Iperiu 11 - AI VOLA TABU

Sa tukuna ko koya nai balebale ni vakabauta, 1; a sa qai tukuna na kena yaga, 2-40.

¹ IA na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune.

² Ni sa ka o qo sa rogo vinaka kina eliu ko ira na qase.

³ Sa vakabauta eda sa kila kina ni ka ia na veibuli e na vosa ni Kalou, a sa sega ni veika sa rairai sa caka maikina na veika sa raici.

⁴ Sa vakabauta sa vakacabora kina ko Epeli nai soro sa vinaka ki na Kalou ka ca na nei Keni, ka sa rawata kina nai vakadinadina ni sa yalododonu, ni sa vakatakila ko na Kalou ni sa vinakata na nonai madrali: e na vuku ni ka ga o qo sa vosa tikoga kina ko koya ni sa mate tu.

⁵ Sa vakabauta sa kau yani kina ko Inoki ka sega ni raica na mate; a ra sa tawa kunei koya e na vuku ni sa kauti koya yani ko na Kalou: ia ni sa sega ni kau oti yani, sa tu ga vua nai vakadinadina ni sa vinakati koya ko na Kalou.

⁶ Ia kevaka sa sega na vakabauta, sa dredre sara me da vinakati: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.

⁷ Sa vakabauta sa rere kina ko Noa, ni sa vakasalataka oti ko na Kalou e na vuku ni veika sa bera ni rairai mai, a sa cakava ko koya na waqa me vakabulai ira kina na nona lewe-ni-vale; a sa vunauci ira kina na kai vuravura, ka yaco mei taukei ni veivakadonui sa yaco e na vakabauta.

⁸ Sa vakabauta sa talairawarawa kina ko Eparaama, ni sa kacivi me lako ki na vanua sa bera ni, soli vua me taukena; ka sa lako yani, ia ka sa sega ni kila na vanua sa lako kina.

⁹ Sa vakabauta sa tiko kina ko koya me vaka na vulagi e na vanua ka yalataki, me vaka e na nodra na tani, ka tiko walega e na veivale gatu, ko Aisake talega kei Jekope, eratou taukena vata emuri na ka ko ya ka yalataki:

¹⁰ ni sa waraka ko koya na koro sa tauyavutaki, ka tara ko na Kalou ka cakava.

¹¹ Sa vakabauta sa vakaukauwataki kina ko Sera me kunekunetaka na kawa, a sa vakasucu gone ni sa oti na kena gauna, ni sa nanuma ga ni sa yalodina ko koya ka yalataka:

¹² o koya sa tubu kina mai vua e lewe dua, o koya sa vaka na mate, e lewe vuqa me vaka na veikalokalo ni lagi, e vaka talega na nuku e na matasawa e tawa wiliki rawa.

¹³ Sa mate e na vakabauta ko ira kecega o qo, ia ka sa sega ni nodra dina na veika ka yalataki, a ra sa raica vakayawa, ka cuquma, ka tukuni ira ni ra a vulagi ga ka tiko walega e vuravura.

¹⁴ Ia ko ira sa vosa vakaoqo era sa vakatakila sara ni ra sa vakasaqara na nodra vanua.

¹⁵ E dina ya, kevaka era sa nanuma o qori era sa biuta laivi tu, sa rawarawa ga me ra lesu tale kina.

¹⁶ A ra sa qai domona sara e dua sa vinaka cake, o qori sa vakalomalagi: o koya ga o qo e sega ni madua kina ko na Kalou me vakatokai me nodra Kalou: ni sa tara e dua na koro ko koya me nodra.

¹⁷ Sa vakabauta sa vakacabori Aisake kina ko Eparaama, ni sa vakatovolei, ia ko koya ka vosataki kina na yalayala sa vakacabori koya na le dua bauga o koya ka vakasikava ko koya,

¹⁸ ia ka sa kainaki e na vukuna eliu, Na kawa i Aisake ena vakatokai me nomu:

¹⁹ ni sa vakasama ko koya ni sa rawarawa vua na Kalou me Vakabula tale mai na mate; a sa rawati koya tale vakakina e nai vakatakarakara.

²⁰ Sa vakabauta sa vosavakalougatataki Jekope kei Iso kina ko Aisake e na veika e sa bera.

