Cakacaka 9 - AI VOLA TABU

Sa saumaki ko Saula, 1-22. Sa qai via vakamatei koya ko ira na Jiu, a ra sa vakatalai koya ki Tarisu ko ira na veiwekani; a ra sa qai cegu na lewe ni soro, 23-31. Sa vakabulai Inia ko Petero, 32-35. Sa qai vakabulai Tapica, 36-43.

¹ A SA cavuta tiko ko Saula na vosa vakacudrucudruya kei na veivakamatei vei ira sa lotu vua na Turaga, a sa lako ki na bete levu,

² a sa masuta vua nai vola ki Tamasiko ki na veivale ni lotu, kevaka e kunea ko koya e so era sa muria nai valavala ko ya, se ra tagane se ra yalewa, me kau ka vesu tu ki Jerusalemi.

³ Ia ni sa lako tu, sa yaco me voleka ki Tamasiko; a sa cila vakavolivoliti koya vakasauri mai e dua na rarama mai lomalagi:

⁴ a sa bale sobu ki na soso, a sa rogoca e dua na domo ni sa kaya vua, I Saula, i Saula, o sa vakacacani au e na vuku ni cava?

⁵ A sa kaya ko koya, O cei ko iko, Turaga? A sa kaya na Turaga, Oi au ko Jisu, o koya ko sa vakacacana: e ca vei iko mo caqeta na mata ni moto.

⁶ A sa sautaninini ko koya ka kidacala, ka kaya, Turaga, a cava ko sa vinakata meʼu cakava? A sa kaya na Turaga vei koya, Tu cake, ka lako ki na koro, ka na tukuni vei iko na ka e dodonu mo cakava.

⁷ Ia ko ira na tamata sa lako vata kaya era sa tu ka vagagalu, era sa rogoca ga na domo, a ra sa sega ni raica e dua.

⁸ A sa tu cake mai na soso ko Saula; ia ni sa basu na matana, sa sega ni raica e dua: a ra sa tuberi koya, ka kauta ki Tamasiko.

⁹ A sa bogi tolu ka sega ni rai rawa, a sa sega ni kana se gunu.

¹⁰ A sa dua na tisaipeli mai Tamasiko, ko Anania na yacana; a sa kaya na Turaga vei koya e na raivotu, I Anania. A sa kaya ko koya, Raica, oi au, Turaga.

¹¹ A sa kaya na Turaga vei koya, Tu cake ka lako ki na salatu, na yacana ko Dodonu, ka taroga na kai Tarisu, ko Saula na yacana, ki na vale i Juta; ia raica, sa masu ko koya;

¹² a sa kunea e na raivotu e dua na tamata, ko Anania na yacana, sa curu mai, ka tabaka e na ligana, me rai rawa ko koya.

¹³ Sa qai kaya ko Anania, Turaga, era sa lewe vuqa kaʼu sa rogoca maikina e na tamata o qo, na levu ni ca sa kitaka vei ira na nomu tamata yalosavasava mai Jerusalemi:

¹⁴ eke talega sa lesia ko ira na bete levu me vauci ira kecega sa masuta na yacamu.

¹⁵ A sa kaya na Turaga vei koya, Mo lako ga; o koya o qo na tamata digitaki vei au, me kauta na yacaqu ki na matadra na veimatanitu kisau, kei na tui e so, kei ira na luve i Isireli:

¹⁶ ni kaʼu na vakatakila vua na levu ni ka ena vosota e na vuku ni yacaqu.

¹⁷ A sa lako ko Anani a, ka curu ki na vale; a sa tabaka e na ligana, ka kaya, Na wekaqu Saula, a Turaga ko Jisu, o koya ka rairai vei iko e na gau-ni-sala ko a lako mai kina, sa talai au mai, mo rai rawa, mo vakasinaiti talega e na Yalo Tabu.

¹⁸ A sa lutu vakasauri mai na matana na ka e vaka na vari ni ika: a sa rai rawa vakasauri ko koya; a sa tu cake, ka sa papitaisotaki.

¹⁹ Ia ni sa kana oti, sa kaukauwa mai. A sa tiko ko Saula e na bogi e so kei ira sa lotu mai Tamasiko.

²⁰ A sa vunautaka sara e na veivale ni lotu, ni sa Luve ni Kalou ko Karisito.

²¹ A ra sa kidacala kecega era sa rogoca, a ra sa kaya, Sa sega li ni koya o qo sa vakacacani ira mai Jerusalemi era sa masuta na yaca o qo, a sa lako talega mai kike me kitaka vakakina, me kauti ira ka vesu tu vei ira na bete levu?

