Dauvunau 5 - AI VOLA TABU

Sa ca ni ia wale na cakacaka vua na Kalou, 1-7. A veivakasaurarataki kei nai yau sa vuna na ocaoca wale, 8-17. A loloma ga ni Kalou sa yaga kina na ka e solia ko koya, 18-20.

¹ MO raica vinaka na yavamu ni ko sa lako ki na vale ni Kalou, ia mo kusarawa me vakarorogo, mo berabera ga ni cabora nai soro vakai ira na lialia: ni ra sega ni nanuma ni ra sa caka ca.

² Me kakua ni kusarawa na gusumu, kakua talega ni vakariri na lomamu me cavuta na vosa e na mata ni Kalou: ni sa mai lomalagi na Kalou, ia ko iko e vuravura: o koya me lailai kina na nomu vosa:

³ ni sa lako mai na tadra e na ogaoga levu; ia na domona na lialia sa kilai e na vosa e vuqa.

⁴ Ni ko sa ia na vosavavakini vua na Kalou, mo kakua ni berabera ni vakayacora; ni sa sega ni vinakati ira sa lialia: mo vakayacora na ka ko sa vosavavakini kina.

⁵ Sa vinaka mo kakua ni vosavavakini, ka ca ni ko vosavavakini ka tawa vakayacora.

⁶ Mo kakua ni solia na gusumu me vakacala na lewemu; mo kakua talega ni kaya e matana na agilose, ni sa nomu vosa cala: me vakacudrui na Kalou vakacava e na vuku ni domomu, me vakarusa na cakacaka ni ligamu?

⁷ Ni sa levu na tadra ka vuqa na vosa, sa vuqa talega na ka wale: ia mo rerevaka ga na Kalou.

⁸ Kevaka ko sa kunea ni ra sa vakasaurarataki na dravudravua, ka sa kauti vakaukauwa tani na lewa kei na caka dodonu e na dua na qali, kakua ni ko kidacala kina: ni sa vakaraica tiko ko koya sa cecere vei ira sa cecere sara; ia sa tiko e sa cecere vei ira.

⁹ Ia na vuata ni vanua sa nodra kece na tamata: ia na tui sa qaravi mai na veiwere.

¹⁰ O koya sa lomana na siliva ena sega ni mamau e na siliva; sei koya sa lomana nai yau e na kenai kuri: o qo tale na ka walega.

¹¹ Ni sa levu mai na ka, era sa lewe levu mai era kania, ia ka cava na kena yaga vei ira na kenai taukei, ka me raica walega e na matadra?

¹² Sa kamikamica na nona moce na tamata daucakacaka, se lailai se levu na ka e kania: ia na nonai yau levu na vutuniyau sa sega ni laivi koya me moce.

¹³ Sa dua na ka ca sara kaʼu sa kunea e ruku ni siga, ia nai yau sa maroroi me nodra na kenai taukei ka ra sa ca kina:

¹⁴ a sa yali ga nai yau ko ya e na cakacaka ca: a sa sucu mai e dua na luvena, ka sa sega na ka me sa tu vua.

¹⁵ Me vaka sa curu luvawale mai na kete i tinana, ena lesu me lako tale me vaka ni sa lako mai, ka sega na ka e kauta e sa cakacaka kina, sa sega ga na ka e kauta yani e ligana.

¹⁶ Ia o qo talega na ka ca sara, ni sa vaka sara na nona lako mai, ena vaka dina kina na nona lako yani: ia ka cava na kena yaga vua ni sa cakacaka me nona na cagi?

¹⁷ E na nona siga kece tale ka sa kana ga e na butobuto, ia na rarawa levu kei na cudru sa ia vata kei na kena mate.

¹⁸ Raica, na ka kaʼu a kunea: ni sa yaga ka kilikili kaya na tamata me kana ka gunu, ka rekitaka na vinaka ni nona cakacaka kece e sa oga kina e ruku ni siga e na veisiga kece ni nona bula, a ya sa solia vua na Kalou: ni sa nonai votavota o qori.

¹⁹ Ia na tamata yadua talega sa solia vua na Kalou nai yau kei na kamunaga, a sa solia vua me kana rawa kina, ka me taura na nonai votavota, ka rekitaka na nona cakacaka; o qo nai solisoli ni Kalou.

²⁰ Ni na sega ni nanuma vakalevu na siga ni nona bula; ni sa rogo mai na Kalou e na reki ni lomana.