Cakacaka 8 - AI VOLA TABU

Era sa vakacacani vakalevu na tamata lotu, a ra sa veiseyaki kina ki na veikoro, a sa tubu kina na lotu, 1-4. Sa laʼki vunau mai Samaria ko Filipo, a ra sa lewe vuqa sa veivutuni ka papitaisotaki, 5-13. Sa talai ko Petero kei Joni vei ira, a sa yaco kina vei ira na Yalo Tabu, 14-17. Sa via volia na kaukauwa me solia na Yalo Tabu ko Saimoni, a sa vunauca ko Petero, 18-24. A kenai tukutuku na matanivanua ni Iciopia, 25-40.

¹ A SA vinakata na nona mate ko Saula. Ia e na gauna ko ya era sa vakacacani vakalevu kina nai vavakoso lewe ni soro era sa tiko mai Jerusalemi; a ra sa veiseyaki kina ki na veiyasana i Jutia kei Samaria, o iratou ga nai apositolo e segai.

² A ra sa buluti Sitifeni e so na tamata daulotu, a ra sa cakava na somate levu e na vukuna.

³ Ia ko Saula, sa vakacacani ira vakalevu nai vavakoso lewe ni soro, ni sa curu ki na veivale kecega, a sa yarataki ira na tagane kei ira na yalewa, ka biuta ki na vale ni veivesu.

⁴ Ia ko ira era sa veiseyaki, era sa lako ki na veiyasana kecega ka vunautaka na vosa.

⁵ Sa qai lako sobu ko Filipo ki na koro ko Samaria, a sa vunautaki Karisito kivei ira.

⁶ Ia ko ira na tamata era sa lomavata me ra vakarogoca na ka sa tukuna ko Filipo, ni ra sa rogoca ka raica na veika-mana sa kitaka ko koya.

⁷ Ni sa lako yani maivei ira na lewe levu e so na yalo tawa-savasava sa curumi ira, ni ra sa qoqolou tiko e na domo levu; kei ira talega era lewe vuqa sa tauvi ira na mate sautaninini, kei na lokiloki, era sa vakabulai.

⁸ A sa levu kina na marau e na koro ko ya.

⁹ A sa dua na tamata, ko Saimoni na yacana, sa daucakai sausau makawa e na koro ko ya, a sa vakidacalataki ira vakalevu kina na kai Samaria, ni sa dautukuni koya me dua na ka levu:

¹⁰ a ra sa vakarogoci koya ko ira kecega, o ira e lalai kei ira e lelevu, a ra sa kaya, O koya o qo na kaukauwa levu ni Kalou.

¹¹ A ra sa vakarogoci koya, ni sa vakidacalataki ira vakadede ko koya e na nonai sausau.

¹² Ia ni ra sa vakadinati Filipo ni sa vunautaka na veika ni matanitu ni Kalou, kei na yaca i Jisu Karisito, era sa qai papitaisotaki, o ira na tagane kei ira na yalewa.

¹³ Sa qai vakadinata talega ko Saimoni; ia ni sa papitaisotaki oti, erau sa dautiko vata kei Filipo; a sa kidacala, ni sa raica na veika-mana kei na caka-mana levu sa kitaki tiko.

¹⁴ Ni sa qai rogoca ko iratou nai apositolo eratou sa tiko mai Jerusalemi, ni ra sa vakadinata na vosa ni Kalou na kai Samaria, eratou sa talai Petero kei Joni vei ira:

¹⁵ ia koi rau, ni rau sa lako sobu mai, erau sa masulaki ira, me yaco vei ira na Yalo Tabu; (

¹⁶ ni sa sega ni lutu vua e dua vei ira ko koya: era sa papitaisotaki walega e na yaca ni Turaga ko Jisu.)

¹⁷ A rau sa tabaki ira e na ligadrau, a sa yaco kina kivei ira na Yalo Tabu.

¹⁸ Ia ni sa raica ko Saimoni ni sa soli na Yalo Tabu e na veitabaki ni ligadrau nai apositolo, sa qai via solia vei rau nai lavo,

¹⁹ ka kaya, Solia talega mai vei au na kaukauwa o qo, me yaco kina na Yalo Tabu vei ira yadua kaʼu na tabaka e na ligaqu.

