Dauveilewai 11 - AI VOLA TABU

O Yifita na tamata qaqa, sa cati vei ira na wekana, 1-8. Sa qai digitaki koya ko ira na kai nona me nodra turaga ni valu, 4-11. A nona talai vei ira na luve i Amoni, 12-29. Sa vosavavakini vei Jiova, 30, 31. Sa veivala kei ira, ka sa gumatua, 32, 33. Sa dinata na nona vosa vavakini vei Jiova, 34-40.

¹ IA sa tamata kaukauwa ka qaqa ko Yifita na kai Kiliati, ka sa luve ni dua na alewa dauyatagane: a sa tama i Yifita ko Kiliati.

² A sa vakasucuma vei Kiliati ko na watina e so na luvena tagane: ia era sa tubu na luve i watina, era sa qai vakasevi Yifita yani, ka kaya vua, Ko na sega ni taukei e na vale i tama i keitou, e na vuku ni ko sa luvena na alewa tani.

³ A sa drotaki ira na tacina ko Yifita, ka laʼki tiko e na vanua ko Topi: a sa soqoni vata vei Yifita na tamata cidroi e so, a ra sa lako voli kaya.

⁴ Ia ni sa oti na gauna o so, sa rai valu ko ira na luve i Amoni kei ira na Isireli.

⁵ Ia ni sa ia na nodrai valu na luve i Amoni kei ira na Isireli, eratou sa qai lako na qase ni Kiliati, me kauti Yifita mai na vanua ko Topi:

⁶ a ratou sa kaya vei Yifita, Mo lako mai, me neimami turaga, me da veivala kei ira na luve i Amoni.

⁷ A sa kaya ko Yifita vei iratou na qase ni Kiliati, Dou a sega beka ni cati au, ka vakasevi au mai na vale i tamaqu? ia dou sa lakovi au mai edaidai e na vuku ni cava, ni dou sa vakasaurarataki?

⁸ A sa kaya vei Yifita ko iratou na qase ni Kiliati, O koya o qo keitou sa qai lesu mai kina vei iko, mo lako kina kei keitou, me veivala kei ira na luve i Amoni, ka mo ulu i keimami na kai Kiliati kecega.

⁹ A sa kaya ko Yifita vei iratou na qase ni Kiliati, Kevaka dou sa vakalesui au tale, meʼu veivala kei ira na luve i Amoni, ka sa soli ira vei au ko Jiova, au na qai nomudou turaga, se segai?

¹⁰ A ratou sa kaya na qase ni Kiliati vei Yifita, Ena rogoci keda ko Jiova, kevaka keitou sa sega ni kitaka me vaka na nomu vosa.

¹¹ A sa lako vata kei iratou na qase ni Kiliati ko Yifita, a ra sa cakavi koya ko ira na tamata me uludra ka me nodra turaga levu: a sa cavuta ko Yifita na nona vosa kecega e na mata i Jiova mai Misipe.

¹² A sa tala e so nai talatala ko Yifita vei koya na nodra tui na luve i Amoni, a sa kaya, A cava beka na nodaru ka, ko sa lako mai kina vei au, mo ia nai valu e na noqu vanua?

¹³ A sa kaya na nodra tui na luve i Amoni vei iratou nai talatala i Yifita, E na vuku ni sa roqota na noqu vanua ko ira na Isireli, ni ra sa lako cake mai Ijipita, mai Arinoni, ka yaco ki Yapoki kei na Joritani: ia o qo, mo vakasuka o qori tale vakasautu.

¹⁴ A sa tala tale e so nai talatala ko Yifita vei koya na nodra tui na luve i Amoni:

¹⁵ a sa kaya vua, Sa vosa, vakaoqo ko Yifita, Sa sega ni roqota na vanua i Moapi, se na nodra vanua na luve i Amoni, ko ira na Isireli:

¹⁶ ia ni ra sa lako cake mai Ijipita ko ira na Isireli, ka lako voli e na veikau ka yaco ki na Wasa Damudamu, ka yaco ki Ketesa:

¹⁷ sa qai tala e so nai talatala ko ira na Isireli vua na tui Itomi, ka kaya, Meʼu lako-basika mada na nomu vanua: a sa sega ni via vakarorogo ko tui Itomi: a sa talaki vua talega na tui Moapi ko ira, a sa sega ni vinakata ko koya: a sa tikoga mai Ketesa ko ira na Isireli.

¹⁸ A ra sa lako voli e na veikau, ka volita na vanua ko Itomi, kei na vanua ko Moapi, ka ra lako mai ki na kena yasa vaka ki cake ki na vanua ko Moapi, a ra sa laʼki tiko ki tai kadua ni Arinoni, ka sega ni lako ki loma ni nodrai yalayala na Moapi: ni sai yalayala ni Moapi ko Arinoni.

¹⁹ A sa tala e so nai talatala ko ira na Isireli vei Sioni, na nodra tui na luve i Amori, o koya ko tui Esiponi; a sa kaya vua ko ira na Isireli, Me keimami lako-basika mada na nomu vanua, ki na noqu yasana.

