a rogoca, me kakua ni vosataki tale vei ira; (

²⁰ ni ra sa sega ni vosota rawa na ka sa vakaroti, Kevaka e tara na ulu-ni-vanua e dua na manumanu e yavai va, ena viriki e na vatu, se cokai sara e na moto:

²¹ ia na ka levu na kena rerevaki ni raivotu ko ya, sa vosa kina ko Mosese, Au sa domobula ka sautaninini vakalevu:)

²² ia dou sa lako mai ki na ulu-ni-vanua ko Saioni ga, kei na koro ni Kalou bula, ki Jerusalemi vakalomalagi, kei na nodrai vavakoso na agilose e tawa wiliki rawa,

²³ kei na nodrai vavakoso na ulumatua, sa volai mai lomalagi, vua talega na Kalou sa lewai ira kecega na tamata, kei na yalodra na tamata yalododonu sa yaco kece kina na nodra vakalougatataki,

²⁴ kivei Jisu talega na dautataro ni veiyalayalati vou, kei na dra sa kureitaki, o qori ga sa cavuta na ka vinaka, sa cavuta na ka ca ko Epeli.

²⁵ Dou raica, mo dou kakua ni bese vua sa vosa. Ia kevaka era sega ni bula tiko ko ira era a bese vua sa vosa e vuravura, ena vakalevu cake koi keda, kevaka eda sa vuki tani vua sa mai lomalagi:

²⁶ o koya sa vakayavalataki vuravura e na domona e na gauna ko ya: a sa qai yalataka, ka kaya, Sa vakadua tale, kaʼu na sega ni vakayavalataki vuravura ga, ko lomalagi talega.

²⁷ Ia o qo, Sa vakadua tale, sa vakatakilai mai kina ni na kau tani yani na veika sa vakayavalataki, me vaka na veika sa caka, me tu dei kina na veika sa tawa vakayavalataki rawa.

²⁸ Ia e na vuku ni da sa rawata na matanitu sa sega ni vakayavalataki rawa, me da taura matua na loloma sa soli, eda sa qarava vinaka kina na Kalou e na yalomatua kei na rere:

²⁹ ni sa buka-waqa caucaudre na noda Kalou.