Dauveilewai 6 - AI VOLA TABU

Sa toroi ira na Isireli ko ira wa kai Mitiani, e na ruku ki nodrai valavala ca, 1-6. Sa vunauci ira e dua na parofita, 7-10. Sa rairai vei Kitioni e dua na agilose, ka kaya vua me vakabulai ira na Isireli, 11-24. Sa vakacacana nai cabocabo-ni-soro nei Peali, ka cabora nai soro vei Jiova, ko Kitioni, 25-27; era sa nedra wa na lewe ni nona koro, a sa vosa vinaka vei ira ko tamana, 28-32. Sa laʼki soqona vata na nonai valu ko Kitioni, 33-35; a sa vakatovolei Jiova e na vutika ni sipi kei na tegu, 36-40.

¹ A RA sa kitaka na ka e ca e na mata i Jiova ko ira na luve i Isireli; a sa soli ira ko Jiova ki na ligadra na kai Mitiani ka yabaki vitu.

² A sa kaukauwa na ligadra na kai Mitiani vei ira na Isireli: e na vukudra na kai Mitiani, era sa cakava ko ira na luve i Isireli na veiqakilo kei na veiqara vatu lelevu, kei na Veikoro kaukauwa, mai na veiulu-ni-vanua.

³ Ia kevaka sa kaburaki sila ko ira na Isireli, sa qai ia ko ira na kai Mitiani, kei ira na Amaleki, kei ira na kai na tu i cake, ka lako cake vakaivalu vei ira;

⁴ ka ra tiko vakaivalu vei ira, ka vakacacana na vuata ni vanua, ka yacovi Kesa, ka sega ni vakavoca na kakana me ra bula kina ko ira na Isireli, ka sega na sipi, se na karavau, se na asa.

⁵ Ni ra sa lako cake ka kauta na nodra manumanu, kei na nodra veivale gatu; a ra sa lako mai ka vaka na vodre na kedrai wiliwili; ia sa sega ni wili rawa ko ira se na nodra kameli; ka ra sa lako mai ki na vanua me vakacacana sara.

⁶ A ra sa vakadravudravuataki vakalevu sara ko ira na Isireli e na vukudra na kai Mitiani; a sa tagi vei Jiova ko ira na luve i Isireli.

⁷ Ia ni ra sa tagi na luve i Isireli vei Jiova e na vukudra na kai Mitiani,

⁸ sa qai tala e dua na parofita ko Jiova vei ira na luve i Isireli, ka sa kaya vei ira, Sa vosa vakaoqo ko Jiova na Kalou nei Isireli, Au a kauti kemudou cake mai Ijipita, ka kauti kemudou mai na vale ni veivakabobulataki;

⁹ ia kaʼu a vakabulai kemudou mai na ligadra na kai Ijipita, kei na ligadra kecega era vakararawataki kemudou, ia kaʼu a vakasevi ira tani mai na matamudou, ka solia vei kemudou na nodra vanua:

¹⁰ ia kaʼu a kaya vei kemudou, Sa ko Jiova koi au na nomudou Kalou; dou na kakua ni rerevaki ira na nodra kalou na luve i Amori, a nodra vanua dou sa tiko kina: ia dou sa sega ni vakarorogo ki na domoqu.

¹¹ A sa lako mai ko koya na Agilose i Jiova, ka tiko sobu e ruku ni oki mai Ofira, a nei Yoasi na luve i Epieseri: a sa samu sila tiko ko Kitioni na luvena mai na tikina sa daucaka kina na waini, me vunia vei ira na kai Mitiani.

¹² A sa rairai vua ko koya na Agilose i Jiova, ka kaya vua, Sa vei iko ko Jiova, o iko na tamatai valu qaqa.

¹³ A sa kaya vua ko Kitioni, Drasa, noqu turaga, kevaka sa tiko kei keitou ko Jiova, sa lutuki keitou mei cavai na ka kecega o qo? a sa evei beka na nona ka vakurabui kecega era a tukuna vei keitou ko ira na neitou qase, ni ra kaya, Sa sega li ni kauti keda cake mai Ijipita ko Jiova? ia ka sa qai biuti keimami ko Jiova, ka soli keimami yani ki na ligadra na kai Mitiani.

¹⁴ A sa gole vua ko Jiova, ka kaya, Mo lako e na nomu kaukauwa o qo, ia ko na vakabulai ira na Isireli mai na ligadra na kai Mitiani: au sa sega li ni talai iko?

¹⁵ A sa kaya vua ko koya, Drasa, noqu Turaga, au na vakabulai ira na Isireli vakaevei? raica, sa dravudravua na noqu udolu e na nodra maliwa na Manase, ia koi au, au sa lailai ga e na mataqali i tamaqu.

¹⁶ A sa kaya vua ko Jiova, Au na tiko vakaidina kei iko, ia ko na mokuti ira na kai Mitiani me vaka era tamata e lewe dua.

¹⁷ A sa kaya vua ko koya, Kevaka au sa kune loloma e matamu, mo kitaka vei au o dua nai vakadinadina ni sai iko ga sa vosa vei au:

¹⁸ kakua mada ni lako tani eke, ka meʼu tale mada mai vei iko, ka kauta mada mai na noqui madrali, ka virikotora e matamu, A sa kaya ko koya, Au na tikoga, ka mo tale mada mai.

¹⁹ A sa lako ko Kitioni, ka kitaka e dua na luve ni koti, kei na dua na efa madrai droka me ka tawa vakaleveni: sa virikotora na lewe ni manumanu e na sova, ka sovara na su ki na kuro, a sa kauta mai vua ki na ruku ni oki, ka vakacabora.

