Dauveilewai 4 - AI VOLA TABU

Sa valavala ca tale ko ira na Isireli, a sa rawati ira ko ira na nodra meca, 1-3. Sa vakaroti Peraki ko Tipora na parofita alewa me veivala kei ira na meca, 4-16. Sa vakamatei Sisira na turaga ni valu ko Yaeli, e dua na alewa, 17-22. Sa qai malumalumu ko ira na nodra meca, 23, 24.

¹ IA ni sa mate oti ko Euti, era sa kitaka tale na ka e ca e na mata i Jiova ko ira na luve i Isireli.

² A sa volitaki ira ko Jiova ki na liga i Yapini na tui Kenani, o koya sa lewa mai Asori; ia na turaga ni nonai valu ko Sisira, o koya sa dautiko mai Eroseci ni veimatanitu kisau.

³ A ra sa tagi vei Jiova ko ira na luve i Isireli; ni sa tu vua e ciwa na drau na vale-vodoki kaukamea, a sa vakasaurarataki ira na luve i Isireli vakaukauwa ka yabaki ruasagavulu.

⁴ A sa lewai ira na Isireli e na gauna ko ya ko Tipora, e dua na parofita alewa, na wati i Lapitoci.

⁵ A sa tiko ko koya e ruku ni balabala i Tipora, e na tadrua kei Rama kei Peceli, mai na ulu-ni-vanua ko Ifireimi: ka sa daulako cake vei koya ko ira na luve i Isireli me lewai na nodra veileti.

⁶ A sa talaki ko koya, ka kacivi Paraki na luve i Epinoami mai Ketesa nei Nafitali, ka kaya vua, Sa sega li ni vakarota ko Jiova na Kalou nei Isireli, Mo laʼki tauca-vutaka nai valu vaka ki na ulu-ni-vanua ko Tapori, ka kauta kei iko e lewe tini na udolu na tamata vei ira na luve i Nafitali kei ira na luve i Sepuloni?

⁷ Ia kaʼu na yarataki Sisira kivei iko ki na uciwai ko Kisoni, o koya na turaga ni valu nei Yapini, kei na nona veivale-vodoki, kei ira na nona tamata era lewe vuqa, ia kaʼu na soli koya ki na ligamu.

⁸ A sa kaya vua ko Paraki, Kevaka ko na lako kei au, au na lako: ia kevaka ko na sega ni lako kei au, kaʼu na sega ni lako.

⁹ A sa kaya ko koya, Au na lako vakaidina kei iko: ia ko na sega ni vakarokorokotaki e na vuku ni sala ko sa lako kina; ni na volitaki Sisira ko Jiova ki na ligana e dua na alewa. A sa ia ko Tipora, ka rau sa lako kei Paraki ki Ketesa.

¹⁰ A sa kacivi ira na Sepuloni kei ira na Nafitali ko Paraki mo ra lako ki Ketesa; a sa lako cake ka muri koya e tini na udolu na tamata: a sa lako cake kaya ko Tipora.

¹¹ Ia ko Eperi na kai Kenai sa tawasei koya eliu maivei ira na kai Kenai era luve i Opapi na vugo i Mosese, ka birika na nona vale gatu vaka ki na oki mai Seenei-mi, o qori sa voleka ki Ketesa.

¹² A sa tukuni vei Sisira ni sa lako cake ki na ulu-ni-vanua ko Tapori ko Paraki na luve i Epinoami.

¹³ A sa soqona vata ko Sisira na nona vale-vodoki kecega, e ciwa na drau na vale-vodoki kaukamea, kei na tamata kecega era vata kaya, mai Eroseci ni veimatanitu kisau, me ra lako ki na uciwai ko Kisoni.

¹⁴ A sa kaya ko Tipora vei Paraki, Mo ia; ni sa siga o qo, ena soli Sisira kina ki na ligamu ko Jiova: sa sega li ni liutaki iko ko Jiova? A sa lako sobu ko Paraki mai na ulu-ni-vanua ko Tapori, a sa muri koya e lewe tini na udolu na tamata.

¹⁵ Ia ko Jiova sa vakubutaki Sisira, kei na nona vale-vodoki kecega, kei ira na nonai valu kecega, e na bati ni seleiwau, e na mata i Paraki; a sa sobu yani ko Sisira mai na vale-vodoki, ka dro e na yavana.

¹⁶ A sa cicimuria na vale-vodoki kei ira nai valu ko Paraki, ka yaco ki Eroseci ni veimatanitu kisau: a sa bale kecega nai valu i Sisira e na bati ni seleiwau; sa sega ni vo e lewe dua.

¹⁷ Ia ka sa dro ko Sisira e na yavana, ka yaco ki na vale gatu nei Yaeli, na wati i Eperi na kai Kenai: ni ra sa sauvinaka ko Yapini na tui Asori kei na mataqali i Eperi na kai Kenai.

¹⁸ A sa curu kituba ko Yaeli me tavaki Sisira, a sa kaya vua, Curu mai, noqu turaga, curu mai kivei au; kakua ni rere. A sa curu vua ko koya ki loma ni vale gatu, a sa ubi koya ko koya e nai tutuvi:

¹⁹ a sa kaya vua na alewa ko koya, Mo vagunuvi au mada e na dua na wai lailai, niʼu sa viagunu. A sa sereka ko koya na tavaya ni wai-ni-sucu, ka vagunuvi koya kina, ka ubi koya.

²⁰ A sa kaya vua ko koya, Mo tu e na katuba ni vale gatu, ia kevaka sa na lako mai e dua na tamata ka tarogi iko, ka kaya, Sa tiko li eke e dua na tamata? mo qai kaya, E segai.

²¹ A sa kauta ko Yaeli na wati i Eperi e dua nai vakadei ni vale gatu, a sa taura nai tukituki e na ligana, ka lako lo vua, ka tukia nai vakadei ki na nona kanavalavala, ka cokavaka ki na qele: ni sa moce lutu ko koya ka oca. A sa ciba kina.

²² Ka, raica, ni sa cicimuri Sisira tiko ko Paraki, sa curu kituba ko Yaeli me tavaki koya, ka sa kaya vua, Mo lako mai, au na vakatakila vei iko na tamata ko sa qara. Ia ni sa curu vua, raica, sa bale no ka mate tu ko Sisira, a sa tu e na nona kanavalavala nai vakadei.

²³ A sa vakamalumalumutaki Yapini na tui Kenani na Kalou e na siga ko ya, o na matadra na luve i Isireli.

²⁴ A sa laʼki kaukauwa cake tiko na ligadra na luve i Isireli, me veivala kei Yapini na tui Kenani, ka me ra vakarusai Yapini na tui Kenani.