²² A sa kaukauwa cake mai ko Saula, a sa vakataqayataki ira na Jiu era sa tiko mai Tamasiko, ni sa vakadinadina sara ni sa Karisito ko koya o qo.

²³ A sa oti mada na veisiga e vuqa, sa qai bosea ko ira na Jiu me ra vakamatea:

²⁴ a sa kila ko Saula na nodra buki vere. A ra sa vakatawa na veimatamata-ni-koro e na siga kei na bogi me ra vakamatea.

²⁵ Sa qai kauta e na bogi ko ira sa lotu, ka tukuca sobu e na dua na sova ki daku ni bai.

²⁶ Ia ni sa yaco ki Jerusalemi ko Saula, sa vakatovolea me laʼki tiko vata kei ira sa lotu: a ra sa rerevaka kecega, a ra sa sega ni vakadinata ni sa lotu ko koya.

²⁷ Sa qai kauti koya ko Parinapa, ka kauta vei iratou nai apositolo, a sa tukuna vei iratou na nona raica na Turaga e na gau-ni-sala, o koya sa vosa talega vua, kei na nona vunau doudou mai Tamasiko e na yaca i Jisu.

²⁸ A sa tiko vata lako ko koya kei iratou mai Jerusalemi:

²⁹ a sa vosa doudou e na yaca ni Turaga ko Jisu; a sa vosa ka veileti kei ira ka vulagi e na veimatanitu kisau; a ra sa saga me ra vakamatea.

³⁰ Ia ni sa kila ko ira na veiwekani, era sa kauti koya ki Sisaria, a ra sa qai vakatala ki Tarisu.

³¹ Sa qai cegu nai vavakoso lewe ni soro mai Jutia taucoko kei Kalili kei Samaria, a ra sa vakatataki cake; a sa dau nodrai valavala me rerevaka na Turaga, a sa vakacegui ira na Yalo Tabu, a ra sa tubu kina me ra lewe vuqa.

³² A SA yaco, ni sa lakova ko Petero na veiyasana kecega, sa lako sobu talega vei ira na tamata lotu era sa tiko mai Lita.

³³ A sa kunea kina e dua na tamata ko Inia na yacana, sa davo ga e nai mocemoce ka yabaki walu, ni sa tauva na mate sautaninini.

³⁴ A sa kaya vua ko Petero, Inia, sa vakabulai iko ko Jisu Karisito: tu cake, ka vakarauna na nomui mocemoce. A sa tu cake vakasauri ko koya.

³⁵ A ra sa raica ko ira kecega era sa tiko mai Lita kei Sarona, ia era sa saumaki mai ki na Turaga.

³⁶ A sa tiko mai Jopa e dua sa lotu ko Tapica na yacana, a kenai balebale ko Torika: sa sinai na yalewa o qo e na cakacaka vinaka, kei na cakacaka loloma sa kitaka tiko.

³⁷ A sa yaco e na gauna ko ya, sa tauvi-mate ko koya, ka ciba: ia ni ra sa vakasilima oti, era sa vakotora e na dua nai taba loma ni vale ecake.

³⁸ Ia e na vuku ni sa veivolekati ko Jopa kei Lita, ni ra sa rogoca ko ira sa lotu ni sa tiko kina ko Petero, era sa tala e lewe rua na tamata vei koya, me masuta me kakua ni dede ni lako mai vei ira.

³⁹ Sa qai ia ko Petero ka lako vata kei rau. Ia ni sa tadu ko koya, era sa kauti koya ki nai taba loma ni vale ecake: a sa tu voleka vua ko ira na yada kecega, a ra sa tagi, ka vakatakila na veicurucuru kei na veisulu ka cakava ko Torika, ni sa tiko vata kei ira.

⁴⁰ A sa vakatalai ira kece yani ko Petero, a sa vakatekiduru, ka masu; a sa vuki vaka ki na yago, ka kaya, Tapica, tu cake. A sa rai tale na matana: ia ni sa kunei Petero, sa qai duri cake ko koya.

⁴¹ A sa dodoka vua na ligana, ka laveti koya cake; ia ni sa kacivi ira na tamata lotu kei ira na yada, sa vakaraitaki koya ni sa bula.

⁴² A ka o qo sa kilai mai Jopa taucoko; a ra sa lewe vuqa sa vakabauta na Turaga.

⁴³ A sa vuqa na siga sa tiko vata ko koya mai Jopa kei Saimoni a matai ni kuli-ni-manumanu.