Dauvunau 1 - AI VOLA TABU

A WASE I. —O koya na dauvunau sa vakatakila na kena tawa yaga nai valavala ni tamata, kei na kena tawa dei na ka vakavuravura, 1-8. Sa sega na ka vou, 9-11. Sa tukuni koya na dauvunau, kei na nona qara na vuku, 12-18.

¹ A NONA vosa na Dauvunau, na luve i Tevita, na tui Jerusalemi.

² Sa kaya na Dauvunau, Na ka wale sara! na ka wale sara! sa ka wale kecega!

³ A cava kena yaga vua na tamata na nona cakacaka kecega sa cakava e ruku ni siga?

⁴ Sa lako yani e dua nai tabatamata, a sa lako mai e dua tani tale nai tabatamata: ia ko vuravura sa tu ga ka tawa mudu.

⁵ Sa daucadra talega na siga, a sa daudromu na siga; a sa lako vakusakusa ki na yasana ka cadra kina:

⁶ Sa lako kivakaki na ceva, ka lako voli kivakaki na tokalau. Sa veisukayaki tikoga na cagi, a sa lesu tale me vaka na kenai lakolako.

⁷ Sa dave tiko ki waitui na veiuciwai kecega: a sa sega ni sinai na wasawasa; ki na tikina sa daudave maikina na veiuciwai, sa daulesu tale voli kina.

⁸ Sa levu na oca e na ka kecega; sa dredre vua na tamata me tukuna: sa sega ni mamau ko mata ni sa rai ca, se cegu ko daliga ni sa rogoca.

⁹ A ka sa tiko eliu, sai koya ga ena tiko maimuri; kei na ka sa caka eliu, sai koya ga ena caka maimuri: a sa sega na ka vou e ruku ni siga.

¹⁰ E dua li na ka me kainaki kina, Raica, o qo na ka vou? sa ka mailiu sara ga, e na gauna ka liu vei keda.

¹¹ Sa tawa nanumi na ka makawa; ia na ka sa na tubu emuri era na tawa nanuma kina ko ira era na muri sara.

¹² Oi au na Dauvunau kaʼu a tui Isireli mai Jerusalemi.

¹³ Ia kaʼu a solia na lomaqu meʼu qara ka vakataroga vakavuku e na ka kecega sa caka e ruku ni lomalagi: na ogaoga dredre o qo sa solia na Kalou vei ira na luve ni tamata me ra veiogai kina.

¹⁴ Au sa raica oti na cakacaka kecega sa caka e ruku ni siga; ka, raica, sa ka wale kecega kei na ocaoca wale.

¹⁵ Na ka sa takelo sa sega ni vakadodonutaki rawa: kei na ka sa yali sa sega ni wiliki rawa.

¹⁶ Au a veinanuyaki e yaloqu, ka kaya, Raica, kaʼu sa levu mai, ka vuku vakalevu cake vei ira kecega era sa liu vei au e Jerusalemi: io na lomaqu sa kunea vakalevu na vuku kei na kila ka.

¹⁷ Ia kaʼu a solia na yaloqu meʼu kila nai valavala vuku, kei nai valavala lialia ka sesewa: kaʼu sa kunea ni sa ocaoca wale na ka talega o qo:

¹⁸ ni sa levu na rarawa e na vuku levu: ia ko koya sa vakaikuritaka na vuku sa vakaikuritaka kei na rarawa.