Filipai 4 - AI VOLA TABU

Sa vakavulici ira e so ko koya, a sa vakavinavinaka ni ra sa lomani koya, 1-20. Sa tinia na nonai vola, 21-23.

¹ O KOYA mo dou qai tu dei vua na Turaga, oi kemudou na wekaqu kaʼu sa daulomana ka daudomona, au sa reki kina, kaʼu sa vakaiukuukutaki kina, oi kemudou kaʼu sa daulomana.

² Au sa masuti Uotia, au sa masuti Sinitiki talega, me rau lomavata e na Turaga.

³ Au sa masuti iko talega, nai tokani dina, mo vukei rau na yalewa o qori, oi rau ka daucakacaka vata kei au e nai tukutuku-vinaka, kei Kilemedi talega, kei ira tale na noqui tokani, sa tu na yacadra e nai vola ni bula.

⁴ Dou reki tikoga vua na Turaga: au sa kaya tale, Dou reki.

⁵ Me kilai na nomudou valomalumalumu vei ira na tamata kecega. Sa voleka ko na Turaga.

⁶ Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na daukere kei na vakavinavinaka.

⁷ Ia na vakacegu ni Kalou, a ya sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.

⁸ Meʼu tinia, na veiwekani, a ka kecega sa dina, na ka kecega e vakaturaga, na ka kecega e dodonu, na ka kecega e savasava, na ka kecega e daulomani, na ka kecega e rogorogo vinaka; kevaka sa dua na ka e vinaka, se na ka e daudokai, dou nanuma na veika o qori.

⁹ A veika dou sa vakatavulici kina, ka vakabauta, ka rogoca, ka raica vei au, dou cakava; ena qai tiko vata kei kemudou na Kalou ni veivakacegui.

¹⁰ Ia kaʼu sa reki vakalevu e na Turaga, ni sa qai tubu cake tale edaidai na nomudou daunanumi au; dou a daunanuma eliu talega, ia ka sa sega ga ni rawa vei kemudou.

¹¹ Au sa sega ni vosa niʼu sa dravudravua: niʼu sa vakatavulici, meʼu vakaleca tiko, ena ka kecega sa yaco vei au.

¹² Au sa kila ruarua na vakadravudravuataki, kei na vakavutuniyautaki kaʼu sa kila: e na veiyasana kei na ka kecega kaʼu sa vakatavulici kina meʼu mamau, meʼu viakana talega, ka meʼu vakavutuniyautaki, meʼu dravudravua talega.

¹³ Au sa rawata na ka kecega e na vuku i Karisito o koya sa vakaukauwataki au.

¹⁴ Ia dou sa caka vinaka ga, ni dou sa solia na ka e so niʼu sa vakararawataki.

¹⁵ Ia dou sa kila talega, na kai Filipai, ni ka vakatekivu nai tukutuku-vinaka, niʼu a lako tani e Masitonia, sa sega e dua nai vavakoso lewe ni soro keitou sa veilakovi kaya, me ia kina na soli kei na taura, koi kemudou duaduaga.

¹⁶ Ia mai Cesalonika dou a talaki vakadua ka vakarua ki na noqu dravudravua.

¹⁷ Ia kaʼu sa sega ni gadreva nai solisoli; ia kaʼu sa gadreva ga na vua me uasivi cake e na vukumudou.

¹⁸ Ia sa tu vei au na ka kecega, ia kaʼu sa vutuniyau: au sa sinai, niʼu sa rawata maivei Epafirotito na veika sa maivei kemudou, a ka boivinaka, ai madrali vinakati, sa vinaka sara vua na Kalou.

¹⁹ Ia na noqu Kalou ena vakarauta kecega na nomudou dravudravua, me vaka na nonai yau levu, e na vuku i Karisito Jisu.

²⁰ Me ia na vakarokoroko vua na Kalou na Tamada, ka tawa mudu. Emeni.

²¹ Me cavu mada na loloma vei ira kecega era sa lotu, era sa tu vata kei Karisito Jisu. Era sa loloma yani vei kemudou ko ira na veiwekani era sa tiko vata kei au.

²² Sa loloma yani vei kemudou ko ira kecega era sa lotu, ka sa vakalevu ko ira na lewe-ni-vale i Sisari.

²³ Me nomudou kecega na loloma ni noda Turaga ko Jisu Karisito. Emeni.