Dauvunau 9 - AI VOLA TABU

Sa yaco na ka tautauvata vei ira na vinaka kei ira na ca, era na mate kece, 1-6; me da vakagagataka kina na ka vakavuravura, ka gumatua e na cakacaka, 7-10. Sa lewa na ka kece na Kalou, 11, 12. Sa vinaka na vuku ka ca na kaukauwa, 13-18.

¹ E NA vuku ni ka kece o qo kaʼu a nanuma e lomaqu ka meʼu tukuna na ka kece o qo, ni ra sa tiko e na liga ni Kalou na yalododonu, kei na vuku, kei na nodra cakacaka: ia na nodra loloma kei na nodra veicati, ni sa sega na tamata sa kila e dua na ka ena yacovi ira.

² A ka kece vata sa yaco ki na tamata kecega: sa dua vata ga na ka sa dui yacovi ira, vua sa yalododonu, vua talega na tamata ca; vua sa vinaka ka savasava, vua talega sa tawa savasava; vua, sa soro, vua talega sa tawa soro: me vakai koya sa vinaka, sa vakakina ko koya sai valavala ca; o koya talega sa vosavavakini, sa vakai koya sa rerevaka na vosavavakini.

³ O qo na ka ca e na ka kece sa caka e ruku ni siga, ni sa dua vata ga na ka sa dui yacovi ira kecega: io, na lomadra talega na luve ni tamata sa sinai e na ca, a sa tiko na lialia e lomadra ni ra bula tiko, ka oti o qori era sa qai lako kivei ira na mate:

⁴ ni sa tu vua sa wili vata kei ira kece na bula na ka me namaka kina: ni sa vinaka cake na koli sa bula e na laioni sa mate.

⁵ Ni sa kila ko ira sa bula ni ra na mate: ia ko ira na mate era sa sega ni kila e dua na ka, a sa sega tale na nodrai voli; ni sa yali sara na kedrai nanumi.

⁶ Ia na nodra loloma, kei na nodra veicati, kei na nodra vuvu, sa qai yali; a sa sega tale na nodrai votavota e na dua na ka sa caka e ruku ni siga.

⁷ Mo qai lako, kania e na marau na kemu kakana, ka gunuva e na yalo rereki na memu waini; ni sa qai vinakata na nomu cakacaka na Kalou.

⁸ E na gauna kece me vulavula ga na nomui sulu; ia nai lumu ni ulumu me kakua ga ni yali.

⁹ Mo drau tiko vakarekireki kaya na watimu o koya ko sa lomana e na veisiga kece ni nomu bula walega, a ya sa solia vei iko ko koya e ruku ni siga, na veisiga kece ni nomu bula walega: ni sai koya o qori na nomui votavota e na nomu bula o qo, e na cakacaka talega kp sa oga kina e ruku ni siga.

¹⁰ A ka kece ka sa kunea na ligamu me cakava, mo kitaka ga e nomu kaukauwa; ni sa sega na cakacaka, se na nanuma, se na kila ka, se na vuku, e nai bulubulu, a ya ko sa lako kina.

¹¹ AU a qai gole, ka kunea e ruku ni siga, ni sa sega ni ira na daucici sa tauca na cere, ka sega ni ira na qaqa sa gumatua e nai valu, a sa sega talega ni nodra na vuku na kakana, a sa sega talega ni nodra na yalomatua nai yau, a sa sega talega ni nodra na matai me vinakati; ia na gauna kei nai yacoyaco sa lutuki ira na tamata kecega.

¹² Ni sa sega talega ni kila na tamata na nona gauna: me vaka na ika sa lawavaki e na lawa ca, ka vaka na manumanu sa coriti e nai cori; era sa coriti vakakina na luve ni tamata e na siga ca, ni sa yaco vakidacala vei ira.

¹³ A vuku talega o qo kaʼu sa kunea e ruku ni siga, ia kaʼu a vaka ni sa ka levu:

¹⁴ sa dua na koro lailai, ka ra lewe lailai na lewena; a sa mai kaba e dua na tui levu, ka buku na druadrua ni koro, ka viribaita vakaivalu sara:

¹⁵ a sa kune maikina e dua na tamata kaisi ka vuku, ia ni sa vuku ko koya sa vakabula na koro; ia ka sega na tamata sa nanuma na tamata kaisi ko ya.

¹⁶ Au a qai kaya, Sa vinaka cake na vuku e na kaukauwa: ia ka sa beci ga na nona vuku na tamata kaisi, a sa sega ni rogoci na nona vosa.

¹⁷ Sa rogoci vakalevu na nodra vosa malumalumu na vuku, ka vakalailai na qoqolou i koya sa lewa e na kedra maliwa na lialia.

¹⁸ Sa vinaka na vuku ka ca nai yaragi ni valu: ia na tamatai valavala ca e lewe dua ga sa vakacacana na vinaka levu.