Efeso 1 - AI VOLA TABU

A WASE I. —Sa vakavinavinaka vua na Kalou ko Paula e na vukudra na lewe ni soro mai Efeso, a sa vakatakila na ka era sa kalougata vakalevu sara kina ni ra sa qai vakabauti Jisu, 1-14. Sa tukuna ni sa masulaki ira tiko, me ra vuku vakalevu sara, ka kalougata vakaidina, 15-23.

¹ O PAULA, nai apositolo i Jisu Karisito e na veitalia ni Kalou, vei ira era sa lotu mai Efeso, ka sa yalodina, vei Jisu Karisito:

² Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

³ Me vakarokorokotaki ko na Kalou, na Tama ni noda Turaga ko Jisu Karisito, o koya sa vakalougatataki keda e na ka vakalougatataki vakayalo kecega e na veiyasana vakalomalagi e na vuku i Karisito;

⁴ me vaka sa digitaki keda eliu e na vukuna, sa qai tauyavutaki emuri ko vuravura, me da yalosavasava kina ka tawa cala e matana e na loloma;

⁵ ni sa lesi keda eliu me da vakabauti vua me da luvena e na vuku i Jisu Karisito, me vaka na ka sa vinakata na nona veitalia;

⁶ me vakarokorokotaki kina na kena vinaka ni nona loloma: a ya sa lomani keda kina ko koya e na vuku i koya sa lomani tu:

⁷ o koya eda sa rawata kina na bula sa voli e na vuku ni nona dra, io, na bokoci ni valavala ca, me vaka nai yau ni nona loloma;

⁸ a ya sa vakalevutaka sara vei keda ko koya e na vuku kei na yalomatua kecega;

⁹ ni sa vakatakila vei keda na nona lewa ka vuni tu, me vaka na ka e vinaka vua, a ya sa nakita vakai koya ga:

¹⁰ me yaco kina na ka sa lewai ni sa oti kecega na gauna sa lokuci me vakasoqona vata ko koya na ka kecega vei Karisito, na veika mai lomalagi, kei na veika e vuravura; io, vei koya:

¹¹ eda sa caka talega kina mei votavota, ni da sa lesi eliu me vaka nai naki i koya sa cakava na ka kecega me vaka na lewa ni nona veitalia:

¹² me vakarokorokotaki kina e na vuku i keitou na nona vinaka, oi keitou sa vakararavi taumada vei Karisito:

¹³ koi kemudou talega, ni dou sa rogoca eliu na vosa ni vakavuvuli dina, nai tukutuku-vinaka ni nomudou bula, io, sai koya dou sa dregati kina, ni dou sa vakabauta, e na Yalo Tabu ka yalataki,

¹⁴ o koya nai matai ni nodai votavota me yaco mada na gauna ena rawa dina kina ko ira sa voli tu, me vakarokorokotaki kina na nona vinaka.

¹⁵ E na vuku ni ka o qo koi au talega, niʼu sa rogoca oti na nomudou vakabauta na Turaga ko Jisu, kei na loloma talega vei ira kecega era sa lotu,

¹⁶ au sa tawa mudu ni vakavinavinaka e na vukumudou, niʼu sa cavuti kemudou tiko e na noqu masu;

¹⁷ vua na Kalou ni noda Turaga ko Jisu Karisito, a Vu ni ka e vakaiukuukutaki, me solia vei kemudou na yalo ni vuku kei nai vakavuvuli macala, mo dou kilai koya kina:

¹⁸ ni sa vakararamataki na mata ni yalomudou; mo dou kila kina nai nuinui sa kacikaci kina ko koya, kei nai yau vakaiukuuku sa taukena ko koya vei ira era sa lotu,

¹⁹ kei na kena levu sara ni nona kaukauwa vei keda sa vakabauta, me vaka sa daucaka e na nona kaukauwa vakaidina,

²⁰ a ya sa qisi Karisito kina ko koya, ni sa vakaturi koya cake mai na mate, a sa vakatikora e na ligana i matau e na veiyasana vakalomalagi,

²¹ sa uasivi cake sara vei ira kecega sa liu, kei ira sa kaukauwa, kei ira era sa qaqa, kei ira era sa turaga, kei na yaca kecega sa cavu e na gauna o qo kei na gauna emuri:

²² a sa vakamalumalumutaka na ka kecega ki ruku ni yava i koya, a sa lesi koya me veitaliataka na ka kecega, e na vuku ni vavakoso lewe ni soro,

²³ na yagona, sa osooso sara vua sa vakasinaita na ka kecega e na ka kecega.