Dauvunau 12 - AI VOLA TABU

Sa dodonu me nanumi taudonu ko Koya ka Buli keda, 1-7; sa gumatua na Dauvunau e na veivakatavulici, 8-12; ai vakataotioti ni nonai vola, 13, 14.

¹ O KOYA ka Buli iko mo nanuma ga kina ni ko sa cauravou tiko, ni sa bera ni yaco na veisiga ca, ka tawa toro mai na veiyabaki, ko na kaya kina, Sa sega e na ka o qo meʼu sa vinakata;

² ni sa tawa butobuto mai na mata-ni-siga, se na rarama, se na vula, se na kalokalo; ka sega ni daulesu tale mai na o ni sa tau oti na uca;

³ na siga era na sautaninini kina nai vakatawa ni vale, ka cuva na tamata kaukauwa, ka cegu tiko ko ira na dauqaqi sila ni ra lewe lailai, ka butobuto mai na daurai ka mai na katuba,

⁴ ka sogo tu na matamata-ni-koro, ka domo lailai mai na dauqaqi sila, ka sa yadra caka ko koya ni sa tagi na manumanu, ka sa malumalumu kece mai na gonealewa daumeke,

⁵ ni ra na sa rerevaka talega na ka cecere, ka ra daurere lako e na gau ni sala, ka sa se mai na amodi, ka sa ka bibi na vodre, ka sa mudu mai na gagaro ka: e na vuku ni sa lako na tamata ki nona vale tawa mudu, ka ra sa lako voli e na sala ko ira na dautagi yaso:

⁶ ni sa sega ni tasere na dali siliva, se kavoro na bilo koula, se katebe na bilo mai nai vurevure, se ramusu na ka e tamoi mai nai keli wai:

⁷ sa na qai lesu na kuvu-ni-qele me qele tale me vaka eliu: ia na yalo ena lesu tale vua na Kalou o koya ka solia.

⁸ A ka wale ni ka wale! sa kaya ko koya na Dauvunau; sa ka wale kecega!

⁹ E na vuku talega ni sa vuku na Dauvunau, sa vakatavulici ira tiko na tamata me ra kila ka; io, sa vakarorogo, ka vakasaqara matua, ka vakadodonutaka na vosa vakaibalebale e vuqa.

¹⁰ A sa vakasaqara na Dauvunau me kunea na vosa vinaka: ia na ka sa volai na ka dodonu, io na vosa dina.

¹¹ A nodra vosa na vuku sa vaka na mata ni moto, kei nai vako sa vakataudeitaka ko ira na turaga ni soqosoqo, na ka sa solia mai ko koya nai vakatawa e lewe dua.

¹² A ka sa vo, na luvequ, mo vakasalataki e na ka o qo: sa sega ni oti rawa na daucakai vola; ia na dauwili vola sa ka veivakaocai ki na yago.

¹³ Tou rogoca nai tinitini ni ka kecega o qo: Mo rerevaka na Kalou, ka vakabauta na nona vunau: ni sai koya ga o qo nai tavi taucoko ni tamata.

¹⁴ Ni na lewa na cakacaka kecega na Kalou, ia kei na ka vuni kecega, se vinaka, se ca.