²⁰ A sa kaya na agilose ni Kalou vei koya, Kauta na lewe ni manumanu, kei na ka tawa vakaleveni, ka virikotora e na dela ni vatu o qo, ka sovara na su. A sa kitaka vakakina ko koya.

²¹ A sa dusia na mua ni titoko sa tu e ligana ko koya na Agilose i Jiova, ka tara na lewe ni manumanu kei na ka tawa vakaleveni; ka sa lako cake na buka waqa mai na vatu, ka kania na lewe ni manumanu kei na ka tawa vakaleveni. A sa qai lako tani mai na matana ko koya na Agilose i Jiova.

²² Ia ni sa raica ko Kitioni ni sai koya na Agilose i Jiova, sa kaya ko Kitioni, Oile, noqu turaga Jiova! e na vuku niʼu sa raica e mataqu dina na Agilose i Jiova.

²³ A sa kaya vua ko Jiova, Mo vakacegu ga; kakua ni rere: ko na sega ni mate.

²⁴ A sa cakava maikea e dua nai cabocabo-ni-soro vei Jiova ko Kitioni, a sa vakatoka ko Jiova-salomi: sa tu o qori mai Ofira, sa nodra na luve i Epieseri, ka yacova na siga edaidai.

²⁵ A sa kaya vua ko Jiova e na bogi ko ya, Mo kauta na karavau tagane sa nei tamamu, kei na kenai karua ni karavau sa vitu na nona yabaki, ka talaraka sobu nai cabocabo-ni-soro i Peali, a ya sa nei tamamu, ka taya sobu na kaloualewa ni veikau a ya sa tu e delana:

²⁶ ka mo cakava e dua nai cabocabo-ni-soro vei Jiova na nomu Kalou, ecake e na koro kaukauwa o qo, ka me cakavi vakavinaka, ka kauta na kenai karua ni karavau, ka cabora mei soro kama, e na buka ni kaloualewa ni veikau o koya ko na taya sobu.

²⁷ A sa kauta ko Kitioni na lewe tini na nona tamata, ka cakacaka me vaka ka kaya vua ko Jiova: ia e na vuku ni sa rerevaka ko koya na lewe-ni-vale i tamana, kei ira na lewe ni koro, ka sega kina ni kitaka e na siga; sa qai kitaka e na bogi.

²⁸ Ia ni ra sa sou e na mataka na lewe ni koro, raica, sa talaraki sobu nai cabocabo-ni-soro i Peali, a sa ta sobu na kaloualewa ni veikau o koya ka tu e delana, ka sa cabori na kenai kania ni karavau e na dela ni cabocabo-ni-soro sa qai cakavi.

²⁹ A ra sa veikainaki vakai ira, O cei sa cakaya na ka o qo? A ra sa veitarotarogi ka vakasaqara, ka ra kaya, O Kitioni na luve i Yoasi sa kitaka na ka o qo.

³⁰ A ra sa kaya na lewe ni koro vei Yoasi, Kauta mai na luvemu, me mate: e na vuku ni sa talaraka sobu nai cabocabo-ni-soro i Peali, e na vuku talega ni sa taya sobu na kaloualewa ni veikau o koya ka tu e delana.

³¹ A sa kaya ko Yoasi vei ira kecega sa tu voleka vua, Dou na vala li e na vuku i Peali? dou na vakabulai koya, ne? o koya sa totaki koya, me vakamatei ni sa mataka tiko: ke sa kalou ko koya, me vala e na vukuna ga, ni sa dua sa talaraka sobu na nonai cabocabo-ni-soro.

³² A sa vakatokai ko koya e na siga ko ya ko Yiru-peali, ni sa kainaki, Me veivala kaya ko Peali, e na vuku ni sa talaraka sobu ko koya na nonai cabocabo-ni-soro.

³³ A ra sa soqoni vata ko ira kecega na kai Mitiani, kei ira na luve i Amaleki, kei ira na kai na tu i cake, ka ra lako yani, ka laʼki tiko e na buca mai Isirieli.

³⁴ A sa rawai Kitioni na Yalo i Jiova, a sa uvuca ko koya na davui; ka sa kailataki ko ira na luve i Epieseri me muri koya.

³⁵ A sa tala ko koya e so nai talatala kivei ira kecega na Manase; ka ra sa kailataki ko ira talega me muri koya: a sa tala e so nai talatala vei ira na Aseri, kei ira na Sepuloni, kei ira na Nafitali; a ra sa lako mai me veitata kaya.

³⁶ A sa kaya ko Kitioni vua na Kalou, Kevaka ko na vakabulai ira na Isireli e na ligaqu, me vaka ko a kaya,

³⁷ raica, au sa virikotora e na rara ni buturaki sila na vutika ni sipi sa koti; kevaka sa sua-sua na vutika ni sipi duaduaga e na tegu, ka sa mamaca na qele kecega, au na qai kila ko na vakabulai ira na Isireli e na ligaqu, me vaka ko a kaya.

³⁸ A sa yaco vakakina: ka ni sa sou e na mataka ko koya, sa qumia vata na vutika ni sipi, ka lobaka na tegu mai na vutika ni sipi, a sa sinai kina e dua na sedre e na wai.

³⁹ A sa kaya ko Kitioni vua na Kalou, Me kakua ni katakata na nomu cudru vei au, ka meʼu vosa tale vakaduaga: meʼu vakatatovotovo tale vakaduaga mada e na vutika ni sipi; me mamaca mada na vutika ni sipi duaduaga, ka me no e na qele kecega na tegu.

⁴⁰ A sa cakacaka vakakina na Kalou e na bogi ko ya: ni sa mamaca na vutika ni sipi duaduaga, a sa no e na qele kecega na tegu.