Efeso 3 - AI VOLA TABU

Sa tukuna ko koya ni ka vakatakila vei koya ko na Kalou na nona lewa me ra bula na veimatanitu, ka sa digitaki koya me vakavulici ira, 1-13. Sa masumasu ko koya, 14-21.

¹ E NA vuku ni ka o qo koi au ko Paula, sa nei Karisito Jisu, ka sa vesu tu e na vukumudou sa matanitu kisau,

² ni dou a rogoca beka se sa vakaevei na loloma ni Kalou sa soli mai vei au e na vukumudou;

³ ni sai vakavuvuli macala sa vakatakila kina ko koya vei au na ka ka vuni tu: (me vaka kaʼu a vola vakalailai eliu,

⁴ ka dou na kila rawa kina, ni dou sa wilika, se sa cava na noqu vuku e na ka vuni kei Karisito;)

⁵ o qori sa tawa vakatakilai vei ira na tamata e na gauna sa oti, me vaka sa qai vakatakilai e na Yalo vei ira na nonai apositolo yalosavasava kei ira sa dauvosa e na Yalo;

⁶ ni ra sai taukei vata na veimatanitu kisau, ka sa mataveiwekani vata, ka sa rawata vata talega na ka sa yalataka ko koya, e na vuku i Karisito, me vaka nai tukutuku-vinaka:

⁷ a ya kaʼu a qisi kina meʼu kenai talatala, me vaka nai solisoli ni loloma ni Kalou, sa soli mai vei au e na cakacaka yaco ni nona kaukauwa:

⁸ vei au, oi au sa uasivi sobu sara vei ira kecega era sa lotu, sa soli kina na loloma o qo, meʼu vunautaka vei ira na veimatanitu nai yau i Karisito, a ya sa tawa kilai rawa;

⁹ ka meʼu vakarairaitaka vei ira na tamata kecega se sa vakaevei na ka ka vuni tu, a ya ka vunia mai nai vakatekivu kei vuravura ko na Kalou, o koya erau sa bulia vata kei Jisu Karisito na ka kecega:

¹⁰ me yaco kina, e na gauna o qo, nai vavakoso lewe ni soro, mei vakatakilakila vei ira na turaga kei ira sa kaukauwa e na veiyasana vakalomalagi, ni sa takiveivinaka sara na vuku ni Kalou,

¹¹ me vaka nai naki sa tawa tekivu eliu, a ya sa nakita ko koya e na vuku i Karisito Jisu na noda Turaga:

¹² o koya, ni da sa vakabauti koya, eda sa doudou kina ka toro voleka e na vakararavi.

¹³ O koya o qo sa yaloqu kina mo dou kakua ni ceguoca niʼu sa vakararawataki e na vukumudou, a ya sa ka mo dou reki kina.

¹⁴ E na vuku ni ka o qo kaʼu sa tekiduru kina vei koya na Tama ni noda Turaga ko Jisu Karisito,

¹⁵ o koya era sa vakayacani kina na mataqali taucoko mai lomalagi kei vuni vura,

¹⁶ me solia vei kemudou ko koya, me vaka na vutu ni nona vinaka, me vakaukauwataki kemudou e na Yalona mo dou kaukauwa eloma;

¹⁷ me tiko ga e na lomamudou ko Karisito e na vakabauta; mo dou vakawaka ka tauyavutaki e na loloma,

¹⁸ ka rawata kina me kila vata kei ira kecega era sa lotu, se cava na kena raraba, kei na kena babalavu, kei na kena titobu, kei na kena cecere;

¹⁹ ka me kila na loloma i Karisito, a ya sa uasivi cake e na ka e kilai rawa; mo dou sinai me vaka sara sa sinai na Kalou.

²⁰ Ia vei koya, sa rawata me cakava na ka sa uasivi cake vakalevu sara e na ka kecega eda sa kerea se vakasama, me vaka na kaukauwa sa cakacaka yaco e na lomada,

²¹ vei koya me ia na vakarokoroko e nai vavakoso lewe ni soro e na vuku i Karisito Jisu, me yacova na gauna kecega ka tawa mudu. Emeni.