Filipai 2 - AI VOLA TABU

Sa vakarota vei ira ko koya me ra veilomani, ka yalomalumalumu, me vakataki Jisu, 1-11. Me ra gumatua sara me ra bula: me ra yaga talega, 12-18. Sa tukuni Timoci kei Epafirotito vei ira, 19-30.

¹ IA kevaka sa so na veivakacegui e na vuku i Karisito, se so na vakaleca ni loloma, se so na veilomani ni Yalo, se so na dauloloma kei na yalovinaka,

² mo dou vakayacora sara na noqu marau, mo dou lomavata kina, mo dou tautauvata e na loloma, mo dou lomavata, mo dou yalovata.

³ Me kakua ni caka e dua na ka e na veileti se na veidoka-dokai walega; mo dou yalomalumalumu ka dui vakasama ni sa uasivi cake vua ko koya kadua.

⁴ Mo dou kakua ni raica na nomudou ka ga koi kemudou yadua, ia na nodra veika na tamata tani talega, oi kemudou yadua.

⁵ Me tiko e na lomamudou na yalo o qo ka tiko talega vei Karisito Jisu:

⁶ o koya, ni sai tovo vata kei na Kalou, sa sega ni vakasama ni sa butako ni sa vakatauvatani kei na Kalou:

⁷ a sa vakadravudravuataki koya, ka kauta nai tovo ni tamata kaisi, a sa caka me tautauvata kei na tamata:

⁸ ia ni sa kune ni sai tovo vata kei na tamata, sa vakamalumalumutaki koya, a sa talairawarawa me mate, io me mate e na kauveilatai.

⁹ O koya o qo sa vakalevulevui koya cake kina ko na Kalou, a sa solia vua na yaca sa uasivi cake e na yaca kecega:

¹⁰ me tekiduru kina e na yaca i Jisu na duru vakaaduaga, mai lomalagi, kei vuravura, kei na ruku i vuravura;

¹¹ me vakatusa talega na yame kecega ni sa Turaga ko Jisu Karisito, me vakarokorokotaki kina ko na Kalou na Tamada.

¹² Ia koi kemudou, kaʼu sa daulomana, me vaka na nomudou talairawarawa e na veisiga sa oti, dou sa sega ni ia walega niʼu sa tiko vei kemudou, dou sa uasivi cake kina niʼu sa takali, dou kitaka vakakina na cakacaka dou sa bula sara kina, e na rere kei na sautaninini.

¹³ Ni sai koya na Kalou sa cakacaka e na lomamudou me vaka na nona veitalia, mo dou nakita ka kitaka talega.

¹⁴ Me kakua sara na didi kei na veileti e na nomudou cakacaka:

¹⁵ mo dou tawa cala ka tawa veiwaki vata kei na ca, mo dou luve ni Kalou ka tawa beitaki me ca, e na kedra maliwa nai tabatamata takelo ka lomavakatani, mo dou sa cila e na kedra maliwa me vaka na cina e so e vuravura;

¹⁶ ni dou sa taura tiko na vosa ni bula; meʼu reki kina e na siga i Karisito, niʼu sa sega ni cici walega, seʼu daucakacaka walega.

¹⁷ Ia kevaka kaʼu sa sovaraki yani e na nomudou vakabauta ni sa cabo mei madrali, au sa reki kina, ka marau vata kei kemudou kecega.

¹⁸ E na vuku ni ka o qo mo dou reki koi kemudou talega, ka marau vata kei au.

¹⁹ Ia kaʼu sa vakararavi vua na Turaga ko Jisu me voleka na noqu talai Timoci vei kemudou, meʼu vakacegui talega, niʼu sa kila na nomudou tiko.

²⁰ Ni sa sega e dua sa tiko vei au sa yalovata kaya, me daunanuma na nomudou ka e na lomana dina.

²¹ Ni ra sa vakasaqara na nodra ka ko ira kecega, sa sega na ka nei Karisito Jisu.

²² Ia dou sa kilai koya ni sa vakatovolei, ni sa vaka na gone vei tamana, ni sa daucakacaka vata kei au e nai tukutuku-vinaka.

²³ O koya kaʼu sa nakita kina me malua vakalailai kaʼu na qai talai koya, meʼu raica mada se sa vakaevei koi au.

²⁴ Ia kaʼu sa vakararavi vua na Turaga niʼu sa voleka talega koi au meʼu lako yani.

²⁵ Ia kaʼu sa vakasama ni sa dodonu meʼu talai Epafirotito mada vei kemudou, a taciqu, kei na qaui caba e na cakacaka, kei na noqui tokani e nai valu o qo, kei na nomudoui talatala, kei koya sa cakava na ka e rauta na noqu dravudravua.

²⁶ Ni sa domoni kemudou kecega, a sa rarawa ua yalona, ni dou a rogoca ni ka tauvi-mate ko koya.

²⁷ E dina ga ni ka tauvi-mate ka voleka ni ciba: ia ka sa yalovinaka ko na Kalou vei koya; a sa sega walega vei koya, vei au talega, de vakaikuritaki na noqu rarawa e na ka tale e rarawa.

²⁸ 0 koya o qo kaʼu sa gumatua cake kina meʼu talai koya, mo dou reki kina, ni dou sa raica tale, ka me lailai sobu kina na noqu rarawa.

²⁹ O koya mo dou qai kauti koya e na Turaga, e na reki levu sara; ka mo dou vakarokorokotaki ira era sa vakakina:

³⁰ ni sa voleka ni mate ko koya e na vuku ni cakacaka i Karisito, a sa sega ni maninitaka na nona bula, me vakaikuritaka na nomudou cakacaka vei au sa vo tu.