²⁰ A sa kaya vua ko Petero, Mo drau rusa vata kei na nomui lavo, e na vuku ni ko sa nanuma ni sa voli rawa nai solisoli ni Kalou e nai lavo.

²¹ Sa sega na nomu tikina se nomui votavota e na ka o qo, ni sa tawa dodonu na yalomu e na mata ni Kalou.

²² O koya o qo mo qai veivutunitaka na nomui valavala ca o qo, ka masu vua na Kalou, de ko na sega beka ni cudruvi e na nanuma ni yalomu.

²³ Niʼu sa kunea ni sa nomu tu na ka gaga sara, ka ko sa vauci e nai valavala ca.

²⁴ Sa qai vosa ko Saimoni, ka kaya, Drau masulaki au vua na Turaga, me kakua ni yaco vei au e dua na ka drau sa vosa kina.

²⁵ Ia koi rau, ni rau sa tukuna oti ka vunautaka ua vosa ni Turaga, erau sa lesu tale ki Jerusalemi, ka rau sa vunautaka nai tukutuku-vinaka e na Veikoro lalai e vuqa mai Samaria.

²⁶ A sa vosa vei Filipo e dua na agilose ni Turaga, ka kaya, Mo ia ka lako vaka ki na mata ni ceva, e na sala sa lako mai Jerusalemi kivaka ki Kesa, ko ya e veikau.

²⁷ Sa qai ia ko koya ka lako: ka raica, e dua na kai Iciopia, a matanivanua, a tamata levu i Kadasi na nodra ranadi na kai Iciopia, a sa veitaliataka na nonai yau kecega, a sa lako oti ki Jerusalemi me soro,

²⁸ a sa lesu tu, a sa wiliki Isaia na parofita, ni sa tiko e na nona vale-vodoki.

²⁹ Sa qai kaya na Yalo vei Filipo, Lako voleka, mo drau laʼki tiko kaya e na vale-vodoki ko ya.

³⁰ Sa qai cici yani ko Filipo, a sa rogoci koya ni sa wiliki Isaia na parofita; a sa kaya, O sa kila na ka ko sa wilika, se segai?

³¹ A sa kaya ko koya, Au sa rawata vakaevei, kevaka sa sega e dua me tuberi au? A sa masuti Filipo me cabe cake me rau tiko kaya.

³² O qo ga na tiki ni Vola sa wilika ko koya, Sa tuberi ko koya me vaka na sipi me vakamatei; ia me vaka na lami sa galu e na mata i koya sa kotiva, sa vakakina ko koya, ni sa sega ni dalaga na gusuna.

³³ Ni sa malumalumu tiko ko koya, sa sega ni lewai vakadodonu: ia ko cei ena tukuna na nonai tubutubu? ni sa kau tani e vuravura na nona bula.

³⁴ Sa qai vosa na matanivanua vei Filipo, ka kaya, Au tarogi iko mada, se sa vosataki cei na parofita e na vosa o qo: o koya ga, se dua tani?

³⁵ Sa qai dalaga na gusuna ko Filipo, a sa vakatekivu e na tikina ko ya ni Vola, a sa vunautaki Jisu vua.

³⁶ Ia ni rau sa lako tu e na sala, erau sa yaco ki na dua na wai: a sa kaya na matanivanua, Raica, na wai! a cava sa tarovi au meʼu kua ni papitaisotaki?

³⁷ A sa kaya ko Filipo, Kevaka ko sa vakadinata e na vu ni yalomu taucoko, sa tara ga. A sa vosa ko koya, ka kaya, Au sa vakadinata ni sa Luve ni Kalou ko Jisu Karisito.

³⁸ Sa qai kaya ko koya me tu vakadua mada na vale-vodoki: a rau sa lako sobu ruarua ki na wai, ko Filipo kei na matanivanua, a sa papitaisotaka.

³⁹ Ia ni rau sa cabe cake mai na wai, sa kauti Filipo tani na Yalo ni Turaga, a sa sega ni raica tale ko na matanivanua: a sa lako ko koya e nona sala ka reki tiko.

⁴⁰ A sa kune ko Filipo mai Asoto: a sa lakova na veikoro kecega ka vunau lako, a sa yaco sara ki Sisari a.