Dauvunau 8 - AI VOLA TABU

A ka yaga na vuku, 1; me da doka na tui, 2-4; ka vakabauta na vunau, ka vakanananu, 5-7; ena rawai keda kece na mate, 8; a turaga ca, kei na mate ca, 9, 10; a Kalou sa dauvosota na tamata ca, 11-13; eda tawa nunuva rawa na lewa ni Kalou, 14-17.

¹ O CEI me vakataki koya na vuku? ia ko cei sa kila na kenai vakatusai na ka? a nona vuku na tamata sa lumilumisa kina na matana, ia na kaukauwa ni matana ena matavou mai.

² Au sa vakaroti iko mo vakabauta na vosa ni tui, ia e na vuku ni vosavavakini vua na Kalou.

³ Mo kakua ni lako tani vakararawa e matana: kakua ni ko tiko e na dua na ka ca; ni sai koya sa vinaka vua sa kitaka ga.

⁴ A tikina sa tu kina na vosa ni tui, sa tu kei na kaukauwa: ia ko cei me kaya vua, A cava ko sa cakava?

⁵ O koya sa vakabauta na vunau ena sega ni kunea e dua na ka ca: ia na gauna kei na lewa dodonu sa macala ki na yalona sa vuku:

⁶ ni sa dua na kena gauna kei na kenai valavala dodonu na cakacaka kecega, o koya na rarawa ni tamata sa levu kina vua:

⁷ ni sa sega ni kila ko koya na ka ena yaco: se na yaco ninaica, ko cei e tukuna lawa vua?

⁸ Sa sega na tamata sa lawata na yalona me tarova na yalona; sa sega talega na ka e rawata e na siga ni mate: a sa sega na suka e nai valu ko ya; ia nai valavala ca ena sega ni bula kina era sa kitaka.

⁹ A ka kecega o qo kaʼu sa kunea, ka vakasara na lomaqu ki na cakacaka kece sa caka e ruku ni siga: ia sa so na gauna sa lewa kina na tamata vua na tamata tani ka mani ca kina.

¹⁰ Ia kaʼu a baki kunea tale ni ra buluti na tamata ca, era a daulako mai ki na yasana tabu ka suka, ka ra guilecavi ga e na koro era a caka vakaoqo kina: o qo tale na ka walega.

¹¹ E navuku ni sa sega ni cudruvaki nai valavala ca me vakasauri, o koya o qo sa gumatua kina na lomadra na luve ni tamata me caka ca.

¹² Kevaka sa vakadrau na nona caka ca na tamatai valavala ca, ka sa vakabalavutaki na nona bula, ia kaʼu sa kila sara ni ra na vinaka ga era sa rerevaka na Kalou, o ira sa rere e matana:

¹³ ia ena sega ni vinaka na tamata ca, ena sega talega ni vakabalavutaka na nona bula, a ya sa vaka na yaloyalo; e na vuku ni sa sega ni rere ko koya e na mata ni Kalou.

¹⁴ SA dua na ka ca wale sa caka e vuravura; ni sa so na tamata yalododonu, ka sa yaco vei ira me vaka na nodra cakacaka na tamata ca; ia ka so na tamata ca, ka sa yaco vei ira me vaka na nodra cakacaka na yalododonu: au a kaya ni sa ka ca wale talega o qo.

¹⁵ Au a qai vakacaucautaka na marau, ni sa sega na ka e vinaka cake vua na tamata e ruku ni siga, ka me kana ga, ka gunu, ka marau: ni na tiko ga kaya na ka o qo e na nona oca e na veisiga ni nona bula, a ya sa solia vua na Kalou e ruku ni siga.

¹⁶ Ni sa vakanananu na lomaqu me kila na vuku, ka kunea na cakacaka sa ia e vuravura: (ni sa tiko talega e sa sega se kei na siga se na bogi na moce e matana me sa kunea ko koya:)

¹⁷ au a qai kunea kecega na cakacaka ni Kalou, ni sa dredre vua na tamata me kunea na cakacaka sa kitaki e ruku ni siga: ia kevaka sa gumatua na tamata ni qara, ena sega ga ni kunea; ia kevaka sa nanuma ko koya sa vuku me kila ya, ena sega ga ni kunea rawa.