Iperiu 10 - AI VOLA TABU

Sa uasivi cake nai soro sa cabora ko Karisito e nai soro kecega eliu, ni sa kau tani kina nai sau ni valavala ca, 1-18. Sa vakarota kina vei ira ko koya me ra vakabauti Jisu sara, 19-39.

¹ SA tu ga e na vunau nai vakatakarakara ni veika vinaka me na muri mai, ia ka sega na nodra tautauvata dina, ka sega talega ni rawa e na veisoro era sa cabora tiko e na veiyabaki, me vakasavasavataki ira era daulako kina.

² Ia kevaka sa vakaoqo, sa sega li ni mudu oti na nodra vakacabori, e na vuku ni ra sa sega ni beitaki ira tiko e nai valavala ca ko ira sa dausoro, ni ra sa vakasavasavataki vakadua?

³ ia e na veika o qori sa vakananumi tale kina nai valavala ca e na veiyabaki.

⁴ Ni sa dredre sara me kauta tani nai valavala ca na dra ni karavau kei na koti.

⁵ 0 koya o qo sa kaya kina ko koya ni sa lako mai ki vuravura, Ai soro kei nai madrali ko sa sega ni vinakata, ia ko sa vakarautaka ga vei au na yago:

⁶ ai soro kama, o qori talega sa sorovaki kina nai valavala ca, ko sa sega ni reki kina:

⁷ au sa qai kaya, Raica, au sa lako mai, (au a volai e nai vola vivigi,) meʼu cakava na ka ko sa vinakata, na Kalou.

⁸ Sa kaya oti mada eliu ko koya, Ai soro kei nai madrali kei nai soro kama o qori talega sa sorovaki kina nai valavala ca, ko sa sega ni vinakata, se rekitaka, o koya sa vakacabori me vaka na vunau;

⁹ sa qai kaya ko koya, Raica, au sa lako mai meʼu cakava na ka ko sa vinakata, na Kalou. Sa kauta tani ko koya nai kadua, me vakayacora na kenai karua.

¹⁰ Ia eda sa vakasavasavataki e na vuku ni veitalia o qo, e na yago i Jisu Karisito ni sa cabori vakadua.

¹¹ Ia ko ira kecega na bete era sa tu ka cakacaka e na veisiga, ka vakacabora wasoma nai soro ko ya sa sega ni kauta tani rawa nai valavala ca:

¹² ia ko koya o qo, ni sa vakacabora vakadua oti nai soro e dua ga e na vuku ni valavala ca, sa qai tiko sobu e na liga i matau ni Kalou;

¹³ a sa qai namaka tiko me yaco ko ira na nona meca mei tutu-ni-yavana:

¹⁴ ni sai soro e dua ga ka cakava vakadua kina na ka kecega e yaga vei ira era sa vakasavasavataki.

¹⁵ Ia sai vakadinadina talega vei keda na Yalo Tabu: io, ni sa vosa oti ko koya eliu,

¹⁶ O qo na veiyalayalati kaʼu na cakava vei ira ni sa oti na gauna ko ya, sa qai kaya na Turaga, Au na tugana na noqu vunau ki na yalodra, ka vola e na lomadra;

¹⁷ ia na nodrai valavala ca kei na nodra talaidredre kaʼu na sega ni nanuma tale.

¹⁸ Ia kevaka sa bokoci na veika o qori, sa sega ni cabori tale nai soro ni valavala ca.

¹⁹ O KOYA o qo, oi kemudou na veiwekani, ni da sa qai doudou rawa me da curu ki na loqi tabu sara e na vuku ni dra i Jisu,

²⁰ e na sala vou ka bula, o koya sa qai vakatara vei keda ko koya, ia sa ka e curu kina nai lati, o qori na yagona;

²¹ ni sa dua talega na noda bete levu e na vale ni Kalou;

²² tou toro voleka yani e na yalo dina kei na vakabauta dina sara, ni sa kureitaki tu na yaloda me da kakua ni beitaki keda e na ca, ka sa vakasilimi tu na yagoda e na wai makare.

²³ Tou taura matua na vakatusa ni vakabauta me kakua ni yavala; (ni sa yalodina ko koya sa yalataka;)

²⁴ me da veivakananumi keda vakai keda me da veivakatakatai me dauloloma ka valavala vinaka:

²⁵ me da kakua ni biuta na vakasoqoni vata, me vaka nai valavala ni tamata e so; me da veivakamasuti tiko: ia me vakalevu, ni dou sa raica ni sa toro voleka mai na siga.

²⁶ Io, kevaka eda sa valavala ca ka sa yaloda kina, ni da sa rawata oti me kila nai vakavuvuli dina, sa qai sega tale e dua tani nai soro ni valavala ca;

²⁷ ko ya ga na waraka e na rere na siga ni lewa, na cudru waqawaqa talega, o qori ena kati ira na meca.

²⁸ O koya sa beca na vunau i Mosese sa mate ga, sa sega tale ni lomani, ni sa beitaka vei koya e rua se tolu na dauveibeitaki:

²⁹ dou vakasama se na vakaevei na kena levu cake ni cudruvi, sa dodonu me yaco vua, o koya sa butuka na Gone ni Kalou, a sa nanuma ni sa ka qeleqelewa na dra ni yeiyalayalati sa vakasavasavataki kina, a sa vakasewasewani koya na Yalo ni loloma?

³⁰ Ni da sa kilai koya sa kaya, Sa noqui tavi me ia na cudru, au na sauma, Sa kaya ko Jiova. Sa kuri talega, Ena lewai ira na nona tamata ko Jiova.

³¹ Sa ka rerevaki me lutu ki na liga ni Kalou bula.

³² Ia dou vakananuma na veisiga eliu, dou a vakararamataki kina ka dou a qai vosota na veivala e na rarawa vakaidina;

³³ e so, ni dou a vakasesevotuni e na veivakalialiai kei na veivakararawataki; ka so, ni dou a tiko vata kei ira era sa vakakina.

³⁴ Ni dou a lomani au ga ni kaʼu sa vesuki, ka reki ni sa kovei na nomudoui yau, ni dou sa kila e na lomamudou ni sa tu ga mai lomalagi na nomudoui yau e vinaka cake kina ka veiqati.

³⁵ O koya o qo mo dou qai kakua ni biuta na nomudou dinata ena levu na kenai sau.

³⁶ Ni sa yaga vei kemudou na vosota, mo dou cakava na ka sa veitaliataka ko na Kalou, ka me nomudou kina na ka ka yalataki.

³⁷ Ni na dede vakalailai, ena qai lako mai ko Koya e lako mai, ka na sega ni dede sara.

³⁸ Ia ena bula na tamata yalododonu e na vakabauta: ia, Kevaka sa suka tani tale, ena sega ni vinakati koya na yaloqu.

³⁹ Ia koi keda, eda sega ni vakai ira sa suka tale yani ki na rusa; eda sa vakai ira ga era sa vakabauta tiko me bula na yalo.