Dauvunau 3 - AI VOLA TABU

Sa tawa dei nai valavala vakavuravura, 1-8; ia na cakacaka ni Kalou sa vinaka ka dei, 9-15. Sa tawa caka dodonu na tamata, ia na Kalou sa caka dodonu, 16, 17. Sa dodonu vua na tamata me kania na vinaka ni nona cakacaka, 18-22.

¹ SA dui vakagauna na ka kecega, ka sa dui vakasiga na ka kece sa caka e ruku ni lomalagi:

² sa tiko na siga me sucu kina, kei na siga me mate kina; na siga me ia na teitei, kei na siga me cavuta na ka sa tei;

³ na siga me ia na veivakamatei, kei na siga me ia na veivakabulai; na siga me ia na basu vale, kei na siga me ia na tara vale;

⁴ na siga ni tagi, kei na siga ni dredre; na siga me ia na yaso, kei na siga me ia na meke;

⁵ na siga me tala vatu, kei na siga me vakasoqo vatu; na siga me ia na veimokoti, kei na siga me cegu ni veimokoti;

⁶ na siga me rawai yau, kei na siga me yali nai yau; na siga me manini, kei na siga me dausoli ka;

⁷ na siga mo ia na kadresudresu, kei na siga me ia na culacula; na siga me tiko lo, kei na siga me vosa;

⁸ na siga me veilomani, kei na siga me veicati; na siga ni valu, kei na siga ni sautu.

⁹ A cava na kena yaga vua sa daucakacaka na ka sa dauoca kina ko koya?

¹⁰ Au sa raica oti na ocaoca, sa vota na Kalou vei ira na luve ni tamata me ra veiogai kina.

¹¹ Sa cakava na ka kece me matavinaka ga e na kena gauna: ia ka sa vakatikora ki lomadra na gauna ena tawa mudu, a sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti.

¹² Au sa kila ni sa sega tale na vinaka e tu kina, a ya ga me reki na tamata, ka caka vinaka ni sa bula:

¹³ ia me kana talega ka gunu na tamata yadua, ka kunea na vinaka ni nona cakacaka kecega, nai solisoli ni Kalou o qori.

¹⁴ Au sa kila, na ka kece sa cakava na Kalou, ena tu ga ka tawa mudu: ena sega na ka me vakaikuritaki kina, ka sega na ka me kauti tani maikina: ia sa cakava o qori na Kalou, me ra rere na tamata e matana.

¹⁵ Na ka sa tiko eliu sa tiko edaidai; kei na ka ena tiko maimuri sai koya ka tiko eliu; ia na Kalou ena taroga tale na ka sa oti yani.

¹⁶ Ia kaʼu a raica e ruku ni siga na tikina ni veilewai, ni sa tiko kina na ka ca; na tikina talega ni caka dodonu, ni sa tiko kina na caka cala.

¹⁷ Au a kaya e lomaqu, A Kalou ena lewai ira sa yalododonu kei na tamata ca: ni sa tiko na kena gauna maikea ni vakanananu kei na cakacaka kecega.

¹⁸ Au a kaya e lomaqu e na vuku ni nodrai valavala na luve ni tamata, Me vakararamataki ira mada na Kalou, io, me ra raica rawa ni ra sa vaka na manumanu ko ira.

¹⁹ Ni sa yacovi ira na luve ni tamata na ka sa yacova na manumanu; ni sa dua vata ga na ka sa yacovi ira: me vaka sa mate o qo, sa mate vaka talega kina ko ya; io, sa dua vata ga na kedra cegu; a sa sega ni uasivi cake na tamata e na manumanu: ni sa ka wale kecega.

²⁰ Era sa lako kece ki na yasana e dua bauga; era sa kuvu-ni-soso kecega, a ra sa suka tale kecega me kuvu-ni-soso.

²¹ O cei sa kila na yalo ni tamata sa lako cake, kei na yalo ni manumanu sa lako sobu kivakaki vuravura?

²² 0 koya o qo kaʼu sa kunea kina ni sa sega e dua na ka e yaga vua na tamata, ka me rekitaka ga na nona cakacaka; ni sai koya o qo na nonai votavota: ia ko cei beka me na kauti koya me raica na ka ena muri koya?