²¹ Sa vakabauta sa vosavakalougatataki rau kina na luve i Josefa ko Jekope, ni sa voleka ni mate; a sa cuva sobu e na nonai titoko.

²² Sa vakabauta sa tukuna kina ko Josefa, ni sa voleka ni mate, ni na lako tani ko ira na luve i Isireli; a sa vakarota e na vuku ni suina.

²³ Sa vakabauta sa vuni Mosese kina ka vula tolu koi rau na nona qase, ni sa sucu ko koya, e na vuku ni rau sa raica ni sa matavinaka na gone; a rau sa tawa rerevaka na vosa ni tui.

²⁴ Sa vakabauta sa bese kina ko Mosese, ni sa qai tamata bula mai, me vakatokai me luvena na luve i Fero na gonealewa;

²⁵ ni sa digitaka me vosota vata na ca kei ira na tamata ni Kalou, ia ka cata ni bau marau walega e nai valavala ca e na siga e so:

²⁶ ni sa vakasama ni sai yau levu me vakalialiai e na vuku i Karisito, ia na ka lailai nai yau mai Ijipita: ni sa vakaraica tu na kenai sau.

²⁷ Sa vakabauta sa biuti Ijipita kina ko koya, ka sega ni rerevaka na cudru ni tui; ni sa gumatua me vaka ni sa raici koya sa tawa kune.

²⁸ Sa vakabauta sa ia kina ko koya na solevu ni lako-sivia, kei na kureitaka na dra, me kakua ni tarai ira ko koya sa vakamatei ira na ulumatua.

²⁹ Sa vakabauta era sa lako-basika kina na Waitui Damudamu me vaka sa vanua mamaca; ia ni sa vakatovolea ko ira na kai Ijipita me ra bau vakakina, era sa luvu.

³⁰ Sa vakabauta sa bale kina na bai mai Jeriko, ni sa buku na druadrua ka siga vitu.

³¹ Sa vakabauta sa tawa rusa vata kina kei ira sa tawa vakabauta ko Reapi, na yalewa ka dautagane, ni sa kauti rau e na veivakacegui erau sa yamata.

³² Ia a cava tale meʼu kaya? ni sa dede sara kevaka kaʼu sa tukuni Kitioni, kei Paraki, kei Samisoni, kei Yifita, kei Tavita, kei Samueli, kei ira na parofita:

³³ o ira, ni ra sa vakabauta, era sa vakamalumalumutaka na matanitu e so, era sa cakava na ka e dodonu, era sa rawata me nodra na veika ka yalataki, era sa tabonaka na gusu ni laioni,

³⁴ era sa bokoca na kaukau wa ni buka-waqa, era sa bula mai na bati ni seleiwau, era sa vakaukauwataki tale ni ra sa malumalumu, era sa qaqa e nai valu, era sa vakasavi ira nai valu ni kai tani.

³⁵ Sa tauri ira tale ko ira na yalewa e so na kai nodra, era sa tu cake tale mai na mate: ia ka so sa vakararawataki vakalevu, a ra sa bese ga ni bula; me vinaka cake kina na nodra tu cake tale;

³⁶ ia sa vakatovolei e so e na veivakalialiai kei na moku e na kuita, kei na vesu talega kei na biu ki na vale ni veivesu;

³⁷ era sa lauviri e na vatu, era sa varomusuki rua, era sa dauveretaki, era sa vakamatei e nai seleiwau: era sa veilakoyaki voli e na kuli ni sipi kei na kuli ni koti; era sa dravudravua sara, era sa vakararawataki, era sa vakacacani;

³⁸ (ia sa sega ni yaga ko ira na kai vuravura me ra tiko vata kei ira:) era sa se ki na vanua lala e so, kei na ulu-ni-vanua e so, kei na qara e so, kei na veiqaravatu e vuravura.

³⁹ Ia ko ira kecega o qo era sa rogo vinaka e na vuku ni vakabauta, ia ka sega ni nodra dina na ka ka yalataki:

⁴⁰ a sa vakarautaka ko na Kalou vei keda na ka e vinaka cake, me kakua kina ni nodra duaduaga na kalougata sara, me noda vata ga.