Efeso 6 - AI VOLA TABU

Me dautalairawarawa ko ira na gone kei ira nai talatala vei ira na nodra qase, me ra yalovinaka talega na qase vei ira, 1-9. Me da taura kecega nai yaragi ni Kalou, 10-20. Sa tukuni Tikiko vei ira ko koya, a sa tinia na nonai vola, 21-24.

¹ OI kemudou na gone, dou talairawarawa vei ira na nomudou qase e na ka sa vinaka vua na Turaga: ni sa dodonu o qo.

² Mo vakarokoroko vei rau na tamamu kei na tinamu; (o qori na vunau taumada sa vakaikuritaki e na vosa ni yalayala;)

³ mo vinaka kina, mo bula vakadede talega e vuravura.

⁴ Oi kemudou talega na qase, dou kakua ni vakacudrucudrui ira na nomudou gone: ia dou vakavulici ira e ua vunau kei nai vakavuvuli ni Turaga.

⁵ Oi kemudou na tamata, dou talairawarawa vei ira na nomudou turaga vakayago, e na rere kei na sautaninini, e na loma e dua bauga me vaka vei Karisito;

⁶ mo dou kakua ni makutu e matadra ga na turaga, mo dou vinakati kina vakatamata; ia me vaka dou sa tamata i Karisito, mo dou cakava na veitalia ni Kalou mai na vu ni yalomudou,

⁷ ni sa vinakata tiko na lomamudou; ka me vaka vei koya na Turaga, ka sega vei ira na tamata, dou sa makutu kina:

⁸ ni dou sa kila na ka vinaka kecega ena cakava ko na tamata yadua, se bobula sei taukei, ena saumi vakakina mai vua na Turaga.

⁹ Oi kemudou talega, na turaga, dou kitaka vakakina vei ira, ka kakua ni vosavaka-cudrucudruya: ni dou sa kila sa tiko mai lomalagi na nomudou Turaga; a sa sega ni vinakata e dua vakailoa ko koya.

¹⁰ Meʼu tinia, oi kemudou na wekaqu, dou kaukauwa e na Turaga, kei na kena levu ni nona kaukauwa.

¹¹ Dou tama kecega nai yaragi ni Kalou, mo dou tu dei rawa ka vorata nai lawaki ni tevoro.

¹² Ni sa sega ni ko ira na tamata eda sa veivala kina, a ya ga ko ira era sa liu, ko ira era sa kaukauwa, ko ira era sa veitaliataka na butobuto kei vuravura o qo, ko ira na yalo ca e na veiyasana vakalomalagi.

¹³ O koya mo dou qai kauta kecega nai yaragi ni Kalou, mo dou vorata rawa kina e na siga ca, ia ni dou sa ia kece oti mo dou tu dei.

¹⁴ O koya mo dou qai tu dei, ni sa vauci tu na tolomudou e na lomadina, ka sa tu e na lomaseremudou nai vakaruru ni valavala dodonu;

¹⁵ ka sa vakaivava na yavamudou me vaka na cakacaka ni tukutuku-vinaka ni veivinakati;

¹⁶ mei kuri, mo dou kauta na vakabauta mei sasabai dou na bokoca rawa kina na gasau vidi kecega ni tevoro,

¹⁷ ka kauta na bula mei vakaruru ni ulu, kei nai seleiwau ni Yalo, o qori na vosa ni Kalou:

¹⁸ dou masu tikoga e na masumasu kecega kei na daukerekere e na Yalo, ka yadrava tu kina e na gumatua kece kei na daukerekere e na vukudra kecega na tamata lotu;

¹⁹ e na vukuqu talega me soli ga vei au meʼu vosa rawa, me dalaga na gusuqu, meʼu doudou meʼu tukuna na ka vuni ni tukutuku-vinaka,

²⁰ a ya kaʼu sa talai meʼu vunautaka, oi au sa vesu tu; meʼu vosataka vakadoudou, me vaka ni sa kilikili kei au me vosa.

²¹ Ia mo dou kila talega na noqu tiko, io, na noqui valavala, ena tukuna na ka kecega vei kemudou ko Tikiko, na wekaqu daulomani kei nai talatala yalodina ni Turaga;

²² o koya kaʼu sa tala vei kemudou e na vuku ni ka o qo, mo dou kila kina na neitou tiko, me vakaceguya talega na yalomudou ko koya.

²³ Me nodra na veiwekani na vakacegu, kei na loloma, kei na vakabauta, mai vua na Kalou ko Tamada kei na Turaga ko Jisu Karisito.

²⁴ Me tu na loloma vei ira kecega era sa lomana na noda Turaga ko Jisu Karisito e na lomadina. Emeni.