Dauvunau 2 - AI VOLA TABU

A kena tawa yaga na muria nai valavala vakavuravura, 1-11. Sa vinaka na tamata vuku ka ca na sesewa, ia ka sa dua vata ga na ka sa dauyacovi rau, 12-19. Sa tawa yaga na cakacaka wale, ia ka sa yaga na ka sa solia na Kalou, 20-26.

¹ AU a kaya e lomaqu, O qo mada, kaʼu na vakatovolei iko e na rereki, ia mo ia mada ki na mamarau: ka, raica, o qo tale na ka walega.

² Au a kaya e na vuku ni dredre, Sa ka lialia: e na vuku ni rereki talega, A cava na betena?

³ Au a qaqara e lomaqu, meʼu soli au mada ki na waini, (ia kaʼu sa lewa vakavuku tikoga na lomaqu;) ka meʼu taura nai valavala sesewa, meʼu kila mada se evei beka na kena vinaka dina ko ya mo nodra na luve ni tamata, mo ra kitaka e ruku ni lomalagi e na veisiga kecega ni nodra bula.

⁴ Au a cakava e so na ka lelevu me noqu; au a tara na noqu veivale; au a tea na noqu veivainivaini:

⁵ au a cakava na noqu veiwere kei na were kau vinaka, ia kaʼu a tea kina na kau vua kecega:

⁶ au a cakava na noqu drano e so, me vakasuasuataki kina na veikau lalai sa tubu cake mai:

⁷ au a rawata e so na noqu tagane kei na noqu vada, a sa sucu na luvedra e noqu vale me noqu tamata; au a taukena talega na karavau kei na sipi na ka levu, ka lailai na nodratou kecega eratou sa liu vei au e Jerusalemi:

⁸ au a kumuna vata talega vei au na siliva kei na koula, kei nai vakacavacava maivei ira na tui, kei na veiqali: au a rawata na noqu tagane dausere kei na noqu alewa dausere, kei na ka era daumarautaka na luve ni tamata, ia na ka domo vinaka, ka vuqa na kenai valavala.

⁹ Ia kaʼu a levu, ka uasivi cake vei iratou kecega eratou sa liu vei au e Jerusalemi: a sa tiko ga vei au na noqu vuku.

¹⁰ Ia na ka kece sa domona na mataqu kaʼu a sega ni bureitaka kina, kaʼu a sega ni tarova na yaloqu mai na dua na ka e marautaki; ni sa daureki na yaloqu e na noqu cakacaka kecega: ia o qo ga na noqui votavota e na noqu cakacaka kecega.

¹¹ Au a qai sarava na cakacaka kecega ka sa cakava na ligaqu, kei na sagasaga kaʼu a sagati kina me rawa: ka, raica, sa ka wale kecega kei na ocaoca wale, ka sega na yagana e ruku ni siga.

¹² Ia kaʼu a qai gole meʼu raica nai valavala vuku, kei na ka lialia ka sesewa: ia ka cava tale me rawa vua na tamata sa na taravi koya na tui? sai koya ga sa caka oti eliu.

¹³ Au a qai kunea ni sa sivia na lialia na vuku, me vaka na rarama sa sivia na butobuto.

¹⁴ A matana na vuku sa toka e na uluna; ia ko koya sa lialia sa lako voli vakabutobuto: ia koi au kaʼu sa qai kila mai ni sa dua vata ga na ka sa yacovi ira kecega.

¹⁵ Au a qai kaya e lomaqu, Me vaka na ka sa yacova na lialia, sai koya vata sa yacovi au talega; ia kaʼu a gu ni vuku mei cavai? Au a qai kaya e lomaqu, O qo talega na ka wale.

¹⁶ Ni na tautauvata ni rau na tawa nanumi na vuku kei na lialia me tawa mudu; ka ni na guilecavi e na gauna maimuri na ka sa tu edaidai. Ia ka sa mate vakaevei ko koya sa vuku? me vakataki koya ga sa lialia.

¹⁷ O koya kaʼu a cata kina na bula; e na vuku ni sa ca vei au na ka sa caka e ruku ni siga: ni sa ka wale kecega, kei na ocaoca wale.

¹⁸ Io, kaʼu a cata na noqu cakacaka kecega kaʼu a oga kina e ruku ni siga: o na vuku niʼu na laiva vua na tamata ena taravi au.

¹⁹ Ia ko cei e kila se na vuku ko koya se lialia? ia ena veitaliataka ga na noqu cakacaka kecega kaʼu a oca kina, ka cakacaka vakavuku kina o ruku ni siga. O qo talega na ka wale.

²⁰ O koya kaʼu a ia kina meʼu yalolailai taka na noqu cakacaka kecega kaʼu a oga kina e ruku ni siga:

²¹ ni sa dua na tamata daucaka vakavuku, ka vakayalomatua, ka dodonu; ia ena laiva ga me nonai votavota na tamata sa sega ni oca kina. O qo tale na ka wale ka ca sara ga.

²² Ia ka cava li me nona na tamata c na vuku ni nona cakacaka kecega, kei na ocaoca ni yalona, c na ka sa oga kina ko koya e ruku ni siga?

²³ ni sa ka rarawa na nona veisiga kece, ka ca na nona oca: io, sa sega ni cegu rawa na lomana kei na bogi. O qo tale na ka walega.

²⁴ Sa sega tale na ka e vinaka vua na tamata, me kana ga ka gunu, ka vakaceguya na yalona e na vinaka ni nona cakacaka. O qo tale kaʼu a kunea, ni sa mai vua na Kalou na ka o qori.

²⁵ Ia ko cei tale me tovolea, se ko cei tale me kusarawataka na ka vakaoqori, me sivi au?

²⁶ Ni sa dausolia na Kalou vua na tamata sa vinaka e matana na vuku, kei na yalomatua, kei na marau: ia ka sa vota vua nai valavala ca na oca, me kumuna ka binia vata, me mani solia vei koya sa vinaka vua na Kalou. O qo tale na ka walega kei na ocaoca wale.