Filimoni 1 - AI VOLA TABU

Sa reki ko Paula ni sa lotu dina ko Filimoni, 1-7. Sa masuti koya me lomani Onisimo tale e na vukuna, ni sa qai lotu dina, 8-21. Sa kaya ni na laʼki raici koya ko Paula, a sa tinia na nonai vola, 22-25.

¹ O PAULA, sa vesu tu e na vuku i Karisito Jisu, kei Timoci na wekaqu, vei Filimoni o koya keirau sa daulomana, kei na neiraui tokani,

² vei Afia talega o koya keirau sa daulomana, vei Arikipo talega na neiraui tokani e nai valu o qo, vei ira talega nai vavakoso lewe ni soro era sa tiko e na nomu vale:

³ Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

⁴ Au sa vakavinavinaka vua na noqu Kalou, niʼu sa cavuti iko e na veisiga e na noqu masu;

⁵ niʼu sa rogoca na nomu loloma kei na vakabauta sa nomu, ki na Turaga ko Jisu, kivei ira kece talega era sa lotu;

⁶ me mai kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, e na vuku i Karisito Jisu.

⁷ Ni sa levu na neitou reki kei na vakacegu e na vuku ni nomu loloma, na wekaqu, ni ko sa vakalecataka na lomadra era sa lotu.

⁸ Ia o qo, e dina ya ni sa rawa meʼu doudou vakalevu e na vuku i Karisito meʼu vakarota vei iko na ka e kilikili;

⁹ ia e na vuku ni veilomani ga kaʼu sa vinakata cake kina me vakamamasu, niʼu sa vakaoqo ko Paula na qase, ia kaʼu sa qai vesu talega edaidai e na vuku i Jisu Karisito.

¹⁰ Au sa vakamasuti iko e na vuku ni luvequ ko Onisimo, o koya kaʼu sa vakasikava niʼu sa vesu tu: (

¹¹ o koya sa tawa yaga eliu vei iko, a sa qai yaga vei iko, vei au talega:)

¹² au sa qai tala tale: o koya o qo mo qai vinakati koya, ni sa vaka na lewequ dina sara:

¹³ au sa via taura ga me tiko vei au, me kemui sosomi ni sa qaravi au niʼu sa vesu tu e na vuku ni tukutuku-vinaka:

¹⁴ ia niʼu sa tawa kila na yalomu, au sa sega ni via cakava e dua na ka: me kakua ni vaka na ka sa vakasaurarataki na nomu loloma, ni sa lomamu ga kina.

¹⁵ Ni sai koya beka o qo sa lako tani vakalekaleka kina, mo rawai koya tale ka tawa mudu;

¹⁶ me kakua ni vaka na tamata walega, a sa uasivi cake e na tamata walega, a wekamu lomani, e vakalevu vei au, ia ka vakaevei vei iko, e na ka vakavuravura, kei na ka ni Turaga talega?

¹⁷ Ia o qo, kevaka ko sa vakasami au niʼu sai tokani, mo vinakati koya me vakai au.

¹⁸ Kevaka sa vakacacani iko ko koya e na dua na ka, se sa dua na ka sa tawa vakaivolitaka, okata o qori vei au;

¹⁹ oi au ko Paula, au sa vola e na ligaqu dina, au na vakaivolitaka: ia kaʼu sa sega ni kaya vei iko ni sa dodonu ga me noqu ko iko talega.

²⁰ Io, na wekaqu, meʼu rekitaki iko mada e na Turaga: vakalecataka na lomaqu e na Turaga.

²¹ Ni kaʼu sa vakadinata ni ko na talairawarawa, kaʼu sa vola kina vei iko, niʼu sa kila ko na kitaka na ka kaʼu sa kaya ka uasivi cake kina.

²² Mo vakarautaka talega e dua na vale meʼu moce kina: niʼu sa dinata kaʼu na soli vei kemudou e na vuku ni nomudou masu.

²³ Eratou sa loloma yani vei iko ko Epafira, keirau sa vesuki kaya e na vuku i Karisito Jisu;

²⁴ ko iratou na noqui tokani, ko Marika, ko Arisitariko, ko Tima, ko Luke.

²⁵ Me tiko kei na yalomudou na loloma ni noda Turaga ko Jisu Karisito. Emeni.