Dauvunau 7 - AI VOLA TABU

Na ka yaga e so; 1-14; na ka yaga na rerevaka na Kalou, 15-18, kei na vuku, 19-20; ia na vuku na ka dredre, 21-24. Sa gumatua na Dauvunau me rawata na vuku.

¹ SA vinaka na yaca e rogo vinaka ka ca nai lumu talei; a sa vinaka na siga ni mate ka ca na siga sa sucu kina.

² Sa vinaka me lako ki na vale ni tagi, ka ca me lako ki na vale ni solevu: ni sa kedrai otioti o qori na tamata kecega; ia ko koya sa bula tiko ena nanuma kina e lomana.

³ Sa vinaka na tagi ka ca na dredre: ni sa veveku na mata sa vinaka cake mai kina na yalo.

⁴ A yalodra na tamata vuku sa tiko e na vale ni tagi; ia na yalodra na lialia sa tiko e na vale ni marau.

⁵ Sa vinaka ni rogoca na vunau ni vuku, ka ca vua na tamata ni rogoca na nodra meke na lialia:

⁶ ni sa vaka na lidilidi ni; kau votovotoa e ruku ni kuro, sa vakakina na nona dredre na lialia: o qo tale na ka walega.

⁷ E dina, ai valavala kaukauwa sa cakava na tamata vuku, me lialia; a sa vakacataka na loma ni tamata nai solisoli.

⁸ Sa vinaka nai otioti ni ka ka ca na kenai vakatekivu: ka vinaka ko koya sa yalodauvosovoso ka ca na yaloviavialevu.

⁹ Me kakua ni kusarawa na yalomu me cudru: ni sa tiko ga na cudru e lomadra na lialia.

¹⁰ Mo kakua ni kaya, A kawa ni cava sa vinaka kina na gauna eliu ka ca na gauna o qo? ni sa sega ni vuku na nomu taro e na ka o qo.

¹¹ Sa vinaka na vuku sa tu vata kei nai yau: sa qai ka yaga vei ira era sa raica na siga:

¹² io, sai vakaruru na vuku, a sai vakaruru nai lavo: ia ka kena yaga na kila ka, ni sa solia na vuku na bula vei ira na kenai taukei.

¹³ Mo nanuma na cakacaka ni Kalou: ni sai cei ena vakadodonutaka rawa na ka, sa vakavevetaka ko koya?

¹⁴ E na siga ni sautu mo reki, ia e na siga ni ca mo vakanananu: ni sa lesia na Kalou na ka o qo kei na ka ko ya me veiqaravi, me kakua kina na tamata e kila na ka ena muri mai.

¹⁵ Au a raica na ka kecega e na veisiga ni noqu bula wale o qo: ni sa tiko na yalododonu sa ca mai e na nonai valavala dodonu, a sa tiko na tamata ca sa balavu na nona bula e na nonai valavala ca.

¹⁶ Mo kakua ni yalododonu vakalevu; mo kakua talega ni vuku sara: mo luveniyali mai e na vuku ni cava?

¹⁷ Mo kakua ni valavala ca vakalevu, mo kakua talega ni lialia: mo mate ni sa bera ni yaco dina na nomu siga e na vuku ni cava?

¹⁸ Sa vinaka mo taura na ka o qo; io, mo kakua talega ni tarova na ligamu mai na ka o qo: ni sai koya sa rerevaka na Kalou ena lako tani mai mai na ka kece o qo.

¹⁹ Ni sa vuku, sa gumatua vakalevu na tamata vuku ka vakalailai na turaga e lewe tini era sa tiko e na koro.

²⁰ Ni sa sega na tamata yalododonu e vuravura, sa caka vinaka tiko, ka sega ni valavala ca rawa.

²¹ Ia na vosa kece sa vosataki kakua ni ko nanuma; do ko rogoca na nomu tamata ni sa rukaki iko:

²² ni sa vakavuqa, ia sa kila ga na lomamu, ni ko sa rukaki ira na tani.

²³ A ka kece o qo kaʼu sa vakatovolea oti e na vuku: au a kaya, Au na vuku; ia ka sa yawa vei au.

²⁴ A ka sa yawa, ka titobu sara, ko cei sa kunea rawa?

²⁵ Au a makututaka na lomaqu me kila, ka dikeva, ka vakasaqara na vuku, kei nai balebale ni ka, meʼu kila talega na kena ca na lialia, ia nai valavala sesewa ka lialia:

²⁶ ia kaʼu sa kunea ni sa sivia na kena gaga na mate ko koya na alewa, sai cori ka lawa na lomana, a sai vesu na ligana: o koya sa vinaka vua na Kalou ena dro bula maivei koya; ia ko koya sai valavala ca ena coriti vua.

²⁷ Sa kaya ko koya na Dauvunau, Raica, a ka o qo kaʼu sa kunea, niʼu sa wilika vakayadua me kila na kena dina;

²⁸ a ya sa qara tiko na yaloqu, ka sega ga ni kunea: e dua na tagane vei ira e udolu kaʼu sa kunea; ia e dua na alewa vei ira kecega o qo kaʼu sa sega ni kunea.

²⁹ Raica, na ka ga o qo kaʼu sa kunea, ni sa cakava na tamata na Kalou me yalododonu; ia ka ra sa vakasaqara nai valavala vou e vuqa.