Iperiu 1 - AI VOLA TABU

A WASE I. —Sa tukuna ko Paula ni sa uasivi cake ko Jisu vei ira kecega na parofita kei na agilose, ni sa Luve ni Kalou, 1-14.

¹ SAI ira na parofita ka vosa kina eliu ko na Kalou vei ira na qase, e na gauna e vuqa, kei nai valavala e vuqa:

² ia sai koya na Luvena sa vosa kina ko koya vei keda, e na gauna mai kimuri o qo; o koya sa lesia ko koya mei taukei ni ka kecega, o koya sa bulia talega kina na vuravura kecega;

³ o koya sa ka sa cila kina na nona serau kei na yaloyalo ni nonai tovo, a sa tokona na ka kecega e na nona vosa kaukauwa, a sa tiko sobu e na liga i matau i Koya sa levu sara maicake, ni sa vuya laivi oti vakai koya na nodai valavala ca;

⁴ ni sa yaco me uasivi cake vei ira na agilose, me vaka sa taukena na yaca sa uasivia na nodra.

⁵ Se ko cei vei ira na agilose sa kaya kina ko koya e na dua na siga, A Luvequ ko iko, au sa vakasikavi iko e na siga o qo? sa kuri talega, Ena Tamana koi au, ia ena Luvequ ko koya?

⁶ Ia ni sa kauta mai ko koya na Ulumatua ki vuravura, sa kaya, Me cuva vei koya ko ira kecega na agilose ni Kalou.

⁷ Ia e na vukudra na agilose sa kaya ko koya, O koya sa cakavi ira na nona agilose me cagi, kei ira na nonai talatala me yameyame ni buka.

⁸ Ia e na vuku ni Luvena ga, Ena sega ni mudu na nomui tikotiko-vakaturaga, o iko na Kalou: sai titoko ni caka dodonu nai titoko ni nomu matanitu:

⁹ e na vuku ni ko sa vinakata nai valavala dodonu, ka cata nai valavala ca, sa lumuti iko kina ko na Kalou, a nomu Kalou, e na waiwai ni reki mo uasivi cake kina vei ira na nomui tokani.

¹⁰ Ia, O iko Turaga, ko a tauyavutaki vuravura e nai vakatekivu; ia na cakacaka ni ligamu ko lomalagi:

¹¹ ena rusa o qori; ia ko iko, ko na tiko ga: ia ena madra mai o qori kecega me vaka nai sulu;

¹² o na lobia talega me vaka nai tutuvi, ka na vakaisosomi: ia ko iko ko sai iko tikoga, ia ena sega ni bau mudu na nomu veiyabaki.

¹³ Ia se ko cei vei ira na agilose sa kaya kina ko koya e na dua na siga, Mo tiko e na ligaqu i matau, ka meʼu qisi ira oti mada na nomu meca mei tutu-ni-yavamu?

¹⁴ Era sa sega li ni yalo dauveiqaravi ko ira kecega, sa talai yani me qaravi ira era na yaco emuri mei taukei ni bula?