Efeso 5 - AI VOLA TABU

Sa vakarota vei ira ko koya vue ra dauloloma, 1, 2; me ra biuta kece sara na nodrai valavala makawa, me tu ga vei ira na vua ni Yalo, 3-14. Me ra yalomatua ka sinai e na Yalo, 15-21. Me ra veilomani dina na veiwatini, 22-33.

¹ O KOYA o qo mo dou qai vakadamuri-muria na Kalou, me vakataki ira na gone ni toko;

² ka dou ia tikoga nai valavala ni loloma, me vaka ni sa loloma talega ko Karisito vei keda, a sa soli koya e na vududa mei madrali kai soro vua na Kalou mo ka boivinaka.

³ Ia na dauyalewa, kei na ka kecega sa velavela, kei na daukocokoco, me kakua ni cavu e na kemudou maliwa, me vaka sa kilikili kei ira era sa lotu;

⁴ me kakua talega na vosavakasisila, se na veivosaki lialia, se na veiwali, a ka o qori sa tawa kili; me ia ga na vakavinavinaka.

⁵ Ni dou sa kila ga na ka o qo, ni na sega sara na nonai votavota e na matanitu nei Karisito kei na Kalou, e dua na daudara, se dua sa velavela, se dua na daukocokoco, ni sa dauqarava na kalou lasu ko koya o qo.

⁶ Me kakua ni vakacalai kemudou e dua e na vosa walega; ni sa veika o qo sa yaco kina na cudru ni Kalou kivei ira sa dautalaidredre.

⁷ O koya mo dou qai kakua ni malele kei ira.

⁸ Ni dou a butobuto eliu, ia dou sa qai rarama e na Turaga; mo dou ia tiko nai valavala ni gone ni rarama: (

⁹ ni sa vua ni Yalo nai valavala vinaka kecega kei nai valavala dodonu kei na ka dina:)

¹⁰ ni dou vakatovolea na ka sa vinaka vua na Turaga.

¹¹ Ia dou kakua ni malele kei ira sa dauia nai valavala butobuto sa tawa yaga, ka dou vunauca ga.

¹² Ni sa ka e veivakamaduataki me da vosataka na veika era sa daukitaka vuni.

¹³ Ia na ka kecega o qori sa vunauci, sa vakavotui e na rarama; ni sa rarama na ka kecega sa vakavotuya na ka.

¹⁴ 0 koya o qo sa kaya kina ko koya, O iko sa moce mo yadra mai, ka tu cake mai na mate, ena qai vakararamataki iko ko Karisito.

¹⁵ O koya mo dou qai raici kemudou vinaka, mo dou valavala vakadodonu, mo dou kakua ni vakataki ira na lialia, mo dou vakataki ira ga na vuku,

¹⁶ mo dou volia me nomudou na gauna, e na vuku ni sa ca na veisiga o qo.

¹⁷ O koya mo dou qai kakua ni sesewa, mo dou kila ga na loma ni Turaga.

¹⁸ Ia dou kakua ni mateni e na waini, ni sa ia kina na ka vakasisila; dou vakasinaiti ga e na Yalo;

¹⁹ ka dou veivosaki vakai kemudou e na veisere kei na vosa sa vakakina kei na veimeke vakayalo, ka dou seretaka na sere e laga vinaka e na yalomudou vua na Turaga:

²⁰ ka dou vakavinavinaka tiko e navuku ni ka kecega vua na Kalou kei na Tamada e na yaca ni noda Turaga ko Jisu Karisito;

²¹ ka dou dui vakamalumalumutaki kemudou e dua vua na dua e na rere m na Kalou.

²² Oi kemudou na watina-yalewa, dou dui vakamalumalumutaki kemudou vua na watimudou, me vaka vei koya na Turaga.

²³ Ni sa ulu ni watina-yalewa na watina-tagane, me vaka ni sa ulu ni vavakoso lewe ni soro ko Karisito, ia nai Vakabula talega ni yago ko koya.

²⁴ Ia ka me vaka sa malumalumu nai vavakoso lewe ni soro vei Karisito, me ra vaka talega kina na watina-yalewa vei ira na watidra e na ka kecega.

²⁵ Oi kemudou na watina-tagane, lomani ira na watimudou, me vaka ni sa lomana nai vavakoso lewe ni soro ko Karisito, a sa soli koya e na vukuna;

²⁶ me vakasavasavataka ka derea ni sa vuya e na wai vata kei na vosa,

²⁷ me vakarairaitaka kina vei koya mei vavakoso lewe ni soro e serau sara, me kakua ni tauvi-dokobea, se na wasalulu, se dua na ka e vakakina; me savasava ka tawa ca.

²⁸ E kilikili kei ira na tagane me ra lomani ira vakakina na watidra, me vaka na yagodra dina. O koya sa lomana na watina sa lomani koya vakai koya.

²⁹ Ni sa sega e dua sa cata na yagona dina; a sa vakania ka susuga, me vaka sa ia na Turaga talega ki nai vavakoso lewe ni soro:

³⁰ ni da sa tiki ni yagona, a lewena, kei na suina.

³¹ E na vuku ni ka o qo ena biuta kina ko na tamata na tamana kei na tinana, a rau na dua vata kei na watina, a rau na lewe dua bauga.

³² Sa ka vuni sara o qo: ia kaʼu sa vosataki Karisito kei nai vavakoso lewe ni soro.

³³ Ia ka mo dou dui lomana yadua na watina me vakataki koya; ia na yalewa, me vakarokorokotaka na watina ko koya.