Filipai 1 - AI VOLA TABU

A WASE I. —Sa tukuna vei ira ko Paula ni sa vakavinavinaka e na vukudra, ka daumasulaki ira, 1-11. Sa tukuna ni sa vakacegui ni sa dauvakacacani, 12-26. Sa vakarota vei ira, ka vakacegui ira, 27-30.

¹ OI keirau ko Paula kei Timoci, nai talatala i Jisu Karisito, vei ira kecega era sa lotu mai Filipai, era sa tu vata kei Karisito Jisu, kei ira nai talatala qase, kei ira nai talatala tani:

² Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

³ Au sa vakavinavinaka vua na noqu Kalou e na gauna kecega kaʼu sa nanumi kemudou kina,

⁴ e na veisiga kecega, e na noqu masu kecega, au sa masulaki kemudou e na marau,

⁵ e na vuku ni dou sa lomavata tu e nai tukutuku-vinaka mai nai vakatekivu ka yacova na siga edaidai;

⁶ ia na ka o qo kaʼu sa vakadinata sara, o koya sa vakatekivuna na cakacaka vinaka e na lomamudou, ena kitaka tiko me yaco mada na siga i Jisu Karisito:

⁷ ia ka sa dodonu meʼu vakasami kemudou kecega vakaoqo, ni dou sa tiko e na lomaqu; ni dou sa rawata vata kei au na loloma koi kemudou kecega, niʼu sa vesu tu, ka totaka ka vakadinadinataka nai tukutuku-vinaka.

⁸ Ni sa kila ko na Kalou, niʼu sa domoni kemudou kecega vakalevu e na yalololoma i Jisu Karisito.

⁹ Ia na ka o qo kaʼu sa kerea, me tubu cake vakalevu sara na nomudou loloma e na vuku kei na lewa kecega;

¹⁰ mo dou lewa kina na veika sa dui tani, mo dou yalodina ka tawa cala me yaco mada na siga i Karisito;

¹¹ ni dou sa sinai e na vua ni yalododonu, a ya sa tubu e na vuku i Jisu Karisito, me vakarokorokotaki ka vakavinavinakataki ko na Kalou.

¹² Ia kaʼu sa vinakata, me kila koi kemudou, na veiwekani, ni sa tubu cake nai tukutuku-vinaka e na vuku ni ka sa yaco vei au;

¹³ a sa vakaraitaki kina na noqu vesuki e na vuku i Karisito e na vale taucoko ni tui, vei ira talega na tamata tani kecega;

¹⁴ a ra sa lewe vuqa kina na veiwekani era sa tu vata kei na Turaga, era sa gumatua mai e na vuku niʼu sa vesuki, a ra sa doudou cake kina me ra tukuna na Vosa ka tawa bau rere.

¹⁵ E dina ga ni sa so era sa vunautaki Karisito ni ra sa dauvuvu ka dauveileti, e so talega ni ra sa lomavinaka;

¹⁶ sa vunautaki Karisito ko ira e so ni ra sa dauveileti, sa sega ni lomadina, sa nakita ga mo vakaikuritaka na noqu vesu e na ka rarawa e so;

¹⁷ e so tale e na loloma, ni ra sa kila niʼu sa lesi meʼu totaka nai tukutuku-vinaka.

¹⁸ Ia ka vakaevei? sa takiveivinaka, se ra vakailasu, se ra dina, sa vunautaki ko Karisito: ia na ka o qo kaʼu sa rekitaka, io, kaʼu na rekitaka tikoga.

¹⁹ Niʼu sa kila ni na yaco na ka o qo me ka meʼu bula kina, e na vuku ni nomudou masu, kei nai solisoli ni Yalo i Jisu Karisito,

²⁰ me vaka na ka kaʼu sa dauwaraka ka vakanuinuitaka meʼu kakua ni madua e na dua na ka, meʼu doudou sara ga, me vaka eliu, me vakakina edaidai me vakalevulevui ko Karisito e na vuku ni yagoqu, se sa bula, se sa mate.

²¹ Ni sai koya ko Karisito kaʼu sa bula kina; ia sa ka vinaka kevaka kaʼu sa mate.

²² Ia kevaka sa vua na noqu cakacaka niʼu sa bula vakayago o qo, au sa qai sega ni kila na ka meʼu digitaka.

²³ Niʼu sa lomalomarua e na ka e rua, niʼu sa gadreva meʼu lako yani, ka tiko vata kei Karisito; a ya sa vinaka cake sara:

²⁴ ia ka sa yaga cake vei kemudou meʼu tiko ga vakayago.

²⁵ Ia niʼu sa vakadinata o qo, au sa kila niʼu na tiko ga, ka tiko vata kei kemudou kecega, mo dou tubu cake kina e na marau ni vakabauta;

²⁶ me levu cake e na vukuqu na nomudou rekitaki Jisu Karisito, e na noqu tiko vata tale kei kemudou.

²⁷ Mo dou ia ga nai valavala sa kilikili kei nai tukutuku-vinaka kei Karisito: meʼu rogoci kemudou kina, seʼu lako ka raici kemudou, seʼu tiko tani, ni dou sa tu dei e na yalovata, ka gumatua vata e na lomavata me tubu na vakabauta ni tukutuku-vinaka;

²⁸ me kakua ni vakarerei kemudou ko ira na nomudou meca e na dua na ka o qori nai vakatakilakila vei ira ni ra na rusa, ia vei kemudou ni dou na bula, ia o qo mai vua na Kalou.

²⁹ Ni sa soli vei kemudou e na vuku i Karisito, e segai walega mo dou vakabauti koya, mo dou vosota talega na ca e na vukuna;

³⁰ ni sa nomudou na veivala dou sa raica eliu vei au, ka dou sa rogoca edaidai vei au.