²⁰ A sa sega ni vakabauti ira na Isireli ko Sioni, me ra lako-basika na nonai yalayala: a sa soqoni ira vata na nona tamata kecega ko Sioni, ka laʼki tiko mai Yeasi, ka veivala kei ira na Isireli.

²¹ Ia sa soli Sioni kei ira kecega na nona tamata ko Jiova na Kalou nei Isireli ki na ligadra na Isireli, a ra sa mokuti ira: a sa rawata ko ira na Isireli na nodra vanua taucoko na luve i Amori, erai taukei ni vanua ko ya.

²² A ra sa taukena na nodrai yalayala kecega na luve i Amori, mai Arinoni ka kauta sara ki Yapoki, mai na veikau talega ka yaco ki na Joritani.

²³ Ia o qo, sa vakasevi ira na luve i Amori ko Jiova na Kalou nei Isireli, e na matadra na nona tamata na Isireli, ia ko na qai taukeni ira beka ko iko?

²⁴ O na sega beka ni taukena o qori sa solia vei iko ko Kimosi na nomu kalou mo kenai taukei? Ia o qori kecega sa vakaseva tani e na matai-mami ko Jiova na neimami Kalou, keimami na taukena.

²⁵ Ia o qo, a cava ko sa vinaka cake kina vua na tui Moapi, ko Palaki, na luve i Sipori? sa veileti li ko koya kei ira na Isireli, se veivala kei ira,

²⁶ ni sa tiko ko ira na Isireli mai Esiponi kei na kena veikoro, kei Aroeri kei na kena veikoro, kei na veikoro kece sa tu e na bati ni Arinoni, ka yabaki tolu na drau? ia a cava dou a sega ni rawata tale kina e na gauna ko ya?

²⁷ Ia koi au, au sa sega ni valavala ca vei iko, ia ko sa valavala ca ga vei au, ni ko sa mai veivala kei au: o Jiova, o koya sa daulewa, me lewa edaidai vei ira na luve i Isireli kei ira na luve i Amoni.

²⁸ Ia na nodra tui na luve i Amoni sa sega ni vakarogoca na vosa i Yifita, a ya ka talaki kina vei koya.

²⁹ Sa qai curumi Yifita na Yalo i Jiova, a sa lako yani ko koya e Kiliati, kei Manase, ka lako yani e Misipe mai Kiliati, ia mai Misipe mai Kiliati sa lako ko koya vei ira na luve i Amoni.

³⁰ A sa cavuta e dua na vosa vavakini vei Jiova ko Yifita, ka kaya, Kevaka ko na soli ira vakaidina na luve i Amoni ki na ligaqu,

³¹ na ka sa curu yani e na katuba ni noqu vale me laʼki tavaki au, niʼu sa lesu vakacegu maivei ira na luve i Amoni, ena nei Jiova, ia kaʼu na cabora mei soro kama.

³² A sa lako yani ko Yifita vei ira na luve i Amoni me veivala kei ira; a sa soli ira ko Jiova ki na ligana.

³³ A sa mokuti ira ko koya mai Aroeri, ka yaco sara ki Minici, e ruasagavulu na koro, ka kauta sara ki Apeli-kiramimi, e na moku levu sara. Sa qai malumalumu mai ko ira na luve i Amoni vei ira na luve i Isireli.

³⁴ A sa lesu mai ki Misipe ko Yifita ki na nona vale, ka, raica, sa lako yani mo tavaki koya na luvena alewa, ka taura na lali ka meke lako: ia sa dua bauga ko koya; sa sega tale na luvena tagane, so na luvena alewa.

³⁵ Ia ni sa raici koya ko koya, sa dresulaka na nonai sulu, ka kaya, Ule, na luvequ alewa! ko sa vakamalumalumutaki au sara, ia ko sa yaco me ka rarawa vei au: niʼu sa dalaga oti na gusuqu vei Jiova, ia kaʼu sa sega ni vuki tani rawa.

³⁶ A sa kaya vua ko koya, Na tamaqu, ko sa dalaga na gusumu vei Jiova; mo cakacaka ga vei au me vaka na ka sa lako mai na gusumu; e na vuku ni sa cudruvaki iko ko Jiova vei ira na nomu meca na luve i Amoni.

³⁷ Sa kaya talega ko koya vei tamana, Me caka vei au na ka o qo: me laivi au mada ka vula rua, meʼu laʼki veilakoyaki mai na veiulu-ni-vanua, meʼu tagicaka na noqu gonealewa, koi au kei ira keitou sai taba kaya.

³⁸ A sa kaya ko koya, Mo lako. A sa talai koya yani mo vula rua: a sa lako ko koya kei ira era sai taba kaya, a sa tagicaka na nona gonealewa-mai na veiulu-ni-vanua.

³⁹ Ia ni sa oti na vula e rua, sa lesu mai ko koya vei tamana, a sa cakacaka vua ko koya me vaka na nona vosa vavakini ka cavuta eliu ko koya: a sa sega ni kila e dua na tagane ko koya. A sa yaco me daunodrai valavala na Isireli,

⁴⁰ e na veiyabaki kecega, me ra lako na gonealewa ni Isireli me ra vakacaucautaka na gonealewa i Yifita, na kai Kiliati, ka bogi va e na veiyabaki.