Esiteri 4 - AI VOLA TABU

Sa tagi ko Moritikei; ka sa vaka ko koya me mai vakamamasu vua na tui ko Esiteri.

¹ NI sa kunea ko Moritikei na ka kecega sa caka, sa dresulaka na nonai sulu ko Moritikei, ka suluma nai sulu taqarotu ka vakadravusa, ka lako yani ki loma ni koro, ka tagi vakadomoilevu ka vakararawa;

² ka lako sara mai ki na mata ni nona matamata-ni-koro na tui: ni sa tabu me curu e dua ki na matamata-ni-koro ni tui ni sa vakaisulu taqarotu.

³ Ia e na qali kecega, sa yaco kina na vunau ni turaga kei na ka sa lesia ko koya, sa ia na tagi levu ko ira na Jiu, ka ra sa lolo, ka tagi yaso, ka qoqolou; ka lewe vuqa era sa koto e nai sulu taqarotu kei na dravusa.

⁴ A sa tukuna vei Esiteri ko ira na nona vada kei ira na nona mata. Sa qai rarawa vakalevu na yalona na ranadi; a sa vakauta ko koya nai sulu me vakasulumi Moritikei, ka me kauta tani vua na nonai sulu taqarotu: a sa sega ni tara ko koya.

⁵ Ta ko Esiteri sa qai kacivi Etaki, e dua vei ira na nona mata na tui, ka lesia ko koya me qaravi koya, na ranadi, a sa tauca vua na vosa me kauta vei Moritikei, me kila se cava o qori, ka vakaevei.

⁶ A sa lako yani ko Etaki vei Moritikei ki na salatu ni koro, a ya e na mata ni nona matamata-ni-koro na tui.

⁷ A sa tukuna vua ko Moritikei na ka kecega sa yaco vua, kei nai lavo sa yalataka ko Amani me solia ki na nona vale ni yau na tui e na vukudra na Jiu, me vakarusai ira.

⁸ Sa solia talega vua nai vola ni vakaro sa ia mai Susani me vakarusai ira, me vakatakila vei Esiteri, ka me tukuna vua, me vakaroti koya talega me curu vua na tui, me vakamasuti koya, ka kerekere e matana e na vukudra na kai nona.

⁹ A sa lako ko Etaki ka tukuna vei Esiteri na vosa i Moritikei.

¹⁰ A sa vosa vei Etaki ko Esiteri, ka tauca vua nai vakaro vei Moritikei, ka vaka:

¹¹ Era sa kila ko ira kece na nonai talatala na tui, kei ira na tamata e nona veiqali na tui, kevaka sa curu yani e dua, se tagane se alewa, vua na tui ki nona yasana eloma, ni sa sega ni kacivi, sa dua ga na nona vosa, ka me vakamatei, sa vo ga ko koya sa dodoka kina ko na tui nai titoko koula, me bula kina ko koya: ia koi au, sa qai tolusagavulu na bogi kaʼu sa sega kina ni kacivi me curu yani vua na tui.

¹² A sa tukuni vei Moritikei na vosa i Esiteri.

¹³ A sa vaka ko Moritikei me kainaki vei Esiteri, Mo kakua ni nanuma ni ko na bula e na vale ni tui, mo kakua kina ni vakataki ira kece na Jiu.

¹⁴ Ia kevaka ko sa galu sai a e na gauna o qo, ena qai yaco na lalaga kei na bula vei ira na Jiu, mai na dua na yasana tani; ia ena vakarusai ga ko iko kei na mataqali ni tamamu: ia ko cei e kila, de ko sa yaco beka me ranadi e na vuku ni gauna o qo?

¹⁵ Sa qai kaya ko Esiteri me ra vaka vei Moritikei,

¹⁶ Mo lako, mo vakasoqoni ira vata kece na Jiu era tiko e Susani, ka mo dou lolovaki au, ia me ra kakua ni kana se gunu e na bogi se na siga, ka bogi tolu: oi au talega kei iratou na noqu gonealewa keitou na lolo talega; ia kaʼu na qai curu yani vua na tui, a ya sa sega ni vaka na vunau: ia kevaka kaʼu sa mate, au sa mate.

¹⁷ A sa lako yani ko Moritikei, ka kitaka me vaka na ka kecega ka vakarota vua ko Esiteri.