Esiteri 1 - AI VOLA TABU

A WASE I. Sa ia na solevu ko Easiverosi na tui Perisia, a sa vakasivoi ko Vasiti na ranadi.

¹ ASA yaco e na gauna i Easiverosi o qo ko Easiverosi ka lewa mai Idia ka yacovi Kusi, na nona qali e dua na drau ka ruasagavulu ka vitu:

² io e na gauna ko ya, ni sa tiko na tui ko Easiverosi e nai tikotiko vakaturaga ni nona matanitu, a ya mai Susani na koro vakaturaga,

³ e nai katolu ni yabaki ni nona lewa, sa ia ko koya e dua na solevu vei ira kecega na nona turaga kei ira era qaravi koya; sa tiko e matana ko ira na mataniveilewai ni Perisia kei Metia, o ira na tamata turaga, kei ira na turaga ni veiqali:

⁴ a sa vakatakila tiko ko koya ka bogi vuqa, io ka bogi e dua na drau ka walusagavulu, na yau ni nona matanitu vakaiukuuku, kei na ka e daudokai e na nona ka vakaturaga-levu e talei.

⁵ Ia ni sa oti na veibogi o qori, sa qai ia na solevu ko na tui ka bogi vitu, vei ira kecega na tamata era tiko mai Susani na koro vakaturaga, vei ira na lelevu kei ira na lalai, e na lomanibai ni were ni nona vale na tui;

⁶ sa tu kina na gatu vulavula, ka karakarawa, ka loaloa, a sa buki e na wa laino matailalai, ka karakarawa, ki na mama siliva kei na duru vatu vulavula: sa koula ka siliva na veimocemoce, e na rara-vatu vulavula ka veivolavolai sa solo.

⁷ A ra sa solia na ka-ni-gunu e na veibilo koula, (a veibilo sa dui vakaisosomitaka) kei na waini vakaturaga e levu, me vaka nai valavala vakatui.

⁸ A sa ia na gunu me vaka na vunau; sa sega e vakasaurarataki; ni sa vakakina na vosa ni tui vei ira kece era lewa e nona vale, me ra kitaka me vaka na veitalia ni tamata yadua.

⁹ O Vasiti talega na ranadi sa ia na solevu vei ira na alewa e na vale ni matanitu sa nei Easiverosi na tui.

¹⁰ E na kenai kavitu ni siga, ni sa ma-marau na lomana na tui e na waini, sa vakaroti Miumani, kei Piseca, kei Aripona, kei Pikica, kei Epikica, kei Secari, kei Karikasi, o ira na mata e lewe vitu sa dauia na veiqaravi e na mata i Easiverosi na tui,

¹¹ me ratou kauti Vasiti na ranadi ki na mata ni tui, ni sa vakaisala tu e nai sala vakatui, me vakatakila na nona saweka vei ira na tamata kei ira na turaga: ni sa matavinaka ko koya.

¹² Ia ka sa bese ni lako mai ko Vasiti na ranadi e nai vakaro ni tui ka tukuna ko ira na mata: a sa cudru sara kina na tui, a sa waqa e lomana na nona cudru.

¹³ Sa qai kaya na tui vei ira na tamata vuku, era sa daukila na veigauna, (ni sa dauvakakina nai valavala ni tui vei ira kecega era daukila na vunau kei na lewa:

¹⁴ a sa voleka vua ko Karisina, ko Secari, ko Etimaca, ko Tarisisi, ko Meresi, ko Marisina, ko Mimukani, eratou turaga e lewe vitu ni Perisia kei Metia, eratou sa dauraica na mata ni tui, o iratou sa tiko me liu e na matanitu;)

¹⁵ A cava na ka me caka vei Vasiti na ranadi me vaka na vunau, e na vuku ni sa sega ni vakayacora ko koya nai vakaro ni tui ko Easiverosi ka tukuna ko ira na mata?

¹⁶ A sa vosa ko Mimukani e na matadra na tui kei ira na turaga, Sa segai vua ga na tui sa caka cala kina ko Vasiti na ranadi, a ya vei ira kece talega na turaga, kei ira kecega na tamata e na veiqali kece i Easiverosi na tui.

¹⁷ Ni na cacavaki vei ira na alewa kecega na ka e cakava na ranadi, era na beca kina na watidra e matadra, ni sa rogovaki ni ka vakarota ko Easiverosi na tui vei Vasiti na ranadi, me kauti mai ki na matana, a sa sega ni lako mai ko koya:

¹⁸ ia era na vosa vakakina edaidai ko ira na marama ni Perisia kei Metia vei ira kece na nona turaga na tui, o ira era sa rogoca na ka sa cakava na ranadi. Ena levu kina na be kei na cudru.

¹⁹ Kevaka e vinakata ko na tui, me lako tani vua e dua nai vakaro vakatui, ia me volai vata kei na nodra vunau na kai Perisia kei na kai Metia, me kakua ni vukici, Ka me kakua ni lako tale mai ko Vasiti ki na mata ni tui ko Easiverosi, ia mo solia ko na tui na nona yau vakaranadi vua e dua tani sa vinaka cake vei koya.

²⁰ Ia ni sa tukuni yani e na nona matanitu taucoko na vunau sa kitaka na tui, (ni sa matanitu levu,) era na qai vakarokorokotaka na watidra ko ira na alewa kecega, ko ira na lelevu kei ira na lalai.

²¹ A sa vinakata na vosa ko koya na tui kei ira na turaga; a sa ia na tui me vaka na vosa i Mimukani:

²² ni sa vakauta nai vola ki na nona qali kecega na tui, io ki na qali yadua me vaka na kenai volavola, kei na matanitu kecega me vaka na nodra dui vosa, ka me lewa ko ira yadua na tagane e nona vale, ka vosataka na vosa ni kai nona.