Dauvunau 10 - AI VOLA TABU

Sa tukuni na vuku kei na sesewa, 1-15; kei nai valavala ni tui sa gone ga, 16, 17; kei na vucesa, 18; kei nai lavo, 19. Me kakua ni vosacataki na tui, 20.

¹ A LAGO sa mate sa vakaboicataka na waiwai e vakaisaluakitaki vakamatai: sa vakakina na lialia lailai vua sa rogo ni vuku ka dokai.

² A lomana na vuku sa tiko ki ligana i matau; ia na lomana na lialia ki ligana i mawi.

³ Io, e na gau ni sala talega ni sa lako tu na lialia, ka sa yali ga kina vua na vuku, ka sa tukuna ki na tamata kecega ni sa lialia ko koya.

⁴ Kevaka sa tubu vei iko na lomana na turaga, kakua ni ko biuta na nomu yasana; ni na bokoci nai valavala ca levu e na vakamalumalumu.

⁵ Sa dua na ka ca kaʼu sa kunea e ruku ni siga, ia na caka cala sa taka mai vua na turaga:

⁶ sa lesi na ka lialia me tiko vakaturaga, ia ko ira na vutuniyau era sa tiko vakaisi.

⁷ Au a kunei ira na tamata wale ni ra sa vodo lako e na ose, kei ira na turaga ni ra lako tu me vaka na tamata wale e dela i vuravura.

⁸ O koya sa kelia nai keli ena lutu kina; kei koya sa basuka na bai, ena kati koya na gata.

⁹ O koya sa tala vatu ena lauti kina; o koya sa tasea na kau ena sa ca beka kina.

¹⁰ Ke sa mucu na matau, ka sa sega ni solota na batina ko koya, ke sa qai tavaka vakaukauwa: ia ka sa yaga e na lelewa na vuku.

¹¹ E dina ena veikata na gata kevaka sa sega e vakadula; a sa sega ni vinaka cake ko koya sa dauvosa.

¹² A vosa ni gusuna na tamata vuku na vosa vinaka; ia na tebenigusuna na lialia ena tilomi koya vakai koya:

¹³ ai vakatekivu ni vosa ni gusuna na ka lialia: ia nai otioti ni nona vosa na lialia ca sara.

¹⁴ Ia na yalolialia sa dauvosavosa: sa sega ni kila rawa na tamata na ka ena yaco; ia na ka ena muri mai, ko cei me veitukuni rawa?

¹⁵ A nodra cakacaka na lialia sa ka veivakaocai sara; ni sa sega ni kila na lako ki na koro.

¹⁶ Ena ca vei iko, na vanua, ni sa nomu tui na gone, ka ra sa kana tiko e na mataka ko ira na nomu turaga!

¹⁷ O sa kalougata, na vanua, ni sa nomu tui na gone vakaturaga, ka ra sa kana e na gauna e dodonu kina ko ira na nomu turaga, me ra kaukauwa, ka sega me ra mateni!

¹⁸ E na vuku ni vucesa sa daurusa na vale; kei na vuku ni vakasavo liga sa dau-turu na vale.

¹⁹ Sa caka na solevu me ia kina na dredre, a sa ka ni mamarau na waini: ia nai lavo ga sa rawa kina na ka kecega.

²⁰ Mo kakua, io e lomamu walega, ni ko vosavakacacataki koya na tui; mo kakua talega e nomu vale ni moce ni ko vosavakacacataki koya sa vutuniyau: ni sa dua na manumanu ni lomalagi ena kauta nai rogo, ia na ka sa vakatabana ena tukuna na ka o qori.