Dauvunau 6 - AI VOLA TABU

Sa ka wale nai yau sa tawa vakagagataka, 1-6, kei na bula vakayago walega, 7-9. Sa tawa kila na tamata na ka sa yaga vua, 10-12.

¹ E DUA na ka ca kaʼu sa kunea e ruku ni siga, a sa daulevu vei ira na tamata:

² a tamata sa solia kina na Kalou nai yau, kei na kamunaga, kei na vakarokoroko, a sa sega ni yali vua e dua na ka sa domona na yalona, ia ka sa sega ni solia vua na Kalou me kana rawa kina, a sa kana ga kina na vulagi: o qo na ka walega, ka dua na mate ca.

³ Kevaka sa dua na tamata sa sucu e lewe drau na luvena, ka sa vuqa na yabaki sa bula kina, ka mani vuqa kina na siga ni nona yabaki, ka sa sega ga ni mamau na yalona e na vinaka, ka sa sega talega na kena somate; au sa kaya, ni sa vinaka na lutudole ka ca ko koya:

⁴ o koya sa lako ka wale mai, a sa lako vakabutobuto yani, asa na tabogo e na butobuto na yacana:

⁵ a sa sega talega ni raica na siga, se kila e dua na ka: sa vakacegu o qo ka sega ko ya.

⁶ Io, ke sa udolu vakarua na nona yabaki, ke sa sega ga ni kunea na vinaka: sa sega li ni lako ki na yasana e dua bauga na tamata kecega?

⁷ Sa nona oca kecega na tamata e na vuku ni gusuna, ia ka sa sega ni oti rawa na viakana:

⁸ ni sa uasivi cake o na cava na tamata vuku vua na lialia? a cava sa uasivi cake kina na dravudravua, o koya sa kila nai valavala e yaga e na matadra na bula?

⁹ Sa vinaka ni sa raica na matada ka ca ni sa lako sese na lomada: o qo tale na ka walega kei na ocaoca wale.

¹⁰ O KOYA sa tiko o qo sa vakayaca makawa tu, ia sa kilai ni sai koya na tamata: a sa sega ni veilewai rawa kei koya sa kaukauwa vei rau.

¹¹ Ni sa vuqa na ka sa vakaikuritaki kina na ka walega, a cava e vinaka cake kina na tamata?

¹² Ni sai cei sa kila na ka e yaga vua na tamata e nona bula, na veisiga kece ni nona bula wale o qo, a ya sa oti rawarawa me vaka na yaloyalo? ni sai cei sa tukuna rawa vua na tamata na ka ena muri koya e ruku ni siga?