Efeso 2 - AI VOLA TABU

Sa tukuna ko koga na nodrai valavala eliu, kei na ka vinaka era sa qai rawata e na vuku ni loloma walega ni Kalou, 1-10. Sa vakarota vei ira me ra kakua ni muria na nodrai valavala era sa tawa lotu, 11-22.

¹ A SA vakabulai kemudou, oi kemudou ka mate tu e na caka cala kei nai valavala ca;

² dou a tiko lako kina eliu me vaka nai valavala kei vuravura o qo, ni dou a muria tiko na nodra turaga era sa kaukauwa e na macawa, a yalo sa cakacaka tiko e lomadra era sa dautalaidredre;

³ o ira eda sa valavala vata kaya oi keda kece e na gauna eliu, e na gadreva ca ni yagoda, ni da a muria tiko na dodomo ni yagoda kei na yaloda; ia na nodai tovo me da cudruvi, me vakataki ira na tani:

⁴ ia, na Kalou, sa vutu ni loloma, e na vuku ni nona loloma levu sa lomani keda kina,

⁵ io, ni da a mate tu e na caka cala, sa vakabulai keda vata kei Karisito, (a loloma walega dou sa vakabulai tu kina;)

⁶ a sa vakatura cake vata, ka vakatikora vata kei Karisito Jisu e na veiyasana vakalomalagi:

⁷ me vakatakila kina e na gauna ena muri mai nai yau levu sara ni nona loloma ni sa lomavinaka vei keda e na vuku i Karisito Jisu:

⁸ ni sa loloma walega dou sa vakabulai kina e na vuku ni vakabauta; ia sa sega ni vuna koi kemudou; ai solisoli ga ni Kalou:

⁹ sa sega e na vuku ni cakacaka, mo kakua kina e dua me vakalevulevui koya:

¹⁰ ni da sa nona cakacaka, sa caka me da tu vata kei Karisito Jisu me ia nai valavala vinaka, o qori sa vakarautaka eliu ko na Kalou me da lako voli vakakina.

¹¹ O koya mo dou qai nanuma, ni dou sa tawa lotu eliu ni dou sa sucu vakakina, ia dou a vakatokai na Tawacili vei ira sa vakatokai na Cili sa cakava na liga e na yago;

¹² ni sa sega vei kemudou ko Karisito e na gauna ko ya, dou sa sega ni matanitu vata kei ira na Isireli, a sa sega ni nomudou na ka sa yalataki e na veiyalayalati, a sa sega vei kemudou nai nuinui, ka dou sa sega ni veiriti kei na Kalou, e vuravura:

¹³ ia e na gauna o qo ni dou sa tu vata kei Karisito, oi kemudou ka yawa eliu sa qai voleka mai e na vuku ni dra i Karisito.

¹⁴ Ni sai koya na vu ni noda veivinakati tale, o koya sa qisi keda ka rua me da dua bau, a sa basuka na bai sa ia kina na tawasei;

¹⁵ ni sa vakarusa e na yagona na ka eda a veicati kina, a ya na vunau sa vakarota ko nai valavala ni lotu: me ia kina na veivinakati, ka qisi rau me rau tamata vou e dua bauga e na tu vata kaya;

¹⁶ me vakaveivinakatitaki ruarua talega kei na Kalou me vaka ni sa dua bau na tamata e na vuku ni kauveilatai, ni sa vakamatea kina na Veicati:

¹⁷ a sa lako mai ka vunautaka na ia na veivinakati vei kemudou sa yawa, vei ira talega era sa voleka:

¹⁸ ni sai koya eda sa torova rawa kina na Tamada koi keda ruarua e na Yalo e dua bauga.

¹⁹ O koya o qo dou sa qai sega tiko ni vulagi kina se kai tani, a sa koro vata kei ira era sa lotu, ka dou sa mataqali ni Kalou;

²⁰ ka dou sa tara cake e na nodra yavu nai apositolo kei ira sa dauvosa e na Yalo, ni sai koya ko Jisu Karisito sai teteki e na tutu-ni-vale:

²¹ o koya sa sema vata kina na vale taucoko, a sa tubu cake kina me vale tabu ni sa tu vata kei na Turaga:

²² o koya dou sa vakatataki vata talega kina me vale ni Kalou ni sa tiko kina na Yalo.