Efeso 4 - AI VOLA TABU

Sa vakarota vei ira ko koya me ra veilomani, a sa tukuna ni sa qisi ira na nonai talatala ko na Kalou me ra dui vakaitavi e na cakacaka, 1-16. Sa qai vakarota vei ira me ra kakua ni muria na veimatanitu era sa tawa lotu, 17-32.

¹ O KOYA o qo kaʼu masuti kemudou kina, oi au sa vesu tu e na vuku ni Turaga, mo dou ia tiko me vaka sa kilikili kei nai valavala dou sa kacivi kina,

² mo dou yalomalumalumu sara ka yalomalua, mo dou vosota vakadede ka veivosoti vakai kemudou e na loloma;

³ mo dou gumatua sara mo dou maroroya na lomavata ni Yalo, ni dou sa vauci vata e na veivinakati.

⁴ Sa dua bauga nai vavakoso, ka dua bauga na Yalo, me vaka dou sa kacivi ki nai nuinui e dua bauga ni dou a kacivi;

⁵ sa dua bauga na Turaga, sa dua bauga na vakabauta, sa dua bauga na veipapitaisotaki,

⁶ sa dua bauga na Kalou na Tamada kecega, o koya sa veitaliataka na ka kecega, a sa curuma na ka kecega, ka tiko e na lomamudou kecega.

⁷ Ia ka sa soli vei keda yadua na loloma me vaka nai vakarau ni solisoli nei Karisito.

⁸ O koya o qo sa kaya kina ko koya, Ni sa lako ki cake ko koya, sa vakabobulataki ira e lewe vuqa me ra bobula, a sa solia nai solisoli e so vei ira na tamata. [

⁹ Ia na nona lako cake o qo, sa cava beka, a ya ga ni sa lako sobu talega eliu ko koya ki na yasa i vuravura era?

¹⁰ O koya ga sa lako sobu mai sai koya talega ka lako cake me yawasivita kece na lomalagi, me vakasinaita kina na ka kecega.]

¹¹ Ia sai koya sa solia e so, me rai apositolo; ka so, me ra dauvosa e na Yalo; ka so, me ra tamata vunau; ka so, me rai vakatawa kai vakavuvuli:

¹² me ra vakavinakataki kina ko ira sa lotu, me ia na cakacaka ni talatala, me vakatataki cake nai vavakoso nei Karisito:

¹³ me da yaco sara koi keda kecega me da lomavata e na vakabauta, ka kila sara na Luve ni Kalou, me da tautauvata kei nai vakarau ni tamata dina, era sa sinai sara kei Karisito:

¹⁴ me da kakua ni vagonegonea tiko, ka veitosoyaki ka veikauyaki e na cagi kecega ni vakavuvuli, e nai lawaki ca ni tamata, e na dauveivaqaseni sa nakiti kina na veivakacalai;

¹⁵ ia me da ia na ka dina e na yalololoma, me da tubu cake vei koya e na ka kecega, vei koya ga na uluda, o Karisito:

¹⁶ o koya sa sema vata maikina na yago taucoko, ka vauci vata, e na vuku ni ka yaga sa cakava nai sema yadua, me vaka na ka sa cakava sara na tikina kecega ni sa dui vakaitavi, a sa vakatuburi cake ki na yago tabu ni sa vakatataki cake vakai koya e na loloma.

¹⁷ O koya o qo kaʼu sa vosa kina, ka vakarota matua kina e na vuku ni Turaga, mo dou kakua ni valavala tiko me vakataki ira na veimatanitu tani, e na lomadra lialia,

¹⁸ ni sa vakabutobutotaki na lomadra, a ra sa tawa veiriti kei na bula sa mai vua na Kalou, e na vuku ni lialia sa tu e na yalodra, e na vuku ni sa kaukauwa na lomadra:

¹⁹ ia ni ra sa tawa madua rawa, era sa soli ira ki na cakacaka vakasisila, me ra cakava na ka kecega sa tawa-savasava ni ra sa dau-garova.

²⁰ Ia koi kemudou, dou a sega ni rawata vakaoqo nai vakavuvuli kei Karisito;

²¹ kevaka dou a rogoci koya, ka sa vakatavulici vei koya, me vaka na dina sa tu vei Jisu:

²² e na vuku ni valavala eliu, mo dou luvata tani kina na tamata makawa, a ya sa ca mai e na vuku ni gadreva ca sa veivakaisini;

²³ mo dou vakavoui mai e na yalomudou kei na lomamudou;

²⁴ ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.

²⁵ O koya ga o qo ni dou sa biuta tani kina na lasu, me vosa dina na tamata yadua vua na kai nona: ni da sa tikina vata vakai keda.

²⁶ Ni dou sa cudru, kakua ni valavala ca; me kakua ni dromu na mata-ni-siga ni dou sa cudru tiko:

²⁷ kakua talega ni lalaga vua na tevoro.

²⁸ Me kakua ni butako tiko ko koya ka daubutako, ka me daucakacaka ga, ka kitaka e na ligana na ka sa yaga, me so kina na nona ka me soli vei koya sa dravudravua.

²⁹ Me kakua ni lako mai na gusumudou e dua na vosa velavela, o koya ga sa vinaka me ia kina na veivakatataki, me vaka na kena yaga, me yaco kina na vinaka vei ira era sa rogoca.

³⁰ Ia dou kakua ni vakararawataka na Yalo Tabu ni Kalou, o koya dou sa dregati kina me yaco mada na siga ni bula.

³¹ Me biu tani kece vei kemudou na yaloca, kei na cudrucudru, kei na daunene, kei na veiba, kei na vosavakacaca, kei na ca kecega sa vakakina:

³² ia dou veilomani vakai kemudou, dou lomavinaka, dou kakua ni veicudruvi, me vaka sa sega ni cudruvi kemudou na Kalou e na vuku i